អាមេរិក ចល័តទ័ពជាង១០ ០០០នាក់, នាវា១២គ្រឿង និងយន្តហោះជាង១០០ គ្រឿង ដើម្បីបិទខ្ទប់ផ្លូវទឹកអ៊ីរ៉ង់

តាមការបញ្ជាក់ពីបញ្ជាការដ្ឋានកណ្តាលសហរដ្ឋអាមេរិក (CENTCOM), គិតត្រឹមថ្ងៃសុក្រទី១៧ខែមេសាឆ្នាំ២០២៦ ទីក្រុងវ៉ាស៊ីនតោន បានចល័តទ័ពជាង១០ ០០០នាក់, នាវាជើងទឹក ១២គ្រឿង និងយន្តហោះជាង១០០ គ្រឿង ដើម្បីអនុវត្តការបិទខ្ទប់ផ្លូវទឹកនៅតាមបណ្តោយឆ្នេរសមុទ្ររបស់ប្រទេសអ៊ីរ៉ង់។

គេហទំព័រ Open The Magazine ផ្សាយថា ប្រតិបត្តិការនេះគឺដឹកនាំដោយនាវាផ្ទុកយន្តហោះដើរដោយថាមពលនុយក្លេអ៊ែរ USS Abraham Lincoln (CVN 72) នៅក្នុងសមុទ្រអារ៉ាប់ ដោយមានការគាំទ្រពីនាវាពិឃាតបំពាក់មីស៊ីលនាំផ្លូវ ដូចជា USS Delbert D. Black (DDG 119) ជាដើម។

យ៉ាងណា CENTCOM បញ្ជាក់ច្បាស់ថា ការបិទខ្ទប់នេះផ្តោតសំខាន់លើកំពង់ផែនិងឆ្នេរសមុទ្រអ៊ីរ៉ង់តែប៉ុណ្ណោះ ពោលគឺមិនមែនបិទខ្ទប់ច្រក Hormuz ទេ ហើយសេរីភាពនៃការធ្វើនាវាចរណ៍សម្រាប់កប៉ាល់ដែលឆ្លងកាត់ទៅកាន់កំពង់ផែដែលមិនមែនជារបស់អ៊ីរ៉ង់ នៅតែត្រូវបានអនុវត្ត។

ជុំវិញរឿងនេះ លោក Dan Caine ប្រធានអគ្គសេនាធិការចម្រុះអាមេរិក បានថ្លែងថា ការបិទខ្ទប់គឺត្រូវបានអនុវត្តចំពោះគ្រប់កប៉ាល់ដោយមិនគិតពីសញ្ជាតិឡើយ ប្រសិនបើពួកគេធ្វើដំណើរទៅកាន់ ឬចាកចេញពីកំពង់ផែអ៊ីរ៉ង់ ហើយបើពួកគេព្យាយាមដឹកប្រេងចេញពីអ៊ីរ៉ង់ នោះក្រុមប្រដេញនឹងធ្វើប្រតិបត្តិការភ្លាម។

យោងតាមប្រភពក្រៅផ្លូវការ គិតត្រឹមពេលនេះគ្មានកប៉ាល់ណាមួយអាចទម្លុះការបិទខ្ទប់បានដោយជោគជ័យឡើយ ខណៈក្នុងរយៈពេលប៉ុន្មានថ្ងៃដំបូង កប៉ាល់ពាណិជ្ជកម្ម១៤គ្រឿង បានអនុវត្តតាមការណែនាំរបស់សហរដ្ឋអាមេរិកឲ្យត្រឡប់ក្រោយវិញ ជាជាងត្រូវប្រឈមមុខនឹងការស្ទាក់ចាប់។

ការបិទខ្ទប់នេះ កើតឡើងបន្ទាប់ពីការដួលរលំនៃកិច្ចចរចាការទូតនៅទីក្រុងអ៊ីស្លាម៉ាបាដ ប្រទេសប៉ាគីស្ថាន ហើយកំពុងកើតឡើងចំពេលមានបទឈប់បាញ់ដ៏ផុយស្រួយក្នុងជម្លោះដ៏ធំមួយនេះ៕

អត្ថបទ៖ សុខ សុវណ្ណ