នាយិការងព័ត៌មាន CNC កញ្ញា នូ មៈនេត្រអាថាណ្ណា ទទួលមរណភាពក្នុងអាយុ៣៧ឆ្នាំ

ទស្សនិកជននិងអ្នកនិយមតាមដានព័ត៌មានបានបង្ហាញការភ្ញាក់ផ្អើលហើយរន្ធត់ចិត្តគ្រប់គ្នា បន្ទាប់ពីទទួលដំណឹងថាកញ្ញា ថាណា ពិធីការិនីអានព័ត៌មានពេលព្រឹកដ៏ល្បីនៅ CTN និង CNC បានទទួលមរណភាពដោយសារជំងឺមហារីក។

បើតាមការបង្ហោះលើ​បណ្ដាញសង្គមរបស់ CNC TV នាយិការងព័ត៌មាន CNC កញ្ញា នូ មៈនេត្រអាថាណ្ណា បានទទួលមរណភាពក្នុងអាយុ៣៧ឆ្នាំ ដោយរោគាពាធ កាលពីយប់អាទិត្យ ទី២៦ ខែមករា ឆ្នាំ២០២៥ នាមន្ទីរពេទ្យក្រុងបាងកក ប្រទេសថៃ។

CNC TV បានចាត់ទុកការបាត់បង់កញ្ញា នូ មៈនេត្រអាថាណ្ណា គឺជាការបាត់បង់នូវធនធនមនុស្សដ៏សំខាន់សម្រាប់ក្រុមហ៊ុន CBS ហើយក៏ជាការបាត់បង់នូវបញ្ញាវន្តដ៏ឆ្នើមក្នុងវិស័យសារព័ត៌មាន។

បងស្រីរបស់កញ្ញា អាថាណ្ណា បានបង្ហោះលើហ្វេសបុកឈ្មោះ MaDa PH ថា ប្អូនស្រីរបស់អ្នកស្រីបានទទួលមរណភាពដោយសារជំងឺមហារីក។ សពរបស់កញ្ញា មៈនេត្រអាថាណ្ណា នឹងត្រូវបញ្ជូនមក​ដល់ផ្ទះវិញនៅថ្ងៃទី៣១ ខែមករា ហើយពិធីបុណ្យនឹងចាប់ផ្ដើមនៅថ្ងៃសៅរ៍ ទី១ ខែកុម្ភៈ ឆ្នាំ២០២៥។

ផ្អែកតាមការឲ្យដឹងពីគណនីហ្វេសប៊ុកខាងលើបានរៀបរាប់ភ្ជាប់រូបភាពមួយសន្លឹកថា៖ «ស្រីស្អាតក្នុងបេះរបស់បងជាប្អូនជាមិត្តដ៏ល្អសែនល្អជាទីប្រឹក្សារបស់បងជាកំលាំងចិត្តជាអ្នកមានគុណ លាហើយប្អូនសម្លាញ់លាគ្មានថ្ងៃត្រឡប់។ [..] មនុសុ្សល្អរបស់បងអើយដឹងទេថា បងនឹកដឹងទេថាបងឈឺប៉ុណ្ណាក្មេងល្អរបស់បងពាក្យសន្យាថា យើងនឹងដើរលេងជាមួយគ្នារលាយហើយប្អូនទៅចោលបងហើយ ហេតុអី្វទៅ? សូមឲ្យប្អូនបានស្ងប់សុខកើតជាតិណាៗជួបតែមនុស្សល្អ អាវែងសុខភាពល្អណាអូនណា Thana Nou »។

កញ្ញា នូ មៈនេត្រអាថាណ្ណា បានចូលបម្រើការងារនៅក្រុមហ៊ុន CBS នៅថ្ងៃទី១ ខែកញ្ញា ឆ្នាំ២០០៩ ក្នុងតួនាទីជាពិធីការនីនៃកម្មវិធីព័ត៌មានពេលព្រឹក។ CNC បានកត់សម្គាល់ផងដែរថាក្នុងនាមជាពិធីការនីមួយរូប កញ្ញា នូ មៈនេត្រអាថាណ្ណា បានបំពេញការងារយ៉ាងល្អ ទទួលបានការគោរពស្រលាញ់ និងកោតសរសើរពីបុគ្គលិកគ្រប់ផ្នែក ព្រមទាំងបានការគាំទ្រពីសំណាក់ទស្សនិកជន៕

អត្ថបទ៖ ចាន់រ៉ា