ព័ត៌មានអន្ដរជាតិ

ជនស៊ីវិលមីយ៉ាន់ម៉ាបន្តរងគ្រោះ ក្នុងការបំពានបទឈប់បាញ់ដែលបានប្រកាសក្រោយរញ្ជួយដី

បានផុស

១ year មុន

នៅ

ថ្ងៃអង្គារ ៨ មេសា ២០២៥

ដោយ

ការវាយប្រហារដោយយន្តហោះចម្បាំងរបស់របបយោធាមីយ៉ាន់ម៉ាបានសម្លាប់មនុស្សយ៉ាងហោចណាស់៣នាក់នៅក្នុងតំបន់រញ្ជួយដី ដែលជាសកម្មភាពបំពានបទឈប់បាញ់ដែលខ្លួនបានប្រកាសថា ចូលជាធរមានរហូតដល់ថ្ងៃទី២២ខែមេសា។ នេះបើយោងតាមការចេញផ្សាយរបស់ The Irrawaddy កាលពីថ្ងៃ០៧ខែមេសា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មានខាងលើ បានសម្ភាសន៍អ្នកស្រុក ដែលបានអះអាងថា ជនស៊ីវិលបីនាក់ក្នុងវ័យចន្លោះពី៥០ទៅ៦០ឆ្នាំបានស្លាប់ និងស្ត្រី២នាក់បានរងរបួស ដោយសារទាហានឆ័ត្រយោងយោធាម្នាក់បានទម្លាក់គ្រាប់បែកពីរគ្រាប់ទៅលើភូមិ Thonepanhla ក្នុងសង្កាត់ Chaung-U ទីក្រុង Sagaing នៅម៉ោងប្រហែល១១ៈ៣០ នាទីយប់ថ្ងៃអាទិត្យ ដែលវាក៏ជាតំបន់រងគ្រោះរញ្ជួយដីផងដែរ។

ការវាយប្រហារនៅតំបន់គ្រោះមហន្តរាយរញ្ជួយដីនេះនៅតែបន្តកើតឡើង បើទោះបីជារបបនេះបានប្រកាសបទឈប់បាញ់រហូតដល់ថ្ងៃទី ២២ ខែមេសា ដើម្បីជួយសម្រួលដល់កិច្ចខិតខំប្រឹងប្រែងសង្គ្រោះ និងការស្តារឡើងវិញក្រោយរញ្ជួយដីក៏ដោយ។

គួរបញ្ជាក់ថា ក្រោយរងគ្រោះរញ្ជួយដីដ៏ធ្ងន់ធ្ងរកាលពីថ្ងៃសុក្រទី២៨ខែមីនា របបយោធាមីយ៉ាន់ម៉ាបានប្រកាសបទឈប់បាញ់បណ្ដោះអាសន្នរហូតដល់ថ្ងៃទី២២ខែមេសា រីឯក្រុមប្រដាប់អាវុធដែលប្រឆាំងរបបនេះក៏បានប្រកាសបទឈប់បាញ់ជាឯកតោភាគីរយៈពេលមួយខែផងដែរ។ ទោះយ៉ាងណារបបនេះនៅតែបន្តការវាយប្រហារតាមរយៈការបាញ់ផ្លោងនិងតាមអាកាស ជាញឹកញាប់ដែលបំពានបទឈប់បាញ់។

កាលពីយប់ថ្ងៃទី០៥ខែមេសាកងកម្លាំងរបបសឹកមីយ៉ាន់ម៉ាក៏បានបាញ់ផ្លោងទៅលើភូមិមួយនៅជិត Myitche ក្នុងតំបន់ទីប្រជុំជន Pakokku របស់ទីក្រុង Magwe ដោយបានដុតបំផ្លាញផ្ទះប្រមាណ១៧ខ្នង និងបង្ខំអ្នកស្រុកជាច្រើនឱ្យភៀសខ្លួន។

កាលពីថ្ងៃទី០២ខែមេសា ទារកអាយុ៣ខែ និងកុមារអាយុ ១០ ឆ្នាំម្នាក់បានស្លាប់ដោយសារយន្តហោះចម្បាំងរបស់របបយោធាបានទម្លាក់គ្រាប់បែកចំនួន ៣ គ្រាប់ទៅលើភូមិ Nae Ka ក្នុងក្រុង Papun រដ្ឋ Karenនេះបើយោងតាមសហភាពជាតិ Karen កាលពីថ្ងៃចន្ទ។ ក្រុមបដិវត្តន៍ជនជាតិភាគតិចក៏បានឲ្យដឹងថា ការវាយប្រហារតាមអាកាសក៏បានធ្វើឱ្យជនស៊ីវិលពីរនាក់ផ្សេងទៀតរងរបួស និងបានបំផ្លាញផ្ទះនៅក្នុងភូមិ។

សូមបញ្ជាក់ថារហូតមកដល់ពេលនេះគ្រោះរញ្ជួយដីកម្រិត៧.៧រ៉ិចទ័រដែលបានប្រហារប្រទេសមីយ៉ាន់ម៉ាបានសម្លាប់មនុស្សលើសពី៤ពាន់នាក់ហើយ ខណៈរាប់សិបនាក់ទៀតនៅតែបាត់ខ្លួនក្រោមគំនរបាក់បែក។ ក្រុមជួយសង្គ្រោះដែលមកពីប្រទេសផ្សេងៗនៅតែបន្តប្រតិបត្តិការស្រង់សាកសពរហូតមកដល់ពេល។ ចំណែកប្រជាជនដែលរងផលប៉ះពាល់ក្រោយរញ្ជួយដីកំពុងត្រូវការជំនួយមនុស្សធម៌ជាបន្ទាន់ ខណៈពួកគេបាត់បង់ផ្ទះសម្បែង នាំគ្នាស្នាក់នៅតាមដងផ្លូវនិងទីសាធារណៈដែលប្រឈមនឹងហានិភ័យផ្សេងៗទៀត៕