លោក ចូ បៃដិន ទទួល​ការ​ព្យាបាល​​វិទ្យុសកម្ម​សម្រាប់​ជំងឺ​មហារីក​ក្រពេញ​ប្រូស្តាត

អតីតប្រធានាធិបតីអាមេរិក ចូ បៃដិន កំពុងទទួលការព្យាបាលដោយវិទ្យុសកម្ម និងការព្យាបាលដោយអរម៉ូន ដែលជាផ្នែកមួយនៃការព្យាបាលជំងឺមហារីកក្រពេញប្រូស្តាត។

យោង​តាម​ការ​ចុះ​ផ្សាយ​របស់​​សារព័ត៍មាន CNBC កាល​ពី​ថ្ងៃ​ទី​១១​ខែ​តុលា​ឆ្នាំ​​២០២៥ អ្នកនាំពាក្យ​របស់​លោក ចូ បៃដិន បាននិយាយថា «នេះ​ជាផ្នែកមួយនៃផែនការព្យាបាលជំងឺមហារីកក្រពេញប្រូស្តាតរបស់គាត់ ដោយ​លោក ចូ បៃដិន កំពុងទទួលការព្យាបាលដោយវិទ្យុសកម្ម និងការព្យាបាលដោយអរម៉ូន»។

ការិយាល័យរបស់លោក បៃដិន បានបង្ហាញជាលើកដំបូងនៅក្នុងខែឧសភា​កន្លង​ទៅ​ថា អតីតប្រធានាធិបតី​ត្រូវបានធ្វើរោគវិនិច្ឆ័យថាមានជំងឺមហារីកក្រពេញប្រូស្តាត ដែលបានរាលដាលដល់ឆ្អឹងរបស់គាត់ បន្ទាប់ពីគ្រូពេទ្យបានរកឃើញដុំសាច់អំឡុងពេលធ្វើតេស្តរកបញ្ហាទឹកនោម។

បញ្ហា​សុខភាពរបស់អតីត​មេ​ដឹក​នាំ​វ័យ​៨២​ឆ្នាំ​រូបនេះ បានទាក់ទាញការចាប់អារម្មណ៍ពីសាធារណជន ចាប់តាំងពីការបោះពុម្ពសៀវភៅដែលរៀបរាប់លម្អិតអំពីការតស៊ូរបស់គាត់ ក្នុងអំឡុងពេលយុទ្ធនាការដែលគាត់បរាជ័យសម្រាប់អាណត្តិប្រធានាធិបតីទីពីរកាលពីឆ្នាំមុន។

នៅខែកក្កដា​ឆ្នាំ​២០២៤ លោក បៃដិន បានប្រកាសដកខ្លួនចេញពីការប្រជែងតំណែងប្រធានាធិបតី ហើយបានគាំទ្រអនុប្រធានាធិបតីលោកស្រី Kamala Harris បន្ទាប់ពីការជជែកដេញដោលធ្វើ​មិន​បាន​ល្អតទល់​នឹង​លោក ដូណាល់ ត្រាំ។ យ៉ាង​ណា​មិញ​ ក្រោយមកលោកស្រី​ Harris ក៏​នៅ​តែ​​ចាញ់ការបោះឆ្នោត។

យោងតាមសមាគមជំងឺមហារីកអាមេរិក ជំងឺមហារីកក្រពេញប្រូស្តាត គឺជាជំងឺមហារីកទូទៅបំផុតក្នុងចំណោមបុរស និងជាមូលហេតុចម្បងទីពីរនៃការស្លាប់ទាក់ទងនឹងជំងឺមហារីក។ ជំងឺមហារីកប្រភេទនេះ គឺជារឿងធម្មតាជាពិសេសចំពោះបុរសវ័យចំណាស់ ដោយប្រហែល ៨០% នៃបុរសដែលមានអាយុលើសពី ៨០ឆ្នាំមានកោសិកាមហារីកនៅក្នុងក្រពេញប្រូស្តាតរបស់ពួកគេ។ ការព្យាបាលដោយអរម៉ូន គឺជាការព្យាបាលទូទៅ ដែលអាចបង្រួមដុំសាច់ និងពន្យឺតការលូតលាស់នៃជំងឺមហារីក ប៉ុន្តែមិនអាចព្យាបាលវាបានឡើយ៕

ដោយ៖ ឈាង