ព័ត៌មានអន្ដរជាតិ

អាមេរិកបញ្ជូននាវាពិឃាត USS Milius ទៅជិតប្រទេសអ៊ីរ៉ង់ ចំពេលមានភាពតានតឹង

បានផុស

២ សប្តាហ៍ មុន

នៅ

ថ្ងៃអង្គារ ៦ ឧសភា ២០២៥

ដោយ

Chheang

យោងតាមការចុះផ្សាយរបស់សារព័ត៌មាន Newsmax កាលពីថ្ងៃទី៥ខែឧសភាឆ្នាំ២០២៥ កងទ័ពជើងទឹកសហរដ្ឋអាមេរិក បានដាក់ពង្រាយឡើងវិញនូវនាវាពិឃាត USS Milius ដែលជានាវាបំពាក់ប្រព័ន្ធមីស៊ីលប្រយុទ្ធ Aegis ទៅកាន់តំបន់មជ្ឈិមបូព៌ាក្បែរប្រទេសអ៊ីរ៉ង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សកម្មភាពយុទ្ធសាស្ត្រនេះ គូសបញ្ជាក់អំពីការប្តេជ្ញាចិត្តរបស់អាមេរិក ក្នុងការពង្រឹងវត្តមានយោធារបស់ខ្លួននៅក្នុងតំបន់ ចំពេលមានភាពតានតឹងកាន់តែខ្លាំងជាមួយទីក្រុងតេហេរ៉ង់។

ពីមុន នាវា USS Milius បានឈរជើងនៅប៉ាស៊ីហ្វិកខាងលិច ហើយឥឡូវនេះបានចូលរួមជាមួយក្រុមនាវាផ្ទកយន្តហោះចម្បាំង USS Carl Vinson ដែលប្រតិបត្តិការនៅក្នុងដែនទឹកមជ្ឈិមបូព៌ា។ ការដាក់ពង្រាយនេះ ស្របតាមជំហរកាន់តែរឹងមាំរបស់អាមេរិក ដើម្បីទប់ស្កាត់ការឈ្លានពានរបស់អ៊ីរ៉ង់ និងគាំទ្រប្រតិបត្តិការដែលកំពុងបន្តប្រឆាំងនឹងក្រុមហ៊ូធី ដែលជាក្រុមឧទ្ទាមមានការគាំទ្រដោយអ៊ីរ៉ង់នៅប្រទេសយេម៉ែន។

ថ្មីៗនេះ រដ្ឋមន្ត្រីការពារជាតិអាមេរិក លោក Pete Hegseth បានពង្រីកការដាក់ពង្រាយនាវាផ្ទុកយន្តហោះ USS Harry S. Truman និងក្រុមវាយប្រហារនៅក្នុងតំបន់។ នាវា Truman កំពុងប្រតិបត្តិការនៅសមុទ្រក្រហម ខណៈនាវា USS Carl Vinson ឈរជើងនៅឈូងសមុទ្រអេឌែន។ ការដាក់ពង្រាយទាំងនេះគាំទ្រដល់ការបន្តប្រតិបត្តិការយោធាប្រឆាំង និងរារាំងក្រុមហ៊ូធី ដែលបានកំណត់គោលដៅលើនាវាចរណ៍នៅសមុទ្រក្រហម។

អាមេរិកបាននិងកំពុងធ្វើការវាយប្រហារតាមអាកាសជារៀងរាល់ថ្ងៃក្រោមប្រតិបត្តិការ«Rough Rider» ចាប់តាំងពីថ្ងៃទី១៥ខែមីនា ដោយផ្តោតលើទីតាំងក្រុមហ៊ូធី។ ប្រតិបត្តិការនេះ ត្រូវបានគេរាយការណ៍ថាបានវាយប្រហារលើគោលដៅជាង ១ ០០០ទីតាំង ដែលមានគោលបំណងបង្ក្រាបការគំរាមកំហែងរបស់ហ៊ូធី ចំពោះពាណិជ្ជកម្មដែនសមុទ្រ។

សូមបញ្ជាក់ថា មន្ទីរបញ្ចកោណ បានពង្រឹងវត្តមានរបស់អាមេរិកនៅក្នុងតំបន់ ជុំវិញភាពតានតឹងដើម្បីឈានដល់កិច្ចព្រមព្រៀងអាវុធនុយក្លេអ៊ែរជាមួយអ៊ីរ៉ង់។ ប្រធានាធិបតីអាមេរិក ដូណាល់ ត្រាំ បានព្រមានថា អ៊ីរ៉ង់នឹងត្រូវរងការវាយប្រហារ បើកិច្ចព្រមព្រៀងដើម្បីបញ្ឈប់ទីក្រុងតេហេរ៉ង់ពីការទទួលបានអាវុធប្រល័យលោកបរាជ័យ៕

ប្រែសម្រួល៖ ឈាង

ចុចអាន៖ អ៊ីរ៉ង់ បញ្ចេញមីស៊ីលបាលិស្ទិកថ្មី ចំពេលភាពតានតឹងជាមួយអ៊ីស្រាអែលកើនឡើង