ព័ត៌មានអន្ដរជាតិ

បារាំង ប្រឆាំងការរំលាយកងទ័ពអ៊ុយក្រែន ក្រោយបទឈប់បាញ់

បានផុស

២ សប្តាហ៍ មុន

នៅ

ថ្ងៃពុធ ១២ មីនា ២០២៥

ដោយ

Chheang

រដ្ឋមន្ត្រីការពារជាតិបារាំងលោក Sébastien Lecornu បានបញ្ជាក់យ៉ាងម៉ឺងម៉ាត់ថា បារាំងនឹងប្រឆាំងរាល់ «ការរំលាយកងទ័ពអ៊ុយក្រែន» ក្រោយបទឈប់បាញ់ ដោយសង្កត់ធ្ងន់ថា យោធាអ៊ុយក្រែនដ៏រឹងមាំគឺចាំបាច់សម្រាប់សន្តិសុខរបស់ប្រទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសនេះ ត្រូវបានធ្វើឡើងក្នុងអំឡុងការជួបជុំដ៏កម្រមួយក្នុងទីក្រុងប៉ារីសកាលពីថ្ងៃទី១១ខែមីនា ដែលជាកន្លែងមេបញ្ជាការការពារជាតិជាង ៣០រូបមកពីអង្គការណាតូ រដ្ឋសមាជិកសហភាពអឺរ៉ុប ជប៉ុន និងអូស្ត្រាលី បានជួបប្រជុំគ្នាដើម្បីពិភាក្សាអំពីជម្លោះដែលកំពុងកើតឡើងនៅអ៊ុយក្រែន។

កិច្ចប្រជុំនេះមិនរាប់បញ្ចូលវត្តមានសមភាគីអាមេរិកឡើយ ហើយវាបានឆ្លុះបញ្ចាំងពីការព្រួយបារម្ភអំពីជំហរដែលមិនអាចទាយទុកជាមុនបានរបស់ប្រធានាធិបតីអាមេរិក លោក ដូណាល់ ត្រាំ និងទំនាក់ទំនងនាពេលថ្មីៗនេះជាមួយទីក្រុងមូស្គូ។ ការពិភាក្សាបានផ្តោតលើយុទ្ធសាស្ត្រដើម្បីធានាសន្តិសុខរបស់អ៊ុយក្រែនក្រោយបទឈប់បាញ់ ការរក្សាកម្លាំងយោធារបស់ទីក្រុងកៀវ និងការស្វែងយល់ពីសក្តានុពលនៃការដាក់ពង្រាយកងកម្លាំងរក្សាសន្តិភាពអឺរ៉ុប។

រដ្ឋមន្ត្រីការពារជាតិបារាំង បាននិយាយថា៖ «ខ្ញុំសូមបញ្ជាក់ម្តងទៀតនៅទីនេះនៅចំពោះមុខសារព័ត៌មាន។ សន្តិសុខរបស់អ៊ុយក្រែនត្រូវតែមកមុន។ យើងបដិសេធនូវរាល់ការរំលាយកងកម្លាំងអ៊ុយក្រែន»។ លោក Lecornu បានបន្ថែមថា កងទ័ពអ៊ុយក្រែន គឺជាការធានាសន្តិសុខដ៏សំខាន់។

ចំណែកឯប្រធានាធិបតីបារាំងលោក Emmanuel Macron ក៏បានគាំទ្រគំនិតនេះផងដែរ ដោយចាត់ទុកការទាមទាររបស់រុស្ស៊ីចំពោះការរំលាយវត្តមានយោធារបស់អ៊ុយក្រែនថាជារឿងដែលមិនអាចទទួលយកបាន។ លោកបានគូសបញ្ជាក់ថា លក្ខខណ្ឌបែបនេះនឹងធ្វើឲ្យប៉ះពាល់ដល់អធិបតេយ្យភាពរបស់អ៊ុយក្រែន និងមិនអាចអត់ឱនបានសម្រាប់ទាំងអ៊ុយក្រែន និងសម្ព័ន្ធមិត្តរបស់ពួកគេ។

លោក ហ្សេលេនស្គី និងកងទ័ពអ៊ុយក្រែន (រូបថត៖ Getty)

គួរបញ្ជាក់ថា នៅគ្រាដំបូងនៃការឈ្លានពានពេញលេញរបស់ខ្លួន រុស្ស៊ីបានទាមទារឲ្យអ៊ុយក្រែនកាត់បន្ថយកងទ័ពឲ្យនៅសល់ត្រឹម ៥០ ០០០នាក់។ ទន្ទឹមនោះ ទីក្រុងមូស្គូ ក៏បានឲ្យទីក្រុងកៀវ «មិនត្រូវអភិវឌ្ឍ ផលិត ទិញ ឬដាក់ពង្រាយអាវុធមីស៊ីលគ្រប់ប្រភេទ ដែលមានរយៈចម្ងាយឆ្ងាយជាង ២៥០គីឡូម៉ែត្រនៅលើទឹកដីរបស់ខ្លួន»។

អ៊ុយក្រែន បានបញ្ជាក់ម្តងហើយម្តងទៀតពីតម្រូវការធានាសន្តិសុខក្នុងព្រឹត្តិការណ៍បទឈប់បាញ់ក្នុងសង្គ្រាមជាមួយរុស្ស៊ី។

ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី ពីមុនបានសង្កត់ធ្ងន់ពីតម្រូវការសម្រាប់កងទ័ពចំនួន ១,៥លាននាក់ ប្រសិនបើអ៊ុយក្រែនមិនត្រូវបានអនុញ្ញាតឲ្យចូលទៅក្នុងអង្គការណាតូ។ យោងតាមលោក ហ្សេលេនស្គី កងទ័ពអ៊ុយក្រែនបច្ចុប្បន្នមានចំនួន ៨៨០ ០០០នាក់ ច្រើនជាងគេបំផុតនៅអឺរ៉ុប៕

ដោយ៖ ឈាង