UN ថា ការ​វាយ​ប្រហារ​របស់​អ៊ីស្រាអែល​ លើ​ជំរំ​ជន​ភៀស​ខ្លួន​ គឺជា​អំពើសាហាវព្រៃផ្សៃ

ការទម្លាក់គ្រាប់បែករបស់អ៊ីស្រាអែល លើជំរំជនភៀសខ្លួន Jabalia នៅតំបន់ ហ្គាហ្សា គឺជា ភាពសាហាវព្រៃផ្សៃថ្មីមួយទៀត ដែលកើតមានលើប្រជាជនប៉ាឡេស្ទីន។ នេះបើតាមការអះអាងនៅថ្ងៃពុធទី១ខែវិច្ឆិកា ពីសំណាក់អគ្គលេខាធិការរងអង្គការសហប្រជាជាតិ ទទួលបន្ទុកកិច្ចការមនុស្សធម៌លោក Martin Griffiths។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហាម៉ាស់រាយការណ៍ថា ជនជាតិប៉ាឡេស្ទីនរហូតដល់ទៅ៤០០នាក់ ត្រូវបានសម្លាប់ឬរងរបួសដោយការវាយប្រហាររបស់អ៊ីស្រាអែលទៅលើជំរំ Jabalia ដែលមានប្រជាជនច្រើន។ ក្រោយមក អ្នកនាំពាក្យកងកម្លាំងការពារអ៊ីស្រាអែល (IDF) បានអះអាងពីការវាយប្រហារនេះ ដោយនិយាយថា ការវាយប្រហារអាកាសគឺកំណត់គោលដៅសំខាន់ លើមេបញ្ជាការក្រុមហាម៉ាស់និងអង្គភាពរបស់គាត់។

តំណាង IDF ក៏បានហៅការស្លាប់និងរបួសជនស៊ីវិលថាជាសោកនាដកម្មមួយផងដែរ ប៉ុន្តែទីបំផុត បានស្តីបន្ទោសការស្លាប់របស់ពួកគេ ទៅលើការដឹកនាំរបស់ក្រុមហាម៉ាស់ ដោយថា ក្រុមហាម៉ាស់បានបង្កប់ខ្លួនក្នុងចំណោមប្រជាជនស៊ីវិល។

នៅក្នុងសេចក្តីថ្លែងការណ៍មួយដែលចេញផ្សាយកាលពីថ្ងៃពុធ បន្ទាប់ពីដំណើរទស្សនកិច្ចរយៈពេលពីរថ្ងៃទៅកាន់ប្រទេសអ៊ីស្រាអែលនិងដែនដីប៉ាឡេស្ទីន លោក Griffiths បានសន្មតថា ការប្រយុទ្ធគ្នានៅតំបន់ហ្គាហ្សា បានឈានដល់ដំណាក់កាលដ៏គួរឲ្យភ័យខ្លាចបំផុត ជាមួយនឹងផលវិបាកមនុស្សធម៌កាន់តែធ្ងន់ធ្ងរខ្លាំងឡើងៗ។

តាមការលើកឡើងរបស់លោក Griffiths, “ការវាយប្រហារថ្ងៃទី៧ខែតុលានិងផលវិបាករបស់វា នឹងបន្សល់ទុកនូវស្លាកស្នាមដែលមិនអាចលុបបំបាត់លើជីវិតមនុស្សរាប់លាននាក់”។ រឿងនេះមិនអាចបន្តបានទេ យើង​ត្រូវ​ការ​ការ​ផ្លាស់​ប្តូរវិធីសាស្រ្ត”។

ស្របពេលជាមួយគ្នានោះដែរ លោកបានអំពាវនាវជាថ្មី ឲ្យក្រុមហាម៉ាស់ ដោះលែងចំណាប់ខ្មាំងជាបន្ទាន់និងដោយគ្មានលក្ខខណ្ឌអ្វីទាំងអស់, ឲ្យភាគីទាំងពីរគោរពកាតព្វកិច្ចរបស់ពួកគេនៅក្រោមច្បាប់មនុស្សធម៌អន្តរជាតិ និងត្រូវបញ្ឈប់ការផ្តោតគោលដៅលើជនស៊ីវិល។

នៅទីបញ្ចប់​ លោក Griffiths បានអំពាវនាវឲ្យអ្នកមានឥទិ្ធពល ត្រូវធ្វើការឆ្ពោះទៅរកការបន្ថយជម្លោះព្រោះបើមិនធ្វើសកម្មភាពឥឡូវនេះទេនោះ វានឹងមានផលវិបាករីករាលដាលហួសពីតំបន់នេះទៅទៀត៕

ប្រែសម្រួល៖ Vann Vann

ប្រភព៖ RT

ចុចអាន៖ គ្រូពេទ្យនៅហ្គាហ្សា បង្ខំចិត្តប្រើពិលបញ្ចាំង និងគ្មានថ្នាំស្ពឹកចាក់ ពេលវះកាត់សម្រាលកូន