ចិន ធ្វើសេចក្តីព្រាងច្បាប់ ដាក់ទោសទណ្ឌឪពុកម្តាយ បើកូន ប្រព្រឹត្តអាកប្បកិរិយាអាក្រក់

សភាចិន នឹងពិចារណាលើច្បាប់ដាក់ទោសទណ្ឌឪពុកម្តាយ ប្រសិនបើកូនៗរបស់ពួកគេ បង្ហាញ “អាកប្បកិរិយាអាក្រក់” ឬប្រព្រឹត្តអំពើឧក្រិដ្ឋកម្ម។

នៅក្នុងសេចក្តីព្រាងច្បាប់ស្តីពីការលើកកម្ពស់ការអប់រំគ្រួសារ, អាណាព្យាបាលនឹងត្រូវស្តីបន្ទោសនិងបញ្ជាឲ្យឆ្លងកាត់កម្មវិធីណែនាំការអប់រំគ្រួសារ ប្រសិនបើរដ្ឋអាជ្ញារកឃើញអាកប្បកិរិយាអាក្រក់ ឬឧក្រិដ្ឋកម្មដែលប្រព្រឹត្តដោយកុមារ ស្ថិតនៅក្រោមការមើលថែរបស់ពួកគេ។

លោក Zang Tiewei អ្នកនាំពាក្យគណៈកម្មការកិច្ចការនីតិកម្ម នៅក្រោមសមាជជាតិប្រជាជនចិន (NPC) បាននិយាយថា “មានហេតុផលជាច្រើន ដែលធ្វើឲ្យក្មេងជំទង់ប្រព្រឹត្តខុស ហើយកង្វះឬការអប់រំគ្រួសារមិនសមរម្យ គឺជាបុព្វហេតុចម្បង”។

សេចក្តីព្រាងច្បាប់នេះ នឹងត្រូវពិនិត្យឡើងវិញនៅសម័យប្រជុំគណៈកម្មាធិការអចិន្ត្រៃយ៍ NPC នៅសប្តាហ៍នេះ ក៏ជំរុញឲ្យឪពុកម្តាយ រៀបចំពេលវេលាសម្រាប់កូនៗរបស់ពួកគេ ឲ្យសម្រាក លេងកម្សាន្តនិងហាត់ប្រាណផងដែរ។

គួរបញ្ជាក់ថា នៅឆ្នាំនេះ ទីក្រុងប៉េកាំងបានអនុវត្តវិធានការតឹងរ៉ឹងលើកុមារ ដូចជាការរឹតបណ្តឹងលើការលេងហ្គេមតាមអនឡាញជាដើម។

ក្នុងរយៈពេលប៉ុន្មានខែចុងក្រោយនេះ ក្រសួងអប់រំបានកំណត់ម៉ោងលេងហ្គេមសម្រាប់អនីតិជន ដោយអនុញ្ញាតឲ្យពួកគេលេងហ្គេមអនឡាញរយៈពេលមួយម៉ោងតែនៅថ្ងៃសុក្រ ថ្ងៃសៅរ៍និងថ្ងៃអាទិត្យប៉ុណ្ណោះ។

ក្រសួងក៏បានកាត់បន្ថយការធ្វើកិច្ចការផ្ទះ និងហាមឃាត់ការបង្រៀនក្រោយចេញពីសាលា សម្រាប់មុខវិជ្ជាសំខាន់ៗនៅចុងសប្តាហ៍និងថ្ងៃឈប់សម្រាកផងដែរ ដោយព្រួយបារម្ភអំពីបន្ទុកការសិក្សាធ្ងន់ធ្ងរពេកលើកុមារ៕

ប្រែសម្រួល៖ Vann Vann

ប្រភព៖ CNA

ចុចអាន៖ ចិន បើកដំណើរការវេបសាយការពារកុមារកុំឲ្យញៀនហ្គេមអនឡាញ មួយសប្ដាហ៍លេងបានតែ ៣ ម៉ោងប៉ុណ្ណោះ