តុលាការព្រហ្មទណ្ឌ ថៃ កាត់ទោសអតីតមេដឹកនាំក្រុមអាវក្រហមលោក Jatuporn ឲ្យជាប់ពន្ធនាគារ ២ ឆ្នាំ

តុលាការព្រហ្មទណ្ឌថៃបានកាត់ទោសលោក Jatuporn Prompan អតីតមេដឹកនាំក្រុមអាវក្រហម ឲ្យជាប់ពន្ធនាគាររយៈពេល ២ ឆ្នាំ ពាក់ព័ន្ធនឹងការតវ៉ាដ៏ហិង្សាកាលពីឆ្នាំ ២០០៧ នៅឯលំនៅដ្ឋានរបស់អតីតនាយករដ្ឋមន្ត្រី និងជាទីប្រឹក្សាកំពូលរបស់ថៃគឺលោក Prem Tinsulanonda ។

តុលាការព្រហ្មទណ្ឌថៃ​កាលពី​ថ្ងៃ​ព្រហស្បតិ៍​បាន​សម្រេច​ផ្ដន្ទាទោស​ដាក់​ពន្ធនាគារ​លោក Jatuporn ក្រោម​បទ​ចោទ​​នាំឲ្យមានការបះបោរ ប្រឆាំង​​ការ​ចាប់​ខ្លួន និង​ការ​វាយ​ដំ​លើ​មន្ត្រី​សន្តិសុខ ប៉ុន្តែតុលាការបានអនុញ្ញាតឲ្យគាត់នៅក្រៅឃុំ និងត្រូវឲ្យបង់ប្រាក់ចំនួន ២០ ម៉ឺនបាត ។

ដំបូងឡើយលោក Jatuporn បានបដិសេធថាមិនបានប្រព្រឹត្តខុសនោះទេ ប៉ុន្តែក្រោយមកបានសារភាពទោសកំហុសចំពោះការចោទប្រកាន់នេះ ដោយនិយាយថា គាត់លែងចង់តតាំងនឹងករណីនេះទៀតហើយ បន្ទាប់ពីគាត់បានពិភាក្សាជាមួយលោកឧត្តមសេនីយ៍ Prem មុនពេលដែលគាត់បានទទួលមរណភាព ហើយលោក Jatuporn ថែមទាំងបាននិយាយថា ទាំងលោក និងលោកឧត្តមសេនីយ៍ Prem បានជួបពិភាក្សា និងអត់ទោសឲ្យគ្នាទៅវិញទៅមករួចហើយ ។

សាលក្រមរបស់តុលាការបានឲ្យដឹងថា កាលពីខែកក្កដា ឆ្នាំ២០០៧ លោក Jatuporn បានដឹកនាំក្រុមបាតុកររាប់ពាន់នាក់ដើរដង្ហែពីទីលាន Sanam Luang ទៅកាន់លំនៅដ្ឋា Si Sao Thewes ហើយបានឡោមព័ទ្ធទីនោះ ក្នុងគោលបំណងដាក់សម្ពាធលើលោកឧត្តមសេនីយ៍ Prem ឲ្យលាលែងពីមុខតំណែងជាក្រុមទីប្រឹក្សាកំពូលរបស់ថៃ ។

ទន្ទឹមនោះ ក្រុមបាតុករជឿថា លោកឧត្តមសេនីយ៍ Prem គឺជាអ្នកនៅពីក្រោយរដ្ឋប្រហារយោធាថ្ងៃទី១៩ ខែកញ្ញា ឆ្នាំ២០០៦ ដែលបានទម្លាក់អតីតនាយករដ្ឋមន្ត្រី ថាក់ស៊ីន ស៊ីណាវ៉ាត់ត្រា ហើយក្រុមបាតុករមួយចំនួនបានបំបែករបាំង និងបង្ករបួសស្នាមដល់មន្ត្រីសន្តិសុខដែលដាក់ពង្រាយនៅគេហដ្ឋាននោះ ដើម្បីការពារលោកឧត្តមសេនីយ៍ Prem ៕

ប្រែសម្រួលដោយ ៖ ជីវ័ន្ត

ប្រភព ៖ Bangkok Post

ចុចអាន ៖ លោក ប្រាយុទ្ធ ៖ ខ្ញុំនៅតែជានាយករដ្ឋមន្ត្រី ថៃ