រថយន្តក្រុងបុករថយន្តដឹកសាំងនៅឥណ្ឌា ស្លាប់និងរបួសមនុស្សជាង៣០នាក់

ប៉ូលិសបាននិយាយថា មនុស្សយ៉ាងតិច៧នាក់ត្រូវស្លាប់និង២៥នាក់ផ្សេងទៀតរងរបួសនៅថ្ងៃពុធនេះនៅពេលរថយន្តក្រុងដឹកអ្នកដំណើរមួយគ្រឿងបុកជាមួយរថយន្តដឹកសាំងក្នុងរដ្ឋ Uttar Pradesh ភាគខាងជើងប្រទេសឥណ្ឌា។

គ្រោះថ្នាក់នេះបានកើតឡើងក្នុងតំបន់ Dhanari នៃស្រុក Sambhal ដែលមានចម្ងាយប្រហែល៣៧៤គីឡូម៉ែត្រភាគពាយព្យទីក្រុង Lucknow រដ្ឋ Uttar Pradesh។

មន្រ្តីប៉ូលិសជាន់ខ្ពស់លោក Chakresh Mishra បាននិយាយថា “នៅថ្ងៃនេះ រថយន្តក្រុងបានបុកគ្នាជាមួយរថយន្តដឹកសាំងនៅលើផ្លូវ Agra-Moradabad ដែលបណ្តាលឲ្យមនុស្ស៧នាក់ស្លាប់និង២៥នាក់ផ្សេងទៀតរងរបួស។ ដោយសារស្ថានភាពធ្ងន់ធ្ងរនៃអ្នករងរបួស ចំនួនអ្នកស្លាប់អាចកើនឡើងជាបន្តទៀត”។

អ្នករងរបួសត្រូវបានបញ្ជូនទៅកាន់មន្ទីរពេទ្យដែលនៅជិតបំផុត។

គ្រោះថ្នាក់ចរាចរណ៍រវាងរថយន្តទាំងពីរនេះត្រូវបានគេសន្និដ្ឋានថាបណ្តាលមកពីមានអ័ព្ទដ៏ក្រាស់នៅក្នុងតំបន់ហើយប៉ូលិសកំពុងបើកការស៊ើបអង្កេត៕

ប្រែសម្រួលដោយ៖ Vann Vann

ប្រភព៖ Xinhua

ចុចអាន៖ ផ្ទុះជំងឺចម្លែកក្នុងប្រទេសឥណ្ឌា ស្លាប់ម្នាក់និងរាប់រយនាក់ធ្លាក់ខ្លួនឈឺ

ចុចអាន៖ ឥណ្ឌា កោះហៅឯកអគ្គរាជទូត កាណាដា បន្ទាប់ពីលោក Trudeau លូកដៃក្នុងរឿងបាតុកម្មរបស់កសិករ