កីឡា

ស្ថាប័នឃីកបុកស៊ីងពិភពលោក WKN ប្រកាសការចរចាចាប់ដៃគុនខ្មែរ

បានផុស

១ year មុន

នៅ

ថ្ងៃអង្គារ ៨ មេសា ២០២៥

ដោយ

សម្ព័ន្ធកីឡាប្រដាល់ឃីកបុកស៊ីងពិភពលោក (World Kickboxing Network) បានប្រកាសជាថ្មីពីដំណើរការកំពុងប្រព្រឹត្តនៃកិច្ចពិភាក្សាដើម្បីឈានឆ្ពោះទៅចាប់ដៃជាមួយ ស្ថាប័នប្រដាល់គុនខ្មែរជាផ្លូវការ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី៧ ខែមេសា ម្សិលមិញនេះ WKN បានប្រកាសថា ខ្លួនកំពុងស្ថិតនៅលើផ្លូវចរចាដើម្បីឲ្យក្លាយជាស្ថាប័នគុនខ្មែរសកលជាផ្លូវការ។ នេះជាការបោះជំហានដ៏ធំជាប្រវត្តិសាស្ត្រមួយសម្រាប់ការវិវត្ត និងការទទួលស្គាល់គុនខ្មែរលើឆាកអន្តរជាតិ។ សូមរង់ចាំព័ត៌មានលំអិតនាពេលដ៏ខ្លីខាងមុខ។

នៅពេលសហព័ន្ធគុនខ្មែរ និងសម្ព័ន្ធកីឡាឃីកបុកស៊ីងពិភពលោកចាប់ដៃគ្នាជាផ្លូវការ នោះមានន័យថា ស្ថាប័នគុនខ្មែរពិភពលោកនឹងរៀបចំការប្រកួតដណ្តើមខ្សែក្រវាត់គុនខ្មែរពិភពលោកជាផ្លូវការ។

ដំណឹងចរចានេះ តាមពិតទៅ ស្ថាប័ន WKN បានប្រកាសរួចម្តងហើយកាលពីថ្ងៃទី២ ខែមេសា ដោយបញ្ជាក់ពីថ្នាក់ដឹកនាំ របស់ខ្លួននឹងធ្វើដំណើរមកកាន់តំបន់អាស៊ី ជាពិសេសផ្តោតលើការអភិវឌ្ឍគុនខ្មែរនៅលើឆាកអន្តរជាតិតែម្តង។

ស្ថាប័នកីឡាឃីកបុកស៊ីងពិភពលោក WKN ត្រូវបានបង្កើតឡើងជាផ្លូវការកាលពីឆ្នាំ១៩៩៤ ដោយលោក Stephane Cabrera ដែលជាប្រធានបច្ចុប្បន្ន ហើយជាបុត្រសម្ព័ន្ធនៃស្ថាប័នប្រដាល់ ISKA (International Sport Kickboxing Association) ដែលបានទទួលស្គាល់គុនខ្មែរដែរ។

បច្ចុប្បន្ន ស្ថាប័នមួយនេះមានសមាជិកជាច្រើនប្រទេសទូទាំងពិភពលោក ហើយមានកីឡាករ កីឡាការិនីជាម្ចាស់ផ្ទះខ្សែក្រវាត់ជាច្រើនទៅតាមប្រភេទទម្ងន់ និងប្រភេទវិញ្ញាសា ដូចជា ប្រភេទ Full Contact, Kickboxing, Orientaal Rules, K-1 Rules និង មួយថៃ៕