អាមេរិក សម្រេចផ្ដល់កញ្ចប់ជំនួយយោធា ៨០ លានដុល្លារដល់ តៃវ៉ាន់

រដ្ឋបាលរបស់លោកប្រធានាធិបតីអាមេរិក Joe Biden បានយល់ព្រមលើការបញ្ជូនកម្លាំងយោធាអាមេរិកជាលើកដំបូងមិនធ្លាប់មានទៅកាន់កោះតៃវ៉ាន់ ក្រោមកញ្ចប់កម្មវិធីដែលជាទូទៅគឺប្រើសម្រាប់ផ្ដល់ឲ្យរដ្ឋអធិបតេយ្យ ។

សារព័ត៌មាន Associated Press បាននិយាយថា ក្រសួងការបរទេសអាមេរិកកាលពីថ្ងៃពុធបានជូនដំណឹងដល់សភាអំពីកញ្ចប់ជំនួយដែលមានតម្លៃ ៨០ លានដុល្លារ ក្រោមកម្មវិធីហិរញ្ញវត្ថុយោធាបរទេស ឬហៅកាត់ថា FMF ខណៈតៃវ៉ាន់ក៏​អាច​ទិញ​សម្ភារៈ​យោធា និង​ទទួល​បាន​ការ​ហ្វឹកហ្វឺន​ពី​សហរដ្ឋអាមេរិកវិញផងដែរ​ដោយ​ប្រើ​មូលនិធិនេះ ។

ពាក់ព័ន្ធនឹងបញ្ហានេះដែរ ប្រធានគណៈកម្មាធិការកិច្ចការបរទេសនៃសភាតំណាងរាស្រ្តអាមេរិក លោក Michael McCaul បានស្វាគមន៍ចំពោះកញ្ចប់ជំនួយនេះ ហើយលោកថែមទាំងបាននិយាយផងដែរថា សព្វាវុធនឹងមិនត្រឹមតែជួយតៃវ៉ាន់ប៉ុណ្ណោះទេ ប៉ុន្តែថែមទាំងនឹងពង្រឹងជំហរ ក៏ដូចជាធានាសន្តិសុខជាតិរបស់សហរដ្ឋអាមេរិកពីការលុកលុយកាន់តែខ្លាំងរបស់ប្រទេសចិនផងដែរ ។

គួរបញ្ជាក់ថា ការអនុវត្តកម្មវិធី FMF សម្រាប់តៃវ៉ាន់ ក៏នឹងអាចទាញប្រតិកម្មយ៉ាងខ្លាំងក្លាពីសំណាក់ប្រទេសចិនផងដែរ ស្របពេលរដ្ឋាភិបាលទីក្រុងប៉េកាំងតែងតែប្រឆាំងនឹងជំនួយយោធារបស់សហរដ្ឋអាមេរិកដល់តៃវ៉ាន់ ៕

ប្រែសម្រួលដោយ ៖ ជីវ័ន្ត

ប្រភព ៖ NHK