អ៊ីរ៉ង់ ពន្លះអាមេរិកនិងអ៊ីស្រាអែល យ៉ាងចាស់ដៃ

ប្រធានាធិបតីអ៊ីរ៉ង់ លោក Ebrahim Raisi បានគូសបញ្ជាក់ថា ទីក្រុងតេហេរ៉ង់ នឹងមិនអើពើចំពោះការព្រមានរបស់សហរដ្ឋអាមេរិក ដែលកុំឲ្យធ្វើអន្តរាគមន៍ក្នុងជម្លោះ ហាម៉ាស់-អ៊ីស្រាអែល ឡើយ។ ទន្ទឹមនោះ លោកក៏បានរិះគន់បស្ចិមប្រទេស ជុំវិញភាពស្ទាក់ស្ទើរក្នុងការជួយបញ្ចប់អរិភាពមួយនេះផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទសម្ភាសន៍ជាមួយ Al Jazeera កាតា កាលពីថ្ងៃអាទិត្យទី២៩ខែតុលា លោក Raisi និយាយថា ទីក្រុងវ៉ាស៊ីនតោន កំពុងស្នើសុំឲ្យយើងកុំលូកដៃ ទាំងដែលពួកគេកំពុងផ្តល់ការគាំទ្រយ៉ាងទូលំទូលាយដល់អង្គភាព Zionist ហើយនេះគឺជាការទាមទារមិនត្រឹមត្រូវឡើយ”។

ប្រធានាធិបតីអ៊ីរ៉ង់ក៏អះអាងដែរថា ប្រតិបត្តិការជើងគោកពង្រីកធំរបស់អ៊ីស្រាអែលនៅតំបន់ហ្គាហ្សា គឺជាការបរាជ័យ។ វាគឺជាជ័យជម្នះទីពីរ សម្រាប់ប៉ាឡេស្ទីន បន្ទាប់ពីការចាប់ផ្តើម ប្រតិបត្តិការព្យុះ al-Aqsa កាលពីថ្ងៃទី៧ខែតុលា។

លើសពីនេះ លោក Raisi បានបន្តចោទប្រកាន់សហរដ្ឋអាមេរិក និងបណ្តាប្រទេសអឺរ៉ុបដែលមិនបញ្ចេញឈ្មោះមួយចំនួនថា បានរារាំងបទឈប់បាញ់នៅហ្គាហ្សា។ លោកបានហៅគោលនយោបាយបែបនេះថាជា “អំពើឧក្រិដ្ឋកម្ម”។ ការគណនារបស់សហរដ្ឋអាមេរិកនៅក្នុងតំបន់ គឺខុសទាំងស្រុង។ ពួកគេនឹងមិនអាចសម្រេចបាននូវគោលដៅរបស់ខ្លួនជាមួយនឹងមជ្ឈិមបូព៌ាថ្មីនោះទេ។

គួរបញ្ជាក់ថា បន្ទាប់​ពី​ការ​វាយ​ប្រហារ​របស់​ក្រុម ហាម៉ាស់ លើ​ប្រទេស​អ៊ីស្រាអែល​កាល​ពី​ដើម​ខែ​នេះ ប្រធានាធិបតី​អាមេរិក Joe Biden បាន​សន្យា​គាំទ្រ​​អ៊ីស្រាអែលដោយ​គ្មាន​លក្ខខណ្ឌ​ ហើយថែមទាំង​ព្រមាន​អ៊ីរ៉ង់ ​ឲ្យ​ប្រយ័ត្ន​ខ្លួនទៀតផង។

លោក Biden បាននិយាយជាសាធារណៈថា ការចរចាបទឈប់បាញ់មិនអាចចាប់ផ្តើមបានទេ រហូតដល់ក្រុមហាម៉ាស់ដោះលែងចំណាប់ខ្មាំងជាង២០០នាក់សិន។

ការអត្ថាធិប្បាយរបស់លោក Raisi ធ្វើឡើងបន្ទាប់ពីរដ្ឋមន្ត្រីការបរទេសអ៊ីរ៉ង់ លោក Hossein Amir-Abdollahian បានព្រមានសហរដ្ឋអាមេរិកថា “រណសិរ្សថ្មីនឹងបើកមុខ ប្រឆាំងទីក្រុងវ៉ាស៊ីនតោន ប្រសិនបើខ្លួនមិនផ្លាស់ប្តូរគោលនយោបាយនៅមជ្ឈិមបូព៌ា រួមទាំងការគាំទ្រជាក់ស្តែងចំពោះអ៊ីស្រាអែលទេនោះ”៕

ប្រែសម្រួល៖ Vann Vann

ប្រភព៖ RT

ចុចអាន៖ អាមេរិក ជំរុញ អ៊ីស្រាអែល ឲ្យ ការពារ ជន ស៊ីវិល និងបង្កើន ជំនួយ ដល់ តំបន់ ហ្គាហ្សា