ជីវិតកម្សាន្ដ

ជំនួបក្រុមតារាចម្រៀង BTS និងលោក ចូ បៃដិន បិទទ្វារចំពោះអ្នកកាសែត

បានផុស

២ years មុន

នៅ

ថ្ងៃពុធ ១ មិថុនា ២០២២

ដោយ

ជំនួបរវាងក្រុមតារាចម្រៀងកូរ៉េខាងត្បូងដ៏ល្បីល្បាញ BTS ជាមួយប្រធានាធិបតីសហរដ្ឋអាមេរិក លោក ចូ បៃដិន ត្រូវបានបិទទ្វារចំពោះអ្នកសារព័ត៌មាន ប៉ុន្តែសេតវិមានបាននិយាយថា គោលបំណងតែមួយគត់គឺដើម្បីពិភាក្សាអំពីសារសំខាន់នៃភាពចម្រុះ និងការដាក់បញ្ចូលទម្រង់របស់ក្រុមតារាចម្រៀង BTS ជាទូតសុច្ឆន្ទៈយុវវ័យ។

ក្រុមតារាចម្រៀងបុរសកូរ៉េខាងត្បូង BTS ដែលជាក្រុមរៃអង្គាសប្រាក់សម្រាប់បុព្វហេតុយុត្តិធម៌សង្គមអាមេរិកបានជួបប្រធានាធិបតីអាមេរិក លោក ចូ បៃដិន នៅសេតវិមានកាលពីថ្ងៃអង្គារ៍ ទី៣១ ខែឧសភា ដើម្បីពិភាក្សាអំពីឧក្រិដ្ឋកម្មស្អប់ខ្ពើមដែលមានគោលដៅលើជនជាតិអាស៊ីរស់នៅអាមេរិក។

ក្រុមតារាចម្រៀងបុរសកូរ៉េខាងត្បូង BTS ពេលធ្វើសន្និសីទនៅអាមេរិកមុនជួបលោក ចូ បៃដិន

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមតារាចម្រៀងនេះបានធ្វើសន្និសីទសារព័ត៌មានខ្លីដល់សារព័ត៌មានមុនពេលជួបលោកប្រធានាធិបតី និងបានអំពាវនាវឲ្យបញ្ឈប់ឧក្រិដ្ឋកម្មរើសអើង ស្ពប់ខ្ពើមប្រឆាំងលើជនជាតិអាស៊ីរស់នៅអាមេរិក។

សមាជិកក្រុមម្នាក់បាននិយាយតាមរយៈអ្នកបកប្រែថា ៖«យើងត្រូវបានបំផ្លិចបំផ្លាញដោយសារការកើនឡើងឧក្រិដ្ឋកម្មស្អប់ខ្ពើមក្នុងពេលថ្មីៗនេះ ក្នុងនោះឧក្រិដ្ឋកម្មស្អប់ខ្ពើមចំពោះជនជាតិអាមេរិកដើមកំណើតអាស៊ី។ ដើម្បីបញ្ឈប់បញ្ហានេះ និងគាំទ្រដល់បុព្វហេតុ យើងខ្ញុំចង់ឆ្លៀតឱកាសនេះដើម្បីផ្សព្វផ្សាយទៀត»។

ជំនួបជាមួយប្រធានាធិបតីបានកើតមានឡើង ស្របពេល«ខែនៃអ្នកកោះហាវ៉ៃ/ប៉ាស៊ីហ្វិកដើមកំណើតអាស៊ី-អាមេរិក»ក្នុងខែឧសភានេះបានចូលមកដល់ បន្ទាប់ពីឧក្រិដ្ឋកម្មស្អប់ខ្ពើមក្នុងសហគមន៍បានកើនឡើងខ្លាំងកាលពីឆ្នាំមុន។

ការវាយប្រហារលើប្រជាជនដែលមានដើមកំណើតអាស៊ីបានកើតមានឡើង ដោយសារអ្នកនយោបាយ និងអ្នកវិភាគមួយចំនួនបានជំរុញឲ្យពលរដ្ឋអាមេរិកស្តីបន្ទោសលើប្រទេសចិនពាក់ព័ន្ធនឹងជំងឺកូវីដ-១៩។

ខណៈជំនួបជាមួយលោកប្រធានាធិបតីត្រូវបានបិទទ្វារសម្រាប់អ្នកកាសែត សេតវិមានបាននិយាយថា ៖«គោលបំណងតែមួយគត់គឺដើម្បីពិភាក្សាអំពីសារសំខាន់នៃភាពចម្រុះ និងការដាក់បញ្ចូលទម្រង់របស់ក្រុមតារាចម្រៀង BTS ជាទូតសុច្ឆន្ទៈយុវវ័យដើម្បីផ្សព្វផ្សាយសារនៃសេចក្តីសង្ឃឹម និងភាពវិជ្ជមានទូទាំងពិភពលោក»។

ក្រុមតារាចម្រៀងនេះមានកេរ្តិ៍ឈ្មោះល្បីល្បាញទូទាំងពិភពលោកចំពោះបទចម្រៀង និងក្បាច់រាំ ហើយយុទ្ធនាការសង្គមរបស់ពួកគេក៏ទទួលបានជោគជ័យដែលមានគោលដៅផ្តល់អំណាចដល់យុវវ័យចាប់តាំងពីពួកគេលេចមុខដំបូងក្នុងឆ្នាំ២០១៣។ មូលដ្ឋានអ្នកគាំទ្ររបស់ពួកគេបានពង្រីកចូលទៅក្នុងស្រទាប់មនុស្សធំ និងចំណាស់ ដែលមានចំណេះដឹងផ្នែកការប្រើប្រាស់បណ្តាញទំនាក់ទំនងសង្គម។

កាលពីខែមិថុនា ឆ្នាំ២០២០ អ្នកគាំទ្ររបស់ BTS រៃអង្គាសប្រាក់បានប្រមាណ១លានដុល្លារអាមេរិកក្នុងមួយថ្ងៃនៅក្នុងយុទ្ធនាការ #MatchAMillion សម្រាប់បុព្វហេតុយុត្តិធម៌សង្គមអាមេរិក៕

ប្រែសម្រួល៖ វីរបុត្រ
ប្រភព៖ Reuters