កំពូលតារាភាពយន្តខ្មែរអ្នកស្រី ឌី​ សាវ៉េត ជំរុញទឹកចិត្តកូនស្រីពៅ បន្តឆន្ទៈលើកស្ទួយសិល្បៈវប្បធម៌ជាតិ

កំពូលតារាភាពយន្តខ្មែរអ្នកស្រី​ ឌី​ សាវ៉េត ទោះបីពេលនេះមានវ័យច្រើនឆ្នាំហើយក៏ពិតមែន តែរហូតមកទល់បច្ចុប្បន្នលោកស្រីក៏នៅតែទទួលបានការគាំទ្រយ៉ាងខ្លាំង ពីសំណាក់មហាជនគ្រប់មជ្ឈដ្ឋានទាំងក្នុង និងក្រៅប្រទេស។

អ្នកស្រី​ ឌី​ សាវ៉េត ត្រូវបានទស្សនិកជនដឹងថា ជា​​​តារា​​ភាព​​យន្តដ៏ល្បីរន្ទឺរបស់ខ្មែរកាល​​ពី​​អំឡុង​​ទស​វត្ស​រ៍​​ទី​​៦០ ​​​និងដើមទសវត្សរ៍ទី៧០។ដោយឡែកងាកចាប់ អារម្មណ៍ទៅលើកូនស្រីពៅរបស់អ្នកស្រី ឌីសាវ៉េត ដែលមានឈ្មោះថា ឌី ហ្សូលី ឯណ្ណោះវិញ ក៏ត្រូវបានទស្សនិកជនសង្កេតឃើញថានាងក៏មានជំនាញ និងឆន្ទៈខ្ពស់លើវិស័យសិល្បៈផងដែរ។

ជាមួយគ្នានេះមានការបង្ហើបឲ្យដឹងដែរថាអ្នកស្រី​ ឌី​ សាវ៉េត​ ដែលជាកំពូលតារាភាពយន្តខ្មែរ​ បើទោះដល់វ័យ ៨០ ជាងក៏ដោយ អ្នកស្រីនៅតែបន្តជំរុញលើកទឹកចិត្តដល់កូនស្រីពៅរបស់អ្នកស្រី ​ក្នុងវិស័យសិល្បៈវប្បធម៌ជាតិ។ ត្រង់ចំណុចនេះហើយ ទើបត្រូវបានគេយល់ថា ពិតជាស្លឹកឈើជ្រុសមិនឆ្ងាយពីគល់មែន ។

ប្រាកដណាស់កញ្ញា ឌី ហ្សូលី ក្រៅតែមានដុងផ្នែកសម្តែងភាពយន្តគឺបច្ចុប្បន្ន​នាងមាន​ក្រុម​សិល្បៈ​របាំ​បុរាណ​មួយ​ក្រុម ហើយ​តែង​តែ​​ឧស្សាហ៍​ចេញ​ច្រៀង​ញឹក​ញាប់តាម​កម្មវិធី​​ជា​ច្រើន ​​ដូច​ជាតាម​មហោស្រព​សិល្បៈ និង​ការ​ឡើង​សម្ដែង​តាម​​កកម្មវិធីសិល្ប:ធំ ៗរបស់​បណ្ដា​ទូរទស្សន៍​មួយ​ចំនួន។

ចំណែកខ្សែភាពយន្តដែលនាងធ្លាប់សម្តែងមានរឿង “ស្នាមសាក់លើស្មា” និងរឿង “ញើសក្រហម” ជាដើម។ សូមបញ្ជាក់ថាទស្សនិកជន និងអ្នកគាំទ្រ ពិតជាបានស្គាល់នូវកេរ្តិ៍ឈ្មោះដ៏ល្បីល្បាញរបស់តារាជើងចាស់អ្នកស្រី ឌី សាវ៉េត ដែលគ្រប់គ្នាចាត់ទុកថាជាវីរសិល្បករដ៏ឆ្នើម និងបានសាងស្នាដៃសិល្ប:ជាច្រើនសម្រាប់ជាគំរូដល់អ្នកសិល្បៈជំនាន់ក្រោយ៕ អត្ថបទ៖ ចាន់រ៉ា