វីរុសកូវីដ-១៩បំប្លែងខ្លួនអង់គ្លេស មិនធ្ងន់ធ្ងរដូចការភ័យខ្លាចនោះទេ

យោងតាមការស្រាវជ្រាវដែលចេញផ្សាយក្នុងទស្សនាវដ្តី The Lancet Infectious Disease បានបង្ហាញថា វីរុសកូវីដ-១៩បំប្លែងខ្លួនឆ្លងខ្លាំង ដែលត្រូវបានរកឃើញដំបូងនៅក្នុងចក្រភពអង់គ្លេស គឺមិនបង្កឲ្យមានសភាពធ្ងន់ធ្ងរទេចំពោះអ្នកជំងឺ ដែលសម្រាកព្យាបាលនៅក្នុងមន្ទីរពេទ្យ។

យោងតាមមជ្ឈមណ្ឌលគ្រប់គ្រងនិងបង្ការជំងឺសហរដ្ឋអាមេរិកបានឲ្យដឹងថា វីរុសបំប្លែងខ្លួន B.1.1.7 ត្រូវបានគេរកឃើញនៅចក្រភពអង់គ្លេសកាលពីចុងឆ្នាំមុន ហើយបានក្លាយជាប្រភេទជំងឺទូទៅបំផុតនៅសហរដ្ឋអាមេរិក។

ការសិក្សានៅក្នុងទិនានុប្បវត្តិវេជ្ជសាស្ត្រមួយនេះ បានវិភាគលើអ្នកជំងឺកូវីដមួយក្រុមមានគ្នា ៤៩៦នាក់ ដែលត្រូវបានបញ្ជូនចូលមន្ទីរពេទ្យអង់គ្លេសកាលពីខែវិច្ឆិកានិងខែធ្នូឆ្នាំ បើមុនប្រៀបធៀបជាមួយអ្នកជំងឺដែលឆ្លងវីរុស B.1.1.7 ឬវីរុសបំប្លែងខ្លួនផ្សេងទៀត។

អ្នកស្រាវជ្រាវបានរកឃើញថា មិនមានភាពខុសប្លែកគ្នាទេសម្រាប់ហានិភ័យនៃជំងឺធ្ងន់ធ្ងរ ការស្លាប់ឬលទ្ធផលដទៃទៀតចំពោះអ្នកជំងឺដែលមានផ្ទុក B.1.1.7 និងវីរុសបំប្លែងខ្លួនផ្សេងទៀត។

ក្រុមអ្នកស្រាវជ្រាវបាននិយាយក្នុងការសិក្សានេះថា “ទិន្នន័យរបស់យើងនៅក្នុងបរិបទនិងដែនកំណត់នៃការសិក្សាជាក់ស្តែង បានផ្តល់ការធានាដំបូងថា ភាពធ្ងន់ធ្ងរនៃអ្នកជំងឺដែលសម្រាកព្យាបាលនៅក្នុងមន្ទីរពេទ្យជាមួយ B.1.1.7 គឺមិនមានអ្វីខុសប្លែកគ្នាពីភាពធ្ងន់ធ្ងរចំពោះអ្នកដែលមិនមានវីរុសបំប្លែងខ្លួនប្រភេទនេះនោះទេ”។

ការសិក្សាដាច់ដោយឡែកមួយទៀត ដែលត្រូវបានចេញផ្សាយនៅក្នុងទិនានុប្បវត្តិវេជ្ជសាស្រ្តសុខភាពសាធារណៈ Lancet បានរកឃើញថា​ វ៉ាក់សាំងទំនងជាមានប្រសិទ្ធភាពប្រឆាំងនឹងវីរុសបំប្លែងខ្លួនអង់គ្លេស ចាប់តាំងពីមិនមានការកើនឡើងនូវអត្រាលាប់ជំងឺ បើប្រៀបធៀបទៅវីរុសបំប្លែងខ្លួនផ្សេងទៀត៕

ប្រែសម្រួលដោយ៖ Vann Vann

ប្រភព៖ VN Express

ចុចអាន៖ វីរុសបំប្លែងខ្លួន ៤,០០០ប្រភេទ កំពុងអុកឡុក ពិភពលោក