ប្រធានសមាគមសិល្បករខ្មែរ នៅតែបន្តបេសកម្មដឹកនាំសិល្បករសិល្បការិនី សួរសុខទុក្ខវីរកងទ័ព

ប្រធានសមាគមសិល្បករខ្មែរលោកជំទាវអ្នកឧកញ៉ា ម៉ៅ ចំណាន គិតម៉េង បានបន្តបេសកម្មដឹកនាំសិល្បករសិល្បការិនីជាច្រើនរូបជួបសួរសុខទុក្ខវីរ:កងទ័ព ដែលកំពុងព្យាបាលរបួសពីសង្គ្រាមឈ្លានពានរបស់ចោរសៀមនៅមន្ទីរពេទ្យបង្អែកខេត្តសៀមរាប។

សកម្មភាពចុះសួរសុខទុក្ខដែលបាននិងកំពុងបន្តធ្វើដូចភ្លៀងរលឹម គឺនៅរសៀលថ្ងៃទី១៩ ខែសីហា ឆ្នាំ២០២៥ ដោយបាននាំយកនូវសម្លៀកបំពាក់ សម្ភារៈប្រើប្រាស់ និងគ្រឿងឧបភោគបរិភោគ រួមជាមួយនឹងថវិកាមួយចំនួន ដើម្បីឧបត្ថម្ភផ្តល់ជូនដល់វីរ:កងទ័ព ដែលកំពុងសម្រាកព្យាបាលរបួសក្នុងអំឡុង សង្គ្រាមឈ្លានពានរបស់សៀមមកលើប្រទេសកម្ពុជា។

ទន្ទឹមពេលសួរសុខទុក្ខវីរ:កងទ័ពនៅមន្ទីរពេទ្យបង្អែកខេត្តសៀមរាប នោះលោកជំទាវអ្នកឧកញ៉ាម៉ៅ ចំណាន គិតម៉េង ក៏បានរៀបចំនូវសម្លៀកបំពាក់សម្ភារៈប្រើប្រាស់ និងគ្រឿងឧបភោគបរិភោគរួមជាមួយនឹងថវិកាមួយចំនួន ជូនដល់វីរកងទ័ពរងគ្រោះទាំងនោះផងដែរ។

ក្នុងឱកាសនោះ លោកជំទាវអ្នកឧកញ៉ា ម៉ៅ ចំណាន គិតម៉េង បានសម្តែងនូវអារម្មណ៍មោទនភាពយ៉ាងខ្លាំងចំពោះវីរភាពដ៏អស្ចារ្យរបស់កងទ័ព ថា៖ «ពួកយើងពិតជា មានកិត្តិយសនិងមោទនភាពបំផុតចំពោះបងៗកងទ័ពដែលហ៊ានលះបង់គ្រប់បែបយ៉ាងដើម្បីរក្សាការពារដែនដីកម្ពុជា ពីការឈ្លានពានដ៏អាក្រក់បំផុតពីចោរសៀម»៕ ចាន់រ៉ា