ព័ត៌មានអន្ដរជាតិ

បារម្ភខ្លាំងពេក មេ UN ថាឲ្យភាគីពាក់ព័ន្ធវិបត្តិអ៊ុយក្រែនដល់ពេលបញ្ឈប់ហើយ

បានផុស

៤ years មុន

នៅ

ថ្ងៃអង្គារ ១៥ កុម្ភៈ ២០២២

ដោយ

អគ្គលេខាធិការអង្គការសហប្រជាតិ លោក Antonio Guterres កាលពីថ្ងៃចន្ទ បានព្រមានថា វាគឺជាពេលដែលត្រូវបន្ធូរបន្ថយភាពតានតឹងរវាងរុស្ស៊ី និងប្រទេសលោកខាងលិចជុំវិញវិបត្តិនៅអ៊ុយក្រែនហើយ។

លោកមានប្រសាសន៍ថា លោកព្រួយបារម្ភយ៉ាងជ្រាលជ្រៅអំពីការគំរាមកំហែងនៃជម្លោះ។ លោកថា ៖«ឥឡូវនេះ ដល់ពេលត្រូវបន្ធូរបន្ថយភាពតានតឹង និងកាត់បន្ថយសកម្មភាពដំឡើងសាច់ដុំដាក់គ្នានៅសមរភូមិហើយ»។ នេះជាប្រសាសន៍របស់លោកទៅកាន់រដ្ឋមន្ត្រីក្រសួងការបរទេសរុស្ស៊ី និងអ៊ុយក្រែន ព្រមទាំងបង្ហាញពីកង្វល់ដ៏ធ្ងន់ធ្ងររបស់លោកជុំវិញស្ថានភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអំពាវនាវឲ្យបញ្ឈប់វោហាសាស្ត្រដុតកម្តៅស្ថានការណ៍ លោកអគ្គលេខាធិការអង្គការសហប្រជាជាតិបានប្រាប់អ្នកកាសែតថា ៖«ខ្ញុំព្រួយបារម្ភខ្លាំងណាស់ពីភាពតានតឹង និងការរំពឹងទុកបានកើនឡើងអំពីជម្លោះយោធាដ៏អាក្រក់នៅអឺរ៉ុប»។

«យើងគ្រាន់តែមិនអាចទទួលយកសូម្បីតែលទ្ធភាពនៃការប្រឈមមុខគ្នាដ៏មហន្តរាយបែបនេះ» លោកមានប្រសាសន៍ និងទទួចថា «គ្មានជម្រើសអ្វី ក្រៅពីការទូតឡើយ»។

លោក Guterres បានអំពាវនាវឲ្យភាគីទាំងអស់គោរពធម្មនុញ្ញអង្គការសហប្រជាជាតិ និងជៀសវាងការគំរាមកំហែង ឬការប្រើប្រាស់កម្លាំងប្រឆាំងនឹងបូរណភាពទឹកដី ឬឯករាជ្យភាពនយោបាយនៃរដ្ឋណាមួយ។

លោកបន្តថា ៖«ការបោះបង់ផ្លូវការទូតចោលដើម្បីប្រឈមមុខដាក់គ្នា មិនមែនជាជំហានលើផ្លូវដើរនោះទេ វាគឺជាការលោតចុះពីលើច្រាំងថ្មចោទទៅវិញ»៕

ប្រែសម្រួល៖ វីរបុត្រ
ប្រភព៖ AFP