FBI៖ អ៊ីរ៉ង់ រៀបផែនការធ្វើឃាតមន្ត្រីអាមេរិក

នាយក FBI លោក Christopher Wray បានអះអាងកាលពីថ្ងៃពុធទី១ខែវិច្ឆិកាថា អ៊ីរ៉ង់ គ្រោងធ្វើឃាតមន្ត្រីអាមេរិកជាច្រើនរូប។ ក្នុងអំឡុងសវនាការព្រឹទ្ធសភា លោកក៏បានព្រមានផងដែរ អំពីការគំរាមកំហែងកាន់តែខ្លាំងឡើងនៃអំពើភេរវកម្ម លើទឹកដីសហរដ្ឋអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្តីថ្លែងការណ៍បើកសវនាការ ទៅកាន់គណៈកម្មាធិការសន្តិសុខមាតុភូមិ លោក Wray និយាយថា កម្រិតគំរាមកំហែងភេរវកម្មនៅសហរដ្ឋអាមេរិក មានការកើនឡើងពេញមួយឆ្នាំ២០២៣ ប៉ុន្តែវាបានហក់ឡើងខ្ពស់មែនទែន ឈានដល់កម្រិតមួយថ្មីទៀត ដោយសារតែជម្លោះរវាងអ៊ីស្រាអែល និងក្រុមសកម្មប្រយុទ្ធប៉ាឡេស្ទីន ហាម៉ាស់។

FBI ជឿថា ការវាយប្រហារដ៏គួរឲ្យភ្ញាក់ផ្អើលដោយក្រុមហាម៉ាស់ លើអ៊ីស្រាអែលកាលពីថ្ងៃទី៧ខែតុលា ដែលក្នុងនោះមានជនជាតិអ៊ីស្រាអែលរហូតដល់១៤០០នាក់ត្រូវបាត់បង់ជីវិត គឺអាចបំផុសគំនិតឲ្យក្រុមជ្រុលនិយមហិង្សាផ្សេងទៀត បើកការវាយប្រហារប្រឆាំងនឹងជនជាតិអាមេរិក។

លោក Wray អះអាងទៀតថា អ៊ីរ៉ង់ បានប៉ុនប៉ងធ្វើឃាតដោយផ្ទាល់ឬដោយប្រយោល ប្រឆាំងនឹងក្រុមអ្នកប្រឆាំងនិងមន្ត្រីជាន់ខ្ពស់ក្នុងជួររដ្ឋាភិបាលអាមេរិកនាពេលបច្ចុប្បន្ន និងកាលពីអតីត រួមទាំងនៅលើទឹកដីអាមេរិកផងដែរ។ 

លើសពីនេះ FBI កំពុងតាមដានយ៉ាងសកម្មចំពោះក្រុម ហេសបូឡា និងចេតនារបស់ពួកគេនៅក្នុងសហរដ្ឋអាមេរិក ហើយព្រមានថា ផលប្រយោជន៍របស់អាមេរិក និងហេដ្ឋារចនាសម្ព័ន្ធសំខាន់ៗ កំពុងត្រូវបានគេកំណត់គោលដៅដោយការវាយប្រហារតាមអ៊ីនធឺណិតពីអ៊ីរ៉ង់។

ការអត្ថាធិប្បាយរបស់ Wray កើតឡើងខណៈកងកម្លាំងអ៊ីស្រាអែល បង្កើនការវាយលុយរបស់ពួកគេ ទៅកាន់តំបន់ហ្គាហ្សា ឆ្លើយតបទៅនឹងការវាយប្រហារកាលពីថ្ងៃទី៧ខែតុលា។

អាជ្ញាធរសុខាភិបាលក្នុងតំបន់រាយការណ៍ថា រហូតមកដល់ពេលនេះ ជនជាតិប៉ាឡេស្ទីនជាង ៨៥០០ នាក់ត្រូវបានសម្លាប់ ក្នុងការសងសឹករបស់អ៊ីស្រាអែល៕

ប្រែសម្រួល៖ Vann Vann

ប្រភព៖ RT

ចុចអាន៖ FBI៖ ការវាយប្រហាររបស់ក្រុមហាម៉ាស់ នឹងជំរុញឲ្យការគំរាមកំហែងភេរវកម្មនៅអាមេរិក ឈានដល់កម្រិតខ្ពស់បំផុត ចាប់តាំងពី ISIS