ពិភពលោកកំពុងប្រឈមមុខនឹងវីរុសបម្លែងខ្លួន ៤,០០០ប្រភេទ

ចក្រភពអង់គ្លេសបាននិយាយនៅថ្ងៃសុក្រនេះថា ពិភពលោកកំពុងប្រឈមមុខនឹងវីរុសបម្លែងខ្លួន៤,០០០ប្រភេទដែលបណ្តាលឲ្យមានជំងឺកូវីដ១៩ ដែលជាហេតុជំរុញឲ្យមានកិច្ចខិតខំប្រឹងប្រែងក្នុងការធ្វើឲ្យវ៉ាក់សាំងកាន់តែប្រសើរឡើង។

វីរុសរាប់ពាន់ប្រភេទត្រូវបានគេកត់ត្រាថាមានបម្រែបម្រួលរួមទាំងវីរុសចក្រភពអង់គ្លេស ​អាហ្រ្វិកខាងត្បូងនិងប្រេស៊ីលដែលរីករាលដាលឆាប់រហ័សជាងវីរុសដទៃផងដែរ។

រដ្ឋមន្រ្តីក្រសួងដាក់ពង្រាយវ៉ាក់សាំងអង់គ្លេសលោក Nadhim Zahawi បាននិយាយថា វាមិនទំនងនោះទេដែលថា វ៉ាក់សាំងបច្ចុប្បន្ននឹងមិនមានប្រសិទ្ធភាពប្រឆាំងនឹងវីរុសបម្លែងខ្លួនថ្មី។

លោក Zahawi បានប្រាប់ Sky News ថា “ក្រុមហ៊ុនផលិតវ៉ាក់សាំង Pfizer-BioNTech, Moderna, Oxford-AstraZeneca និងក្រុមហ៊ុនដទៃទៀត កំពុងពិនិត្យមើលវិធីដែលពួកគេអាចធ្វើឲ្យប្រសើរឡើងនូវវ៉ាក់សាំងរបស់ពួកគេដើម្បីបញ្ជាក់ឲ្យប្រាកដថា យើងត្រៀមខ្លួនរួចរាល់សម្រាប់វីរុសណាមួយ”។

យោងតាមទស្សនាវដ្តីវេជ្ជសាស្ត្រអង់គ្លេសបានឲ្យដឹងថា ខណៈពេលដែលបម្រែបម្រួលរាប់ពាន់បានកើតឡើងនៅពេលវីរុសផ្លាស់ប្តូរការចម្លង មានតែវីរុសតិចតួចប៉ុណ្ណោះដែលសំខាន់និងផ្លាស់ប្តូរវីរុសតាមរបៀបដែលអាចគេមើលឃើញ។

គួរបញ្ជាក់ថា វីរុសកូរ៉ូណាឬគេស្គាល់ថា SARS-CoV-2 បានសម្លាប់មនុស្សចំនួន២.២៦៨លាននាក់នៅទូទាំងពិភពលោក ចាប់តាំងពីវាបានលេចចេញមកនៅក្នុងប្រទេសចិនកាលពីចុងឆ្នាំ២០១៩៕

ប្រែសម្រួលដោយ៖ Vann Vann

ប្រភព៖ Reuters

ចុចអាន៖ ទ្វីបអាមេរិក កំពុងរងការវាយលុកដោយវីរុសបម្លែងខ្លួនថ្មី ៣ប្រភេទ