ថៃ ​​នឹង​សាងសង់​ស្ពាន​កាត់ទន្លេមេគង្គភ្ជាប់ទៅផ្លូវរថភ្លើង ឡាវ-ចិន (មានវីដេអូ)

ក្រសួងដឹកជញ្ជូនរបស់ប្រទេសថៃកំពុងរៀបចំផែនការសិក្សាលទ្ធភាព និងការរចនាសាងសង់ស្ពានថ្មីឆ្លងកាត់ទន្លេមេគង្គ ដែលជាផ្នែកមួយទៀតក្នុងដំណាក់កាលទីបីនៃគម្រោងរថភ្លើងល្បឿនលឿនថៃ-ឡាវ-ចិន ។

រដ្ឋមន្ត្រីក្រសួងដឹកជញ្ជូនលោក Saksayam Chidchob បាននិយាយថា ស្ពានទី ៧ ដែលតភ្ជាប់ទីក្រុង Nong Khai ជាមួយទីក្រុងវៀងចន្ទន៍ ដែលត្រូវបានគេស្គាល់ថាជាស្ពានមិត្តភាពថៃ-ឡាវ ទី ២ ត្រូវបានរៀបចំឡើងដើម្បីផ្ទុកការដឹកជញ្ជូនទាំងផ្លូវដែក និងផ្លូវថ្នល់ ។

លោកបានបន្ថែមថា នាយកដ្ឋានផ្លូវហាយវេនឹងទទួលបន្ទុកលើការសិក្សារចនា ដែលត្រូវបានប៉ាន់ប្រមាណថានឹងត្រូវចំណាយអស់ប្រហែល ១៤០ លានបាត (៤.២៥ លានដុល្លារអាមេរិក) ពីថវិកាកណ្តាល ។

យោងតាមលោក Saksayam បានឲ្យដឹងថា ការចំណាយលើការសាងសង់ស្ពាន និងបណ្តាញផ្លូវតូចត្រូវបានប៉ាន់ប្រមាណថាមានចំនួន ៤ ពាន់លានបាត ដែលទំនងជានឹងត្រូវបែងចែករវាងប្រទេសថៃ និងឡាវ ហើយបញ្ហានេះនឹងត្រូវពិភាក្សាដោយគណៈកម្មាធិការចម្រុះថៃ-ឡាវ ។

លោករដ្ឋមន្ត្រីបាននិយាយថា គម្រោងសាងសង់ស្ពានត្រូវតែបញ្ចប់មុនពេលគម្រោងរថភ្លើងល្បឿនលឿនដំណាក់កាលទី ២ បើកដំណើរការនៅឆ្នាំ ២០២៨ ។ លោក​បន្ត​ថា ការ​សិក្សា​លើ​ស្ពាន​ថ្មី​ដែល​មាន​ចម្ងាយ ​៥០​ ម៉ែត្រ​ពី​ស្ពាន​មិត្តភាព​ ថៃ-ឡាវ នឹង​ប្រើ​ពេល ​១ ​ឆ្នាំ​ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Vietnam Plus

ចុចអាន ៖ ថៃ ប្រើឆ្កែហិតក្លិនសាច់ជ្រូក ការពារការរត់ពន្ធសាច់ពី ឡាវ