ព័ត៌មានអន្ដរជាតិ

យោធាអ៊ីស្រាអែលតាមសម្លាប់សមាជិកក្រុមហាម៉ាសចូលដល់ទឹកដីស៊ីរី

បានផុស

២ ខែ មុន

នៅ

ថ្ងៃចន្ទ ៩ មិថុនា ២០២៥

ដោយ

កងទ័ពអាកាសអ៊ីស្រាអែល បានបើកការវាយប្រហារមួយទៀតលើប្រទេសស៊ីរីភាគខាងត្បូងដោយអះអាងថា បានសម្លាប់សមាជិកក្រុមហាម៉ាសម្នាក់នៅក្នុងតំបន់ Mazraat Beit Jin។ នេះបើយោងតាមការចេញផ្សាយរប់សារព័ត៌មាន Al Jazeera នៅថ្ងៃទី០៩ខែមិថុនានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការវាយប្រហារនេះបានបណ្តាលឲ្យមនុស្សស្លាប់ម្នាក់ និងពីរនាក់ទៀតរងរបួស ដែលជាការវាយប្រហារចុងក្រោយបង្អស់នៅក្នុងប្រតិបត្តិការរបស់អ៊ីស្រាអែលជាបន្តបន្ទាប់ចូលទៅក្នុងប្រទេសស៊ីរី បន្ទាប់ពីការទម្លាក់អតីតប្រធានាធិបតី Bashar al-Assad កាលពីខែធ្នូឆ្នាំមុន។

យោងតាមអង្គការឃ្លាំមើលសិទ្ធិមនុស្សស៊ីរី អ៊ីស្រាអែល បានធ្វើការវាយប្រហារចំនួន៦១លើក នៅក្នុងទឹកដីស៊ីរីក្នុងឆ្នាំនេះ។ ភាពតានតឹងបានកើនឡើងបន្ថែមទៀត បន្ទាប់ពីគ្រាប់រ៉ុក្កែតពីរគ្រាប់ត្រូវបានបាញ់ចេញពីប្រទេសស៊ីរី ចូលទៅក្នុងទឹកដីអ៊ីស្រាអែលកាលពីដើមសប្តាហ៍នេះ ជាមួយនឹងការទទួលខុសត្រូវដែលត្រូវបានអះអាងដោយក្រុមសកម្មប្រយុទ្ធដែលមិនសូវស្គាល់ចំនួនពីរ។ ជាការឆ្លើយតប អ៊ីស្រាអែល បានបើកការវាយប្រហារសងសឹក ដោយធ្វើឱ្យស៊ីរីទទួលខុសត្រូវដោយផ្ទាល់។

រដ្ឋមន្ត្រីការបរទេសថ្មីរបស់ស៊ីរីលោក Asaad al-Shaibani បានថ្កោលទោសការវាយប្រហារនេះជាការបង្កហេតុដែលមានគោលបំណងធ្វើឱ្យមានអស្ថិរភាពដល់ការស្តារឡើងវិញដ៏ផុយស្រួយរបស់ប្រទេសស៊ីរី។ ទោះបីជាស៊ីរី និងអ៊ីស្រាអែលថ្មីៗនេះបានជួបពិភាក្សាដោយប្រយោល ដើម្បីកាត់បន្ថយភាពតានតឹងក៏ដោយ ក៏អ៊ីស្រាអែលនៅតែធ្វើការវាយប្រហារ។ រដ្ឋាភិបាលអ៊ីស្រាអែលនិយាយថា ខ្លួនព្រួយបារម្ភអំពីមេដឹកនាំថ្មីរបស់ស៊ីរី គឺលោកប្រធានាធិបតី Ahmed al-Sharaa ហើយហៅគាត់ថាជា «ក្រុមជីហាដ» ។

ទន្ទឹមនឹងនេះ ស៊ីរីបានចាប់ផ្តើមជំហានឆ្ពោះទៅរកការធ្វើសមាហរណកម្មទៅក្នុងសហគមន៍អន្តរជាតិឡើងវិញ បន្ទាប់ពីទណ្ឌកម្មរបស់សហរដ្ឋអាមេរិក និងសហភាពអឺរ៉ុបត្រូវបានដកចេញ ដែលនេះជាសញ្ញាបង្ហាញផ្លូវដែលអាចឈានទៅដល់ការកសាងឡើងវិញបន្ទាប់ពីសង្គ្រាមស៊ីវិលជាច្រើនឆ្នាំ៕