ម្នាក់ទៀតហើយ មានប្រតិកម្មបន្ទាប់ពីចាក់វ៉ាក់សាំងកូវីដនៅអាមេរិក

មន្ត្រីសុខាភិបាលនៅ Alaska បានរាយការណ៍ថា បុគ្គលិកថែទាំសុខភាពទី២មានប្រតិកម្មបន្ទាប់ពីចាក់វ៉ាក់សាំងការពារជំងឺកូវីដ-១៩។

មន្ទីរពេទ្យក្នុងតំបន់ Bartlett និយាយថា បុគ្គលិកទាំងពីរនាក់បានបង្ហាញប្រតិកម្មប្រហែល១០នាទីបន្ទាប់ពីទទួលថ្នាំបង្ការហើយត្រូវបានគេព្យាបាល។ មនុស្សម្នាក់បានទទួលវ៉ាក់សាំងកាលពីថ្ងៃអង្គារហើយនឹងស្នាក់នៅក្នុងមន្ទីរពេទ្យមួយយប់ទៀតដោយស្ថិតក្រោមការតាមដានខណៈម្នាក់ទៀតដែលត្រូវបានចាក់វ៉ាក់សាំងកាលពីថ្ងៃពុធគឺបានជាសះស្បើយហើយ។

ទោះបីជាយ៉ាងណាក៏ដោយ មន្ត្រីសុខាភិបាលរដ្ឋ Alaska នៅតែអះអាងថា ខ្លួននឹងមិនមានការផ្លាស់ប្តូរផែនការចែកចាយវ៉ាក់សាំងទេបន្ទាប់ពីរឿងនេះកើតឡើង។

គួរបញ្ជក់ថា បុគ្គលិកថែទាំសុខភាពម្នាក់ក្នុងរដ្ឋ Alaska ទទួលរងប្រតិកម្មធ្ងន់ធ្ងរបន្ទាប់ពីចាក់វ៉ាក់សាំងការពារជំងឺកូវីដ១៩របស់ក្រុមហ៊ុន Pfizer កាលពីថ្ងៃពុធ។

បុគ្គលិកថែទាំសុខភាពដែលត្រូវបានគេស្គាល់ថាជាស្ត្រីវ័យកណ្តាលគឺមានប្រតិកម្មអាឡ័កស៊ីដូចជាមុខឡើងក្រហមនិងពិបាកដកដង្ហើមរយៈពេល១០នាទី បន្ទាប់ពីការចាក់វ៉ាក់សាំងលើកដំបូងរបស់ក្រុមហ៊ុន Pfizer៕

ប្រែសម្រួលដោយ៖ Vann Vann

ប្រភព៖ AP