ណាតូ វាយបកភ្លាមៗ ក្រោយលោក ពូទីន ប្រកាសថា រុស្ស៊ីនឹងឈ្នះនៅអ៊ុយក្រែន

បន្ទាប់ពីប្រធានាធិបតីរុស្ស៊ីអះអាងថា ទីក្រុងមូស្គូនឹងឈ្នះក្នុងជម្លោះនៅអ៊ុយក្រែននោះ អគ្គលេខាធិការអង្គការណាតូបាននិយាយថា លោក វ្ល៉ាឌីមៀរ ពូទីន មិនអាចឈ្នះលើសមរភូមិបានទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសុន្ទរកថាតាមទូរទស្សន៍ទៅកាន់អតីតយុទ្ធជន និងកម្មករ អំឡុងដំណើរទស្សនកិច្ចទៅកាន់រោងចក្រផលិតសព្វាវុធក្នុងទីក្រុង Saint Petersburg កាលពីថ្ងៃពុធទី១៨ខែមករា ប្រធានាធិបតីរុស្ស៊ី បាននិយាយដោយទំនុកចិត្តថា “ពិតណាស់ជ័យជម្នះនឹងទទួលបាន គ្មានអ្វីត្រូវសង្ស័យអំពីរឿងនេះទេ”។

លោកអះអាងថា រុស្ស៊ីបានព្យាយាមជាយូរមកហើយក្នុងការចរចារកដំណោះស្រាយចំពោះជម្លោះនៅតំបន់ Donbas ភាគខាងកើតប្រទេសអ៊ុយក្រែន ដែលបានចាប់ផ្តើមក្នុងឆ្នាំ២០១៤ ហើយនិយាយថា ការលុកលុយរបស់ទីក្រុងមូស្គូ លើប្រទេសជិតខាង គឺមានបំណងបញ្ឈប់សង្រ្គាមដែលកំពុងបន្តនៅក្នុងតំបន់រវាងទីក្រុង កៀវ និងក្រុមផ្តាច់ខ្លួនគាំទ្រដោយទីក្រុងមូស្គូ។

ប៉ុន្តែអគ្គលេខាធិការអង្គការ ណាតូ លោក Jens Stoltenberg បានវាយបកវិញភ្លាមៗ ចំពោះការអះអាងរបស់លោក ពូទីន ដោយប្រាប់អ្នកសារព័ត៌មាននៅទីក្រុង Davos ប្រទេសស្វីសថា លោក ពូទីន មិនបានបង្ហាញពីសញ្ញានៃការត្រៀមខ្លួនសម្រាប់សន្តិភាពទេ ហើយថា មេទ័ពរុស្ស៊ីត្រូវតែដឹងថា គាត់គ្មានឱកាសឈ្នះក្នុងសមរភូមិឡើយ។

ទោះជាយ៉ាងណាក៏ដោយ លោក Stoltenberg បានហៅពេលនេះថាជា “ពេលវេលាដ៏សំខាន់” នៅក្នុងអ៊ុយក្រែន ហើយនិយាយថា ទីក្រុងកៀវត្រូវការអាវុធកាន់តែច្រើន ពីសម្ព័ន្ធមិត្តលោកខាងលិច ដើម្បីយកឈ្នះលើប្រទេសរុស្ស៊ីបាន។

មុននេះ ​អគ្គលេខាធិការរង​របស់​អង្គការណាតូ បាន​ព្រមាន​ប្រមុខ​យោធា​កំពូលៗ​ថា រុស្ស៊ី​កំពុង​ត្រៀម​ខ្លួន​សម្រាប់​សង្រ្គាម​បន្ត​ទៀត ហើយ​ថា ​ប្រទេសជា​សមាជិក​របស់​ខ្លួន​ត្រូវ​តែ​ត្រៀមលក្ខណៈ​សម្រាប់​រយៈ​ពេល​វែង និង​គាំទ្រ​អ៊ុយក្រែន​ឲ្យ​បាន​យូរតាមដែលអាចធ្វើទៅបាន។

ថ្លែងសុន្ទរកថាបើកកិច្ចប្រជុំប្រមុខយោធា លោក Mircea Geoana បាននិយាយថា ប្រទេសណាតូ ត្រូវតែវិនិយោគបន្ថែមទៀតលើវិស័យការពារ បង្កើនការផលិតឧស្សាហកម្មយោធា និងប្រើប្រាស់បច្ចេកវិទ្យាថ្មីៗដើម្បីជួយឈ្នះជម្លោះនាពេលអនាគត៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ លោក ពូទីន ប្រកាសក្តែងៗថា រុស្ស៊ី នឹងឈ្នះក្នុងជម្លោះ នៅអ៊ុយក្រែន