ព័ត៌មានអន្ដរជាតិ

កូរ៉េខាងជើងផ្លោងមីស៊ីលបាលិស្ទិក មុនកិច្ចប្រជុំ APEC នៅកូរ៉េខាងត្បូង

បានផុស

៨ ខែ មុន

នៅ

ថ្ងៃពុធ ២២ តុលា ២០២៥

ដោយ

Chheang

យោងតាមយោធាកូរ៉េខាងត្បូង កូរ៉េខាងជើងបានបាញ់មីស៊ីលបាលិស្ទិកឆ្ពោះទៅភាគខាងកើតប្រទេសនាថ្ងៃពុធទី២២ខែតុលានេះ ដែលជាការសាកល្បងអាវុធលើកដំបូងក្នុងរយៈពេលជិត៥ខែ និងប៉ុន្មានថ្ងៃមុនពេលមេដឹកនាំពិភពលោកប្រមូលផ្តុំគ្នាសម្រាប់សន្និសីទសេដ្ឋកិច្ចអាស៊ីប៉ាស៊ីហ្វិក (APEC) នៅទីក្រុង Gyeongju របស់កូរ៉េខាងត្បូង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គសេនាធិការចម្រុះរបស់កូរ៉េខាងត្បូង បានបញ្ជាក់ពីការបាញ់មីស៊ីលនេះ ប៉ុន្តែមិនបានបញ្ចេញព័ត៌មានលម្អិតបន្ថែមនោះទេ រួមទាំងចម្ងាយហោះហើរ ឬរយៈកម្ពស់របស់មីស៊ីល។ ជាធម្មតាទីក្រុងព្យុងយ៉ាងបានបាញ់មីស៊ីលចូលទៅក្នុងដែនទឹករវាងឧបទ្វីបកូរ៉េ និងជប៉ុន ហើយមិនមានរបាយការណ៍ភ្លាមៗអំពីការខូចខាតនោះឡើយ។

ពេលវេលានៃការបាញ់បង្ហោះនេះបានទាក់ទាញការចាប់អារម្មណ៍នៅពេលដែលប្រធានាធិបតីអាមេរិក ដូណាល់ ត្រាំ ប្រធានាធិបតីចិន ស៊ី ជីនពីង ក៏ដូចជាមេដឹកនាំពិភពលោកផ្សេងទៀតត្រៀមខ្លួនចូលរួមកិច្ចប្រជុំកំពូល APEC។ ក្រុមអ្នកវិភាគបានលើកឡើងថា កូរ៉េខាងជើងប្រហែលជាកំពុងស្វែងរកការរំលឹកពិភពលោកអំពីស្ថានភាពនុយក្លេអ៊ែររបស់ខ្លួន និងដើម្បីទទួលបានឥទ្ធិពលសម្រាប់ការចរចានាពេលអនាគត។

មេដឹកនាំកូរ៉េខាងជើង លោក គីម ជុងអ៊ុន បានពន្លឿនការសាកល្បងអាវុធ ចាប់តាំងពីការទូតនុយក្លេអ៊ែររបស់លោកជាមួយលោកត្រាំ បានដួលរលំនៅឆ្នាំ២០១៩ ជុំវិញការដាក់ទណ្ឌកម្មដឹកនាំដោយសហរដ្ឋអាមេរិក។ យ៉ាងណាមិញ លោកគីម ថ្មីៗនេះបានប្រាប់ពីលទ្ធភាពវិលត្រឡប់ទៅកិច្ចចរចាវិញ បើក្រុងវ៉ាស៊ីនតោនបោះបង់ការទាមទាររបស់ខ្លួនសម្រាប់ការរំសាយអាវុធនុយក្លេអ៊ែរ។

កាលពីដើមខែនេះ លោកគីម បានបង្ហាញមីស៊ីលផ្លោងអន្តរទ្វីប Hwasong-20 (ICBM) នៅក្នុងក្បួនព្យុហយាត្រាយោធាប្រារព្ធខួបលើកទី៨០នៃគណបក្សកម្មករដែលកំពុងកាន់អំណាច។ ប្រព័ន្ធផ្សព្វផ្សាយរដ្ឋបានពណ៌នាថា វាជា «ប្រព័ន្ធអាវុធយុទ្ធសាស្ត្រនុយក្លេអ៊ែរដ៏មានឥទ្ធិពលបំផុត»របស់ក្រុងព្យុងយ៉ាង ដែលមានសមត្ថភាពផ្ទុកក្បាលគ្រាប់ជាច្រើន ដើម្បីយកឈ្នះលើប្រព័ន្ធការពារមីស៊ីលរបស់សហរដ្ឋអាមេរិក។

ការផ្លោងមីស៊ីលចុងក្រោយនេះ ធ្វើឡើងបន្ទាប់ពីការបង្ហាញខ្លួននាពេលថ្មីៗនេះរបស់លោកគីម ជាមួយលោក ស៊ី ជីនពីង និងលោក វ៉្លាឌីមៀរ ពូទីន នៅក្នុងក្បួនដង្ហែយោធានៅទីក្រុងប៉េកាំង ដែលជាសញ្ញាមួយសម្រាប់អ្នកវិភាគថា ការកើនឡើងនូវទំនុកចិត្ត និងទម្រង់អន្តរជាតិរបស់ទីក្រុងព្យុងយ៉ាង។ ទាំងលោកត្រាំ និងប្រធានាធិបតីកូរ៉េខាងត្បូង លោក Lee Jae Myung បានបង្ហាញជាសាធារណៈនូវឆន្ទៈក្នុងការជួបលោកគីម ទោះបីជាប្រទេសកូរ៉េខាងជើងនៅតែបន្តពង្រីកឃ្លាំងអាវុធនុយក្លេអ៊ែររបស់ខ្លួនក៏ដោយ៕

ដោយ៖ ឈាង

Related Topics:ប្រទេសកូរ៉េខាងជើង លោក គីម ជុងអ៊ុន

ព័ត៌មានអន្ដរជាតិ២ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៣ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា