អ្នកគ្រប់គ្រង Miss Aura ច្រានចោលការលើកឡើងរបស់ជនជ្រុលនិយមថៃ រឿងឈុត “ព្រះម៉ែធរណី”

អ្នកគ្រប់គ្រងកម្មវិធីប្រកួត Miss Aura Cambodia ចេញមុខប្រតិកម្មឆ្លើយតបភ្លាមៗ បន្ទាប់ពីឃើញមានការវែកញែករិះគន់ពីសំណាក់ក្រុមអ្នកគាំទ្រជ្រុលនិយមថៃមួយចំនួនតូច ដែលបានលើកឡើងថា កម្ពុជាចម្លងវប្បធម៌ឈុត «មាតាផែនដី» របស់ថៃ។

ចំពោះប្រតិកម្មឆ្លើយតបនេះ ធ្វើឡើងស្របពេលដែលមានការជជែកវែកញែកពីខាងអ្នកគាំទ្រថៃ ពិសេសអ្នកនិយតាមដានវិស័យបវរកញ្ញារបស់ថៃ បាននិយាយថា អ្នកគ្រប់គ្រងកម្មវិធីប្រកួត Miss Aura Cambodia បានលួចចម្លងឈុត «មាតាផែនដី» ពីរបស់ថៃ ប៉ុន្តែចំណុចនេះ ត្រូវបានអ្នកស្រី Julie Hoeung ច្រានចោលទាំងស្រុង។

អ្នកគ្រប់គ្រងកម្មវិធីប្រកួត Miss Aura Cambodia បានបញ្ជាក់ទៅកាន់ក្រុមអ្នកជ្រុលនិយមថៃថា “បើ​កម្ពុជា​ចម្លងវប្បធម៌ពី​ថៃពិតមែន សូម​រាយការណ៍​ទៅ​រដ្ឋាភិបាល​ថៃ និងក្រសួង​វប្បធម៌​ថៃ ដើម្បី​ងាយ​ស្រួល​ដល់​បេតិកភណ្ឌ​ពិភពលោក​របស់​អង្គការ​យូណេស្កូ​ក្នុង​ការ​អនុម័ត“។

អ្នកស្រី Julie Hoeung បានសង្កត់ធ្ងន់ទៀតថា “បើកម្ពុជាចម្លងវប្បធម៌ «មាតាផែនដី» របស់ថៃ សូមក្រសួងវប្បធម៌ថៃ និងរដ្ឋាភិបាលថៃចេញមុខដោះស្រាយជាមួយនាងខ្ញុំ (Julie Hoeung) ក្នុងឋានៈជា Miss Aura Cambodia នាយកគ្រប់គ្រងជាតិខ្ញុំរង់ចាំជួប ឬអាចជួបដោះស្រាយនៅស្ថានទូតថៃប្រចាំកម្ពុជា Julie តែងតែរង់ចាំស្វាគមន៍ជានិច្ច”។

អ្នកគ្រប់គ្រងកម្មវិធីរូបនេះ បន្តថា ខ្លួនគោរពប្រទេសថៃ ដូច្នេះគោរពសិទ្ធិគ្នាទៅវិញទៅមក ហើយអ្នកស្រីគឺជាអ្នកឆ្នៃឈុតនេះដោយដកស្រង់ចេញមកពីជញ្ជាំងប្រាសាទអង្គរវត្ត។ សូមបញ្ជាក់ថាឈុតដែលមានឈ្មោះថា «ព្រះម៉ែធរណី» ជាការច្នៃម៉ូដឡើងដោយអ្នកគ្រប់គ្រងកម្មវិធី Miss Aura Cambodia 2024 ផ្ទាល់ និងគ្រងដោយបវរកញ្ញា កែវ សេងលីហួរ Miss Aura Cambodia 2024 នៅក្នុងឈុតតំណាងជាតិកាលពីថ្មីៗកន្លងទៅនេះ៕ អត្ថបទ៖ ចាន់រ៉ា