ព្យុះសង្ឃរា Melissa បង្កការបំផ្លិចបំផ្លាញធ្ងន់ធ្ងរនិងសម្លាប់មនុស្ស៣២នាក់នៅទូទាំងតំបន់ការ៉ាបៀន

ព្យុះសង្ឃរា Melissa បានបង្កការខូចខាតយ៉ាងធ្ងន់ធ្ងរនៅទូទាំងតំបន់ការ៉ាបៀន ដោយបានសម្លាប់មនុស្សយ៉ាងហោចណាស់ ៣២ នាក់នៅក្នុងប្រទេសហៃទី ហ្សាម៉ាអ៉ីក សាធារណរដ្ឋដូមីនីកែន និងប្រទេសគុយបា។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី៣០ខែតុលា។

នៅក្នុងប្រទេសហៃទី មានអ្នកស្លាប់ច្រើនជាងគេ ភាគច្រើននៅក្នុងទីក្រុង Petit-Goave ភាគខាងត្បូង ដោយសារទឹកទន្លេហូរហៀរ និងបំផ្លាញផ្ទះជាច្រើនខ្នង។ មនុស្សជាច្រើននាក់នៅតែបាត់ខ្លួននៅឡើយ ដែលទាមទារប្រតិបត្តិការជួយសង្គ្រោះបន្ទាន់។

ចំពោះប្រទេសហ្សាម៉ាអ៉ីកនាយករដ្ឋមន្ត្រី Andrew Holness បានប្រកាសថាហ្សាម៉ាអ៉ីកជាតំបន់គ្រោះមហន្តរាយ ហើយបានសន្យាថានឹងផ្តល់ជំនួយ និងការស្តារឡើងវិញយ៉ាងឆាប់រហ័ស។ ព្យុះ Melissa មានឥទ្ធិពលនិងបង្កការបំផ្លិចបំផ្លាញខ្លាំង ដោយប្រជាជនជាច្រើននិយាយថា ពួកគេមិនដែលឃើញព្យុះខ្លាំងក្លាបែបនេះទេ។

អ្នកជំនាញនិយាយថា ការប្រែប្រួលអាកាសធាតុនេះបានធ្វើឱ្យព្យុះMelissa កាន់តែខ្លាំងឡើង ដោយសារសមុទ្រការ៉ាបៀនក្តៅខុសពីធម្មតា។ នាយករដ្ឋមន្ត្រីហ្សាម៉ាអ៉ីកបានអំពាវនាវដល់ប្រទេសអ្នកមានឱ្យផ្តល់ប្រាក់បន្ថែមទៀតដើម្បីជួយប្រទេសកោះតូចៗឱ្យសម្របខ្លួនទៅនឹងផលប៉ះពាល់កាន់តែខ្លាំងឡើងនៃការឡើងកំដៅផែនដី។

ឥឡូវនេះ ក្រុមជួយសង្គ្រោះនៅក្នុងប្រទេសដែលរងផលប៉ះពាល់ទាំងអស់កំពុងធ្វើការដើម្បីស្វែងរកអ្នករស់រានមានជីវិត និងជួយមនុស្សឱ្យកសាងឡើងវិញបន្ទាប់ពីព្យុះសង្ឃរាដ៏គ្រោះថ្នាក់បំផុតមួយក្នុងប៉ុន្មានឆ្នាំថ្មីៗនេះមិនធ្លាប់មាន៕

អត្ថបទ៖ ប៊ុន សុភាព