យុវតី Kim Ju Ae ឡើងកាន់តំណែងជាមេដឹកនាំលេខ២ របស់កូរ៉េខាងជើង

នយោបាយ​នា​ពេល​អនាគតរបស់កូរ៉េខាងជើងកាន់តែលេច​​ឡើង​​ច្បាស់ ហើយយោងតាមរបាយការណ៍ថ្មីៗនេះ កូនស្រី​របស់លោក គីម ជុងអ៊ុន មិនមែនគ្រាន់តែជាអ្នកសិក្សាពីអំណាចទៀតនោះទេ។

យោងតាមទីភ្នាក់ងារស៊ើបការណ៍សម្ងាត់ជាតិកូរ៉េខាងត្បូង (NIS) យុវតី Kim Ju Ae ត្រូវបានផ្លាស់ប្តូរស្ថានភាពពី «អ្នកកំពុងសិក្សាដើម្បីបន្តវេន» ទៅជា «អ្នកដែលត្រូវបានតែងតាំងផ្ទៃក្នុង» ជាអ្នកបន្តតំណែងពីឪពុករបស់នាង។ ក្រុមសមាជិកសភា​កូរ៉េ​ខាង​ត្បូង​ដែលទទួលបានការសង្ខេបព័ត៌មាន​​ចារកម្ម​នា​ថ្ងៃព្រហស្បតិ៍​ទី​១២​ខែ​កុម្ភៈ​ឆ្នាំ​២០២៦ បានបង្ហើបថា យុវតីរូបនេះត្រូវបានគេចាត់ទុកថាជាមេដឹកនាំលំដាប់ទី២ជាក់ស្តែងនៅក្នុងប្រទេស ហើយថែមទាំងបានចាប់ផ្តើមផ្តល់យោបល់លើបញ្ហានយោបាយជាតិទៀតផង។

ការឡើងកាន់អំណាចរបស់ Ju Ae ត្រូវបានរៀបចំឡើងយ៉ាងសម្រិតសម្រាំងតាមរយៈការបង្ហាញខ្លួនក្នុងប្រព័ន្ធផ្សព្វផ្សាយរដ្ឋ ដែលគេតែងតែឃើញនាងចុះត្រួតពិនិត្យគម្រោងអាវុធជាមួយឪពុករបស់នាង។ ឥឡូវនេះ ពិភពលោកកំពុងតាមដានយ៉ាងយកចិត្តទុកដាក់ចំពោះមហាសន្និបាតលើកទី៩ នៃគណបក្សពលករដែលនឹងប្រព្រឹត្តទៅនៅចុងខែកុម្ភៈ ដើម្បីមើលថាតើនាងនឹងត្រូវផ្តល់គោរម្យងារផ្លូវការណាមួយ ដែលនឹងបញ្ជាក់ពីស្ថានភាពរបស់នាងជាមេដឹកនាំជំនាន់ទី៤ នៃត្រកូលគីមដែរឬទេ។

ខណៈពេលដែលកូនស្រី​ផ្តោតលើនយោបាយ ឪពុកនៅតែបន្តពង្រឹងកម្លាំងយោធា។ របាយការណ៍របស់ NIS ក៏បានលម្អិតអំពីមហិច្ឆតាយោធាចុងក្រោយរបស់លោក គីម ជុងអ៊ុន គឺនាវាមុជទឹកខ្នាតយក្សទម្ងន់ ៨៧០០តោន។ នាវានេះត្រូវបានរចនាឡើងដើម្បីផ្ទុកមីស៊ីលបាលីស្ទិកបានរហូតដល់១០គ្រាប់ ហើយតាមរយៈទំហំដ៏ធំសម្បើមនេះ វាត្រូវបានគេសង្ស័យថាអាចនឹងប្រើប្រាស់ថាមពលនុយក្លេអ៊ែរ៕

ប្រែសម្រួល៖ ឈាង