ត្រីបាឡែនប្រហែល ២០០ ក្បាលងាប់នៅលើឆ្នេរ អូស្ត្រាលី

ក្រុមអ្នកជួយសង្គ្រោះអូស្ត្រាលីបាននិយាយនៅថ្ងៃព្រហស្បតិ៍នេះថា ត្រីបាឡែនប្រភេទ Pilot Whales ប្រហែល ២០០ ក្បាលបានងាប់ បន្ទាប់ពីបានជាប់គាំងនៅលើឆ្នេរខ្សាច់ដែលលាតសន្ធឹងលើឆ្នេរសមុទ្រភាគខាងលិចរដ្ឋ Tasmania ។

យោងតាមសេវាកម្មសត្វព្រៃរបស់រដ្ឋបានឲ្យដឹងថា មានតែត្រីបាឡែន ៣៥ ក្បាលប៉ុណ្ណោះក្នុងចំណោមត្រីបាឡែនប្រហែល ២៣០ ក្បាលនៅរស់រានមានជីវិតតាមបណ្តោយឆ្នេរខ្សាច់ Ocean Beach ដែលជាខ្សែទឹករបស់មហាសមុទ្រភាគខាងត្បូង ។

លោក Brendon Clark អ្នកគ្រប់គ្រងប្រតិបត្តិការសត្វព្រៃរបស់រដ្ឋបាននិយាយថា “យើងមានសត្វដែលនៅរស់រានមានជីវិតប្រហែល ៣៥ ក្បាលនៅលើឆ្នេរ ហើយនៅពេលនេះគឺយើងនឹងផ្តោតលើការជួយសង្គ្រោះ និងបញ្ជូនសត្វទាំងនេះចូលក្នុងទឹកវិញ” ។

លោក​បាន​បន្ថែម​ថា “​ទោះយ៉ាងណា ជា​អកុសល យើងបានឃើញត្រីបាឡែនងាប់ច្រើនជាងត្រីដែលនឹងត្រូវជួយសង្គ្រោះ” ។ លោកបានប្រាប់ថា លក្ខខណ្ឌបរិស្ថាន ក៏ដូចជាការជិះទូកលេងនៅលើឆ្នេរសមុទ្រភាគខាងលិច Ocean Beach គឺជាហេតុផលមួយធ្វើឲ្យប៉ះពាល់ដល់សត្វទាំងនេះ ។

ដោយឡែកកាលពី ២ ឆ្នាំមុននៅក្បែរទីក្រុងកំពង់ផែ Macquarie Harbor ក៏មានត្រីបាឡែនប្រភេទ Pilot Whales ជិត ៥០០ ក្បាលបានជាប់គាំងលើឆ្នេរខ្សាច់ផងដែរ ហើយវាជាការជាប់គាំងដ៏ធំបំផុតដែលមិនធ្លាប់មានរបស់ប្រទេសនេះ ។

ក្នុងអំឡុងពេលដែលជាប់គាំងនោះ ត្រីបាឡែនជាង ៣០០ ក្បាលបានងាប់ បើទោះបីជាមានការខិតខំប្រឹងប្រែងជួយសង្គ្រោះ និងបញ្ជូនពួកវាចូលទៅក្នុងទឹកពីសំណាក់អ្នកស្ម័គ្រចិត្តរាប់សិបនាក់ដែលបានធ្វើការយ៉ាងនឿយហត់ជាច្រើនថ្ងៃនៅក្នុងទឹកនៃរដ្ឋ Tasmania ក៏ដោយ ៕

ប្រែសម្រួលដោយ ៖ ជីវ័ន្ត

ប្រភព ៖ NDTV

ចុចអាន ៖ តុងហ្គា ជួបគ្រោះផ្ទុះភ្នំភ្លើង ៨ ដងក្នុងរយៈពេល ៤៨ ម៉ោង