ព័ត៌មានអន្ដរជាតិ

កាកសំណល់អាហារៈ ចំនួន៩០០លានតោនត្រូវបានបោះចោល

បានផុស

៥ years មុន

នៅ

ថ្ងៃអាទិត្យ ៧ មីនា ២០២១

ដោយ

សន្ទស្សន៍កាកសំណល់អាហាររបស់កម្មវិធីបរិស្ថានអង្គការសហប្រជាជាតិបានបង្ហាញថា ១៧%នៃអាហារដែលអ្នកប្រើប្រាស់អាចរកបាននៅក្នុងហាង តាមផ្ទះ និងភោជនីយដ្ឋានបោះចោលផ្ទាល់ទៅក្នុងធុងសំរាមតែម្តង។ កាកសំណល់ប្រហែលជា៦០%គឺនៅតាមផ្ទះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការជាប់បំរាមក្នុងអន្តរកាលកូវិដ-១៩ហាក់ដូចជាមានផលវិជ្ជមានគួរឲ្យភ្ញាក់ផ្អើលគឺធ្លាក់កាកសំណល់តាមផ្ទះគួរឲ្យកត់សំគាល់។

អង្គការសប្បុរសធម៌និរន្តរភាព Wrap ដែលជាដៃគូរបស់អង្គការសហប្រជាជាតិដែលធ្វើការស្រាវជ្រាវបានបង្ហាញរបាយការណ៍ថា មនុស្សបានកំពុងមានផែនការទិញទំនិញ និងអាហាររបស់ពួកគេដោយមានការយកចិត្តទុកដាក់ជាងមុន។

នៅក្នុងកិច្ចខិតខំប្រឹងប្រែងការងារនេះ មេចុងភៅល្បីៗត្រូវបានគេចុះបញ្ជីដើម្បីជំរុញឲ្យមានទម្លាប់ល្អក្នុងការកាត់បន្ថយកាកសំណល់ឲ្យសល់តិចបំផុត។

ឡានដឹកអាហារ២៣លានគ្រឿង

លោក Richard Swannell នាយកអភិវឌ្ឍអង្គការ Wrap បានប្រាប់ BBC ថា របាយការណ៍បានគូសបញ្ជាក់ពីបញ្ហាពិភពលោកមួយគឺ«ធំជាងការប៉ាន់ស្មាននាពេលកន្លងមក»។

«អាហារចំនួន៩២៣លានតោនកំពុងត្រូវបានខ្ជះខ្ជាយជារៀងរាល់ឆ្នាំដែលផ្ទុកក្នុងរថយន្តដឹកទំនិញចំនួន២៣លានគ្រឿងដែលក្នុងមួយគ្រឿងផ្ទុក៤០តោន។

វាជាបញ្ហាមួយដែលពីមុនត្រូវបានចាត់ទុកជាបញ្ហាស្ទើរតែផ្តាច់មុខនៅក្នុងប្រទេសអ្នកមាន ដែលអ្នកប្រើប្រាស់ទិញទំនិញលើសពីតម្រូវការប្រើប្រាស់របស់ពួកគេថែមទៀត ប៉ុន្តែការស្រាវជ្រាវនេះរកឃើញថា កាកសំណល់យ៉ាងច្រើនមានគ្រប់ទីកន្លែង»។

គម្លាតនៃការរកឃើញអាចបង្ហាញពីទំហំនៃបញ្ហាដែលមានទាំងនៅក្នុងប្រទេសមានចំណូលខ្ពស់ និងប្រទេសមានចំណូលទាប។ ជាឧទាហរណ៍ របាយការណ៍មិនអាចបែងចែករវាងកាកសំណល់ដែលបរិភោគបាន និងកាកសំណល់ដែលមិនអាចបរិភោគបាន។

លោកស្រី Martina Otto មកពី Unep បាននិយាយថា ៖«យើងមិនបានពិនិត្យឲ្យស៊ីជម្រៅនូវបញ្ហានេះទេ ប៉ុន្តែប្រទេសដែលមានប្រាក់ចំណូលទាប ខ្សែសង្វាក់ផ្គតផ្គងមិនអាចត្រូវបានធានាពេញលេញទេ ដោយសារកង្វះថាមពល»។

លោកស្រីថា ទិន្នន័យដើម្បីបែងចែករវាងកាកសំណល់ដែលអាចបរិភោគបាន និងអាហារដែលមិនអាចបរិភោគបាន ដូចជាឆ្អឹង និងសំបកគឺមានតែក្នុងប្រទេសដែលមានចំណូលខ្ពស់។ ចំណែកប្រទេសដែលមានប្រាក់ចំណូលទាបទំនងខ្ជះខ្ជាយអាហារដែលអាចបរិភោគមិនបានភាគច្រើន។

មុនកិច្ចប្រជុំកំពូលស្តីពី«ជីវចម្រុះ និងអាកាសធាតុសកល»នៅចុងឆ្នាំនេះ នាយប្រតិបត្តិ Unep លោកស្រី Inger Andersen កំពុងជំរុញឲ្យប្រទេសទាំងអស់ប្រយុទ្ធប្រឆាំងនឹងកាកសំណល់ដែលត្រូវបញ្ឈប់នៅពាក់កណ្តាលឆ្នាំ២០៣០។

លោកស្រីថា ៖«ប្រសិនបើយើងចង់យកចិត្តទុកដាក់ខ្ពស់ក្នុងការដោះស្រាយការប្រែប្រួលអាកាសធាតុ ការបាត់បង់ជីវចម្រុះ និងធម្មជាតិ ព្រមទាំងការបំពុលបរិយាកាស និងកាកសំណល់ អាជីវកម្ម រដ្ឋាភិបាល និងប្រជាជនទូទាំងពិភពលោកត្រូវតែបំពេញតួនាទីរបស់ពួកគេដើម្បីចូលរួមកាត់បន្ថយកាកសំណល់»។

លោក Richard Swannell បានចង្អុលបង្ហាញថា ៖«អាហារដែលខ្ជះខ្ជាយគឺបណ្តាលឲ្យកើតមានភាយឧស្ម័នផ្ទះកញ្ចក់៨-១០% ដូច្នេះប្រសិនបើ អាហារដែលខ្ជះខ្ជាយច្រើននៅក្នុងប្រទេសមួយនោះ វានឹងក្លាយជាឧស្ម័នផ្ទះកញ្ចក់ធំជាងគេទី៣នៅលើផែនដី»។

គន្លឹះកាត់បន្ថយកាកសំណល់

-រៀបចំផែនការចំណែករបស់លោកអ្នក និងទិញទំនិញតាមត្រឹមត្រូវចាំបាច់។ ឆ្នាំងមួយគួរតែដាក់ចំនួនអង្ករដែលមិនទាន់ចំអិនឲ្យត្រឹមត្រូវសម្រាប់មនុស្សធំពេញវ័យ៤នាក់។ មានន័យថា ការទិញទំនិញ និងរៀបចំអាហារឲ្យត្រឹមត្រូវតាមតម្រូវការពោលគឺមិនឲ្យខ្វះ និងមិនឲ្យសល់។

-ដាក់កំណត់សីតុណ្ហភាពត្រជាក់ក្នុងទូទឹកកកឲ្យទាប ជាមធ្យមសីតុណ្ហភាពទឹកកកនៅប្រទេសអង់គ្លេស៧អង្សាសេ ដូច្នេះគួរតែដាក់កម្រិតសីតុណ្ហភាពទូទឹកកកទាបជា៥អង្សាសេបានហើយ។

-យកចិត្តទុកដាក់ចំពោះស្លាកកាលបរិច្ឆេទ: កាលបរិច្ឆេទប្រើប្រាស់ត្រឹមត្រូវគឺជាសុវត្ថិភាពចំណីអាហារ។ ប្រសិនបើកាលបរិច្ឆេទហួសកំណត់ លោកអ្នកមិនត្រូវបរិភោគ ឬប្រើប្រាស់ទេ ទោះមើលទៅស្អាត និងមិនមានក្លិនអាក្រក់ក៏ដោយ។ ប្រសិនបើអ្វីមួយដែលជិតហួសកាលបរិច្ឆេទ លោកអ្នកអាចដាក់ក្លាហ្សេបាន។ អ្វីដែលមិនទាន់ហួសកាលបរិច្ឆេទគឺគុណភាពល្អ។

យោងតាមអង្គការ Wrap ស្រាវជ្រាវឃើញថា នៅចក្រភពអង់គ្លេស ជាមធ្យម គ្រួសារមួយអាចសន្សំលុយប្រហែល៩០០ដុល្លារក្នុងមួយឆ្នាំពីការចំណាយលើអាហារដែលពួកគេបរិភោគ។

ឥទ្ធិពលបំរាម

នៅពេលកាកសំណល់អាហារជាការស្ម័គ្រចិត្ត បំរាមកូវិដ-១៩ហាក់ដូចជាមានឥទ្ធិពលគួរឲ្យភ្ញាក់ផ្អើលដែលបានបង្ហាញយ៉ាងច្បាស់ពីរបៀបដែលត្រូវបានចាត់ចែង។
យោងតាមការស្រាវជ្រាវរបស់ Wrap បង្ហាញថា ការធ្វើផែនការ ការរក្សាទុកដោយប្រុងប្រយ័ត្ន និងចំអិនអាហារកំឡុងពេលបំរាមកូវិដ-១៩បានកាត់បន្ថយកាកសំណល់អាហារគួរឲ្យកត់សំគាល់ដែលតាមរបាយការណ៍គឺធ្លាក់ចុះដល់២២% បើប្រៀបធៀបនឹងឆ្នាំ២០១៩។

របាយការណ៍អង្គការបានលើកឡើងថា ៖«ការត្រូវបានដាក់បង្ខាំងនៅផ្ទះជាលទ្ធផលបង្ហាញពីការកើនឡើងនូវឥរិយាបថដូចជាការចំអិនអាហារត្រូវតាមតម្រូវការ និងមានផែនការអាហារល្អ។ ប៉ុន្តែសញ្ញាចុងក្រោយបំផុតគឺកម្រិតកាកសំណល់អាហារទំនងដូចជាកើនឡើងវិញ នៅពេលបំរាមត្រូវបានបន្ធូរបន្ថយ និងដកបំរាម»។

ក្នុងការប្រឹងប្រែងដើម្បីជៀសវាងបញ្ហានេះ ចុងភៅ និងមេចុងភៅបានផ្តល់ឈ្មោះ និងគណនីទំនាក់ទំនងសង្គមរបស់ពួកគេដើម្បីជាយុទ្ធនាការណ៍ប្រឆាំងនឹងកាក់សំណល់អាហារ។

ចុងភៅកម្មវិធីទូរទស្សន៍អង់គ្លេស Nadiya Hussain បានកំពុងធ្វើការជាមួយអង្គការ Wrap និងផ្តល់គន្លឹះ និងរូបមន្តធ្វើម្ហូបបតាមរយៈ Instagram។

ចំណែកម្ចាស់ភោជនីយដ្ឋានអ៊ីតាលី Massimo Bottura ដែលជាមេចុងភៅនៅភោជនីយដ្ឋាន Modena eatery Osteria Francescana ដែលលំដាប់ផ្កាយ Michelin ៣ ត្រូវបានតែងតាំងជាអគ្គរដ្ឋទូតសុឆ្ឆន្ទៈរបស់ Unep ដើម្បីប្រយុទ្ធប្រឆាំងនឹងការខ្ជះខ្ជាយអាហារ និងការបាត់បង់៕

ប្រែសម្រួល៖ វីរបុត្រ
ប្រភព៖ BBC