រងទុក្ខដោយសារកូវីដហើយ ពេលនេះប្រជាជនអាមេរិកត្រូវស្លាប់ដោយសារព្យុះទឹកកកទៀត

ប៉ុស្តិ៍ទូរទស្សន៍អាកាសធាតុសហរដ្ឋអាមេរិកបានរាយការណ៍នៅថ្ងៃសុក្រនេះថា មនុស្សចំនួន៥នាក់ហើយបានស្លាប់បន្ទាប់ពីព្យុះទឹកកកវាយប្រហារភាគឦសានសហរដ្ឋអាមេរិកនៅសប្តាហ៍នេះ។

ស្របពេលជាមួយគ្នានោះ មនុស្សជាង៧ម៉ឺននាក់ត្រូវគ្មានអគ្គិសនីប្រើប្រាស់នៅព្រឹកថ្ងៃព្រហស្បតិ៍ដោយសារតែការកាត់ផ្តាច់ជាសាធារណៈ។ មានករណីគ្រោះថ្នាក់ចរាចរណ៍នៃរថយន្តរាប់រយគ្រឿងត្រូវបានគេរាយការណ៍ពីតំបន់ពាក់កណ្តាលអាត្លង់ទិកដល់ភាគឦសាន។

ទន្ទឹមនេះ យន្តហោះមួយគ្រឿងរបស់ក្រុមហ៊ុនអាកាសចរណ៍ Spirit Airlines បានរអិលធ្លាក់ផ្លូវបន្ទាប់ពីចុះចតដោយសុវត្ថិភាពនៅអាកាសយានដ្ឋាន BWI Marshall ក្នុងទីក្រុង Baltimore នៃរដ្ឋ Maryland។ ទោះបីជាយ៉ាងណាក៏ដោយ គ្មានមនុស្សណាម្នាក់ក្នុងចំណោមអ្នកទាំង១១១នៅលើយន្តហោះរងរបួសនោះទេ។

ដោយសារតែព្យុះនេះ ជើងហោះហើរចំនួន៧៧០ត្រូវបានលុបចោលកាលពីថ្ងៃពុធនិងជាង៦០០ជើងត្រូវបានលុបចោលកាលពីថ្ងៃព្រហស្បតិ៍៕

ប្រែសម្រួលដោយ៖ Vann Vann

ប្រភព៖ Xinhua

ចុចអាន៖ សហរដ្ឋអាមេរិកប្រកាសអាសន្នមួយទៀតក្រៅពីកូវីដ មនុស្សជាង៦០លាននាក់អាចប៉ះពាល់

ចុចអាន៖ ជំនិតលោក Biden តេស្តវិជ្ជមានកូវីដ-១៩