ប្រទេសអ្នកមាន យល់ព្រមផ្តល់ប្រាក់៣០០ពាន់លានដុល្លារ ក្នុងមួយឆ្នាំ ជួយប្រទេសអ្នកក្រ ប្រយុទ្ធប្រឆាំងបម្រែបម្រួលអាកាសធាតុ

តាមសេចក្តីរាយការណ៍ថ្ងៃអាទិត្យទី២៤ខែវិច្ឆិកាឆ្នាំ២០២៤, គណៈប្រតិភូនៃប្រទេសអ្នកមាននៅឯសន្និសីទអាកាសធាតុអង្គការសហប្រជាជាតិ « COP29 » បានព្រមព្រៀងកំណត់គោលដៅនៃការបញ្ចេញប្រាក់យ៉ាងតិច៣០០ពាន់លានដុល្លារជារៀងរាល់ឆ្នាំ ដើម្បីជួយប្រទេសក្រីក្រ ប្រយុទ្ធប្រឆាំងបម្រែបម្រួលអាកាសធាតុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងកិច្ចប្រជុំរាប់ម៉ោងនៅទីក្រុងបាគូ នៃប្រទេសអាស៊ែរបៃហ្សង់, គណៈប្រតិភូបានពិភាក្សាគ្នាយ៉ាងតឹងសរសៃ.ក រៀងៗខ្លួន ដោយអ្នកខ្លះក៏សម្តែងការមិនពេញចិត្តផងដែរ។ ប៉ុន្តែយ៉ាងណា ក្រោយមានការសម្របសម្រួល ទើបកិច្ចព្រមព្រៀងនេះបានឈានដល់។

ទឹកប្រាក់៣០០ពាន់លានដុល្លារនេះ នឹងចែកទៅឲ្យប្រទេសកំពុងអភិវឌ្ឍន៍ ដែលជួយឲ្យពួកគេផ្តាច់ខ្លួនចេញពីការប្រើប្រាស់ធ្យូងថ្ម ប្រេងនិងឧស្ម័ន ដែលបណ្តាលឲ្យពិភពលោកឡើងកម្តៅ។ ម្យ៉ាងវិញទៀត ទឹកប្រាក់ទាំងនេះ នឹងជួយឲ្យពួកគេសម្របខ្លួនទៅនឹងការឡើងកម្តៅថ្ងៃនាពេលអនាគត និងចំណាយលើការខូចខាតដែលបណ្តាលមកពីអាកាសធាតុអាក្រក់។

ត្បិតតែទឹកប្រាក់នេះ មិនបានដល់១.៣ទ្រីលានដុល្លារ តាមការស្នើសុំពីសំណាក់ប្រទេសក្រីក្រក៏ដោយ ប៉ុន្តែវាមានចំនួនលើសកិច្ចព្រមព្រៀងឆ្នាំ២០០៩ ដល់ទៅ៣ដងឯណោះ។

លោក Eamon Ryan រដ្ឋមន្ត្រីក្រសួងបរិស្ថានអៀរឡង់ បានហៅកិច្ចព្រមព្រៀងនេះថាជា ការធូរស្រាលបានមួយកម្រិតធំ។ លោកនិយាយថា «នេះ​ជារឿង​លំបាក! ដោយសារតែឥឡូវពិភពលោកកំពុងបែកបាក់គ្នា មានសង្រ្គាមនិងប្រព័ន្ធពហុភាគី, យើងអាចឆ្លងកាត់បញ្ហានៅក្នុងកាលៈទេសៈដ៏លំបាកបែបនេះគឺវាល្អណាស់ពេកទៅហើយ»។

កិច្ចព្រមព្រៀងនេះ ត្រូវគេមើលឃើញថា ជាជំហានមួយឆ្ពោះទៅរកការជួយប្រទេសនានាឲ្យបង្កើតគោលដៅដែលមានមហិច្ឆតាបន្ថែមទៀត ហើយវាគឺជាផ្នែកមួយនៃផែនការដើម្បីបន្តកាត់បន្ថយការបំពុលជាមួយនឹងគោលដៅថ្មីរៀងរាល់ប្រាំឆ្នាំម្តង ដែលពិភពលោកបានយល់ព្រមក្នុងកិច្ចពិភាក្សានៅទីក្រុងប៉ារីសកាលពីឆ្នាំ២០១៥។

កាលនោះ កិច្ចព្រមព្រៀងទីក្រុងប៉ារីសបានដាក់មហិច្ឆតាប្រយុទ្ធនឹងអាកាសធាតុ ពោលគឺរក្សាការឡើងកម្តៅផែនដីនៅក្រោម១.៥អង្សាសេ លើសពីកម្រិតមុនឧស្សាហកម្ម។ ទោះបីជាយ៉ាងណាក៏ដោយ ផែនការនោះហាក់មិនទទួលជោគជ័យឡើយ ដោយកម្តៅសកលចេះតែបន្តកើនឡើងដដែល៕

អត្ថបទ៖ សុខ សុវណ្ណ

ចុចអាន៖ ជិត២០០ប្រទេសនៅ COP28 ឈានដល់កិច្ចព្រមព្រៀងកាត់បន្ថយ ការប្រើប្រាស់ឥន្ធនៈហ្វូស៊ីល