នាយករដ្ឋមន្ត្រី ហៃទី ដើរចេញពីតំណែងទាំងកំពុងនៅក្រៅប្រទេស

នាយករដ្ឋមន្ត្រីប្រទេសហៃទីលោក Ariel Henry បានសម្រេចចិត្តដើរចេញពីមុខតំណែងទាំងដែលលោកកំពុងនៅស្រុកក្រៅ ចំពេលប្រទេសកំពុងស្ថិតក្នុងស្ថានភាពវឹកវរ និងហៅលែងឮ ដោយសារតែអំពើហិង្សាកាន់តែផ្ទុះឆេះរោលរាលពេញផ្ទៃប្រទេស ។ នេះបើយោងតាមការលើកឡើងរបស់ប្រធានាធិបតីហ្គីយ៉ានលោក Irfaan Ali និងចុះផ្សាយដោយសារព័ត៌មាន BBC នៅថ្ងៃទី១២ ខែមីនានេះ ។

ថ្លែងក្នុងសន្និសីទសារព័ត៌មាន បន្ទាប់ពីការចរចាជាអន្តរជាតិនៅប្រទេសហ្សាម៉ាអ៊ីក, លោក Ali បានលើកឡើងថា “យើងសូមទទួលស្គាល់ការលាលែងពីតំណែងរបស់លោកនាយករដ្ឋមន្ត្រី Ariel Henry ហើយត្រៀមនឹងបង្កើតក្រុមប្រឹក្សាប្រធានាធិបតីអន្តរកាលដើម្បីតែងតាំងនាយករដ្ឋមន្ត្រីបណ្ដោះអាសន្ន” ។

ក្រុមប្រឹក្សាប្រធានាធិបតីអន្តរកាលនឹងមានអ្នកសង្កេតការណ៍ ២ នាក់ និងសមាជិកបោះឆ្នោតចំនួន ៧ រូប រួមទាំងតំណាងមកពីក្រុមចម្រុះហៃទីមួយចំនួនទៀតរួមទាំង វិស័យឯកជន និងសង្គមស៊ីវិល ក៏ដូចជាមេដឹកនាំសាសនាម្នាក់ផងដែរ ខណៈក្រុមប្រឹក្សានេះរំពឹងនឹងដើរតួជាអ្នកត្រួសត្រាយផ្លូវសម្រាប់ការបោះឆ្នោតលើកដំបូងនៅក្នុងប្រទេសកំពុងត្រដាបត្រដួស ចាប់តាំងពីឆ្នាំ ២០១៦ មក ។

នៅថ្ងៃទី២៩ ខែកុម្ភៈ ក្រុមក្មេងពាលបានចាប់ផ្តើមការបាញ់បោះក្នុងទីក្រុង Port-au-Prince និងនៅឯអាកាសយានដ្ឋានអន្តរជាតិនៃរដ្ឋធានីហៃទី ស្របពេលដែលអវត្តមានរបស់លោក Henry ដែលកំពុងបំពេញដំណើរទស្សនកិច្ចនៅប្រទេសកេនយ៉ាដើម្បីដើរហើររកកិច្ចព្រមព្រមសម្រាប់ការដាក់ពង្រាយកម្លាំងទ័ពបរទេសមកប្រយុទ្ធប្រឆាំងនឹងក្រុមក្មេងពាលនៅក្នុងប្រទេស ។

ជាការឆ្លើយតបក្រុមក្មេងពាលទាំងនោះបានដាក់មុខព្រួញរារាំងលោក Henry មិនឲ្យត្រឡប់ចូលមកកាន់ប្រទេសហៃទីវិញឡើយ ហើយថែមទាំងបើកប្រតិបត្តិការប្រដាប់អាវុធសម្រុកចូលពន្ធនាគារដ៏ធំបំផុតរបស់ប្រទេស និងបានរំដោះទណ្ឌិតមួយចំនួនធំដើម្បីបន្ថែមកម្លាំងតតាំង ខណៈចាប់តាំងពីពេលនោះមក រដ្ឋាភិបាលហៃទីសម្រេចប្រកាសដាក់ប្រទេសក្នុងស្ថានភាពអាសន្ន ហើយបច្ចុប្បន្នលោកនាយករដ្ឋមន្ត្រីកំពុងស្ថិតក្នុងប្រទេសព័រតូរីកូ ។

គួរបញ្ជាក់ថា រយៈពេលប៉ុន្មានឆ្នាំចុងក្រោយនេះ ប្រទេសហៃទីបានធ្លាក់ចូលក្នុងរណ្ដៅនៃវិបត្តិសង្គម និងនយោបាយ ជាពិសេសបន្ទាប់ពីការធ្វើឃាតលោកប្រធានាធិបតី Jovenel Moise កាលពីថ្ងៃទី៧ ខែកក្កដា ឆ្នាំ ២០២១ ស្របពេលដែលអំពើ​ហិង្សានាពេលថ្មីៗ​នេះ​ ទាញឲ្យ​វិបត្តិ​មនុស្សធម៌​ក្នុងប្រទេស​កាន់តែហៅលែងឮហើយ ខណៈយោងតាមអង្គការអន្តរជាតិសម្រាប់ការធ្វើចំណាកស្រុក (IOM) ភាពចលាចលនេះបានធ្វើឲ្យប្រជាជនហៃទី ៣៦២,០០០ នាក់ត្រូវផ្លាស់ទីលំនៅ ហើយច្រើនជាងពាក់កណ្តាលនៃពួកគេគឺជាកុមារ ៕

ដោយ ៖ សុខ ជីវ័ន្ត

ចុចអាន ៖ ទូត EU និងប្រទេស ២ ទៀតចាប់ផ្ដើមជម្លៀសក្រុមការងារចេញពី ហៃទី ដែលកំពុងផ្ទុះអំពើហិង្សា