លោក គីម ជុងអ៊ុន ផ្ដល់ផ្ទះថ្មីសន្លាងដល់អ្នកព័ត៌មានជើងចាស់

មេដឹកនាំកូរ៉េខាងជើងលោក គីម ជុងអ៊ុន បានផ្តល់រង្វាន់ដល់អ្នកអានព័ត៌មានទូរទស្សន៍រដ្ឋជើងចាស់មួយរូប និងអ្នកគាំទ្រផ្សេងទៀតជាមួយនឹងផ្ទះថ្មីសម្រាប់ការរួមចំណែករបស់ពួកគេក្នុងការលើកស្ទួយប្រទេស ។

កាសែត Rodong Sinmun របស់គណបក្សពលករដែលកំពុងកាន់អំណាចរបស់ប្រទេសបានរាយការណ៍នៅថ្ងៃព្រហស្បតិ៍នេះថា លោក គីម ក៏បានចូលរួមក្នុងពិធីសម្ពោធផ្ទះនៅរដ្ឋធានីព្យុងយ៉ាងកាលពីថ្ងៃពុធ ហើយផ្ទះ​ទាំង​នោះ​ត្រូវ​គេដឹង​ថា ​រចនាឡើង​ដោយមេ​អ្នក​ដឹកនាំរូបនេះ​ផ្ទាល់តែម្ដង ។

ទន្ទឹមនោះ កាសែត Rodong Sinmun ក៏បានបង្ហាញរូបថតរបស់លោក គីម និងពិធីការិនីទូរទស្សន៍លោកស្រី Ri Chun Hi កាន់ដៃគ្នានៅខាងក្នុងផ្ទះថ្មីនោះផងដែរ ។

បន្ថែមពីនេះលោក គីម ធ្លាប់បានសរសើរលោកស្រីអស់រយៈពេលជាង ៥០ ឆ្នាំនៃការងារកាន់មីក្រូហ្វូនមួយនេះ ហើយបានហៅលោកស្រីថាជាទ្រព្យសម្បត្តិជាតិ ។

លោកស្រី Ri ក៏បានផ្តល់ព័ត៌មានសំខាន់ៗនៅលើកញ្ចក់ទូរទស្សន៍រដ្ឋអស់រយៈពេលជាច្រើនឆ្នាំ រួមទាំងសកម្មភាពរបស់មេដឹកនាំប្រទេសផងដែរ ជាពិសេសលោកស្រីបានប្រកាសពីការស្លាប់ឪពុករបស់លោក គីម ជុងអ៊ុន គឺលោក គីម ជុងអ៊ីល និងជីតា គីម អ៊ីលសុង ហើយលោកស្រីក៏បានអានរបាយការណ៍ព័ត៌មានអំពីសកម្មភាពអភិវឌ្ឍនុយក្លេអ៊ែ និងមីស៊ីលរបស់ប្រទេសផងដែរ ។

គួរបញ្ជាក់ថា ការ​បញ្ចប់ការសាងសង់​ផ្ទះ​ថ្មី​នេះ​ធ្វើ​ឡើង​នៅ​មុន​ខួប​គម្រប់​ ១១០ ​ឆ្នាំ​នៃ​ថ្ងៃ​កំណើត​របស់​ស្ថាបនិក​ប្រទេស​គឺលោក គីម អ៊ីលសុង នៅ​ថ្ងៃ​សុក្រស្អែកនេះ ៕

ប្រែសម្រួលដោយ ៖ ជីវ័ន្ត

ប្រភព ៖ NHK