អ្នកវិទ្យាសាស្រ្ត៖ ព្យុះព្រះអាទិត្យ នឹងជះឥទ្ធិពលមកភពផែនដី លឿនជាងការរំពឹងទុក

ក្រុមអ្នកវិទ្យាសាស្រ្តជឿថា ព្រះអាទិត្យកំពុងធ្វើសកម្មភាពជិតឈានដល់ចំណុចគ្រោះថ្នាក់ ហើយនឹងបង្កជាព្យុះកម្តៅ លឿនជាងការរំពឹងទុកពីមុនទៅទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រៀងរាល់មួយទសវត្សរ៍ម្តង ព្រះអាទិត្យនឹងបង្កើតកម្តៅក្នុងកម្រិតផ្សេងៗ ដែលទាំងអស់នេះគឺត្រូវបានផ្សារភ្ជាប់ជាមួយនឹង តំបន់ជាច្រើនដែលលេចឡើងនៅលើផ្ទៃព្រះអាទិត្យ ខណៈតំបន់ខ្មៅទាំងប៉ុន្មាន ដែលខ្លះអាចមានទំហំប៉ុនផែនដី ឬធំជាងនេះ ត្រូវបានជំរុញដោយដែនម៉ាញេទិចរបស់ព្រះអាទិត្យ។

ដំបូងឡើយ ក្រុមអ្នកវិទ្យាសាស្រ្តព្យាករថា ព្យុះព្រះអាទិត្យដ៏ខ្លាំងមួយ នឹងជះឥទ្ធិពលដល់ភពផែនដីនៅឆ្នាំ២០២៥ ដោយសារព្រះអាទិត្យឈានដល់ចំណុចកំពូលនៃវដ្តរបស់វា ឬគេស្គាល់ថា Solar Cycle 25 ប៉ុន្តែឥឡូវនេះ អ្នកជំនាញអះអាងថា ព្យុះទំនងជានឹងកើតឡើងនៅពាក់កណ្តាលឬនៅចុងឆ្នាំ២០២៤វិញ។

លោក Mark Miesch អ្នកវិទ្យាសាស្ត្រស្រាវជ្រាវនៅ មជ្ឈមណ្ឌលព្យាករអាកាសធាតុអវកាសបានប្រាប់ CNN ថា “ព្យុះព្រះអាទិត្យគឺខុសពីព្យុះសង្ឃរា។ ព្យុះសង្ឃរាអូសបន្លាយពេលពីរបីខែ តែព្យុះព្រះអាទិត្យ គឺយូរជាងនេះ អាចឈានដល់ឆ្នាំ”។

ទន្ទឹមនោះ ព្យុះព្រះអាទិត្យ អាចជះឥទ្ធិពលដល់បណ្តាញអគ្គិសនី GPS អាកាសចរណ៍ និងផ្កាយរណបនៅក្នុងគន្លងផែនដីទាប ហើយព្រឹត្តិការណ៍បែបនេះ ក៏អាចបណ្តាលឲ្យដាច់វិទ្យុ និងរំខានដល់បេសកកម្មអវកាសផងដែរ។

ជាក់ស្ដែង វាធ្លាប់បានកើតឡើងនៅឆ្នាំ ២០២២ ដែលកាលនោះបរិយាកាសខាងក្រៅរបស់ផែនដីឡើងកម្តៅខ្លាំង ដោយបណ្តាលឲ្យផ្កាយរណប Starlink ចំនួន ៣៨ ក្នុងចំណោម ៤៩ ត្រូវបានឆេះ ៕

ប្រែសម្រួល៖ Vann Vann

ប្រភព៖ Daily Star

ចុចអាន៖ អ្នកវិទ្យាសាស្រ្តព្រមានថា ព្យុះព្រះអាទិត្យដ៏ធំ នឹងវាយប្រហារភពផែនដី