ព័ត៌មានជាតិ

រោងចក្រច្នៃដំណាប់ស្វាយមួយកន្លែង ត្រូវមន្ទីរបរិស្ថានខេត្តប៉ៃលិនចាត់វិធានការណ៍ ក្រោយបញ្ចេញកាកសំណល់កខ្វក់ចូលប្រភពទឹកសាធារណៈ

បានផុស

២ សប្តាហ៍ មុន

នៅ

ថ្ងៃចន្ទ ១៧ មីនា ២០២៥

ដោយ

ប៉ៃលិន ៖ បន្ទាប់ពីប្រជាពលរដ្ឋក្នុងមូលដ្ឋានរាយការណ៍ថា មានករណីរោងចក្រកែច្នៃដំណាប់ស្វាយមួយកន្លែង បានបង្ហូរកាកសំណង់កខ្វក់ចូលប្រភពទឹកសាធារណៈ បណ្ដាលឱ្យងាប់ត្រី នៅថ្ងៃទី១៦ ខែមីនា ឆ្នាំ២០២៥ ក្រុមការងារជំនាញ នៃមន្ទីរបរិស្ថានខេត្តប៉ៃលិន សហការជាមួយរដ្ឋបាលស្រុកសាលាក្រៅបានចុះទៅ ពិនិត្យ៤ទីតាំង នៃក្រុមហ៊ុនកាងស៊ិនឡុងហ្វូត និង ទីតាំងមួយទៀតនៅក្នុងរោងចក្រផ្ទាល់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយពិនិត្យសមត្ថកិច្ចរកឃើញថា ទីតាំងក្រុមហ៊ុនកាងស៊ិនឡុងហ្វូត ដែលមានរោងចក្រកែច្នៃដំណាប់ស្វាយ ស្ថិតនៅភូមិអូររអិល ឃុំស្ទឹងកាច់ ស្រុកសាលាក្រៅ ខេត្តប៉ៃលិន បានបញ្ចេញសំណល់រាវមិនត្រឹមត្រូវតាមច្បាប់ ហើយសំណល់រាវរបស់រោងចក្រ ត្រូវបានរកឃើញមានសភាពល្អក់ មានក្លិនជូរ ផ្អូមខ្លាំង ចេញតាមលូរបស់រោងចក្រ ទៅក្នុងប្រភពលូទឹកសាធារណៈ បង្កឱ្យត្រីក្នុងអូរធម្មជាតិមានក្លិនជូរ ផ្អូមខ្លាំងនៅក្បែរនោះ។

ដើម្បីកុំឱ្យមានការបង្ហូរកាកសំណង់រាវកខ្វក់ចូលក្នុង ប្រភពទឹកសាធារណៈបន្តទៀត ក្រុមការងារជំនាញបរិស្ថាន បានធ្វើការអប់រំណែនាំ និងតម្រូវឱ្យអនុវត្តតាមច្បាប់ដូចតទៅ៖

១-តម្រូវឱ្យក្រុមហ៊ុនត្រូវបញ្ឈប់ការបញ្ចេញ សំណល់រាវ ចូលទៅប្រភពទឹកសាធារណៈ ដោយមិនបានឆ្លងកាត់ការធ្វើប្រតិកម្មត្រឹមត្រូវតាមបច្ចេកទេស ទោះក្នុងរូបភាព ឬគោលបំណងណាក៏ដោយ។ ២-ត្រូវរៀបចំកែសម្រួលអាងប្រព្រឹត្តិកម្មសំណល់រាវឱ្យបានត្រឹមត្រូវ ។

៣-ត្រូវរៀបចំរបាយការណ៍វាយតម្លៃផលប៉ះពាល់បរិស្ថាន និងសង្គម ឱ្យបានត្រឹមត្រូវ ។

៤-រាល់ដំណើរការរោងចក្រ ត្រូវអនុវត្តឱ្យបានត្រឹមត្រូវតាមច្បាប់ លិខិតបទដ្ឋាននានា ជៀសវាងបង្កផលប៉ះពាល់ដល់បរិស្ថាន សង្គម ជាពិសេសសុខភាព និងការរស់នៅរបស់ប្រជាពលរដ្ឋ។