ក្រុមហ៊ូធី ប្រកាសសង្គ្រាមជាមួយ អាមេរិក

ក្រុមហ៊ូធី បានប្រកាសសង្គ្រាមជាមួយអាមេរិក ដោយខ្លួននឹងចូលជួយទីក្រុងតេហេរ៉ង់ ក្នុងការប្រយុទ្ធបន្ទាប់ពីទីក្រុងវ៉ាស៊ីនតោន បើកប្រតិបត្តិការ Midnight Hammer វាយប្រហាររោងចក្រនុយក្លេអ៊ែរអ៊ីរ៉ង់ចំនួន៣កន្លែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្តីប្រកាសកាលពីថ្ងៃអាទិត្យទី២២ខែមិថុនាឆ្នាំ២០២៥ អ្នកនាំពាក្យចលនាប្រដាប់អាវុធមានមូលដ្ឋាននៅប្រទេសយេម៉ែនមួយនេះ គឺលោក Yahya Saree និយាយថា «យេម៉ែន បានចូលរួមជាផ្លូវការហើយក្នុងសង្គ្រាមជាមួយអាមេរិកនិងអ៊ីស្រាអែល។ សូមយកនាវារបស់អ្នក ទៅដាក់ឲ្យឆ្ងាយពីដែនទឹករបស់យើង»។

ហ៊ូធីគឺជាសមាជិកនៃក្រុម «Axis of Resistance» ដែលមានការឧបត្ថម្ភ ផ្គត់ផ្គង់និងគាំទ្រពីសំណាក់អ៊ីរ៉ង់ ហើយតែងប្រឆាំងជានិច្ចចំពោះសកម្មភាពអាមេរិកនិងអ៊ីស្រាអែលនៅតំបន់មជ្ឈិមបូព៌ា។

ជាក់ស្តែង ចាប់តាំងពីសង្គ្រាមអ៊ីស្រាអែល-ហាម៉ាស ផ្ទុះឡើងនៅប៉ាឡេស្ទីនក្នុងខែតុលាឆ្នាំ២០២៣មក ក្រុមហ៊ូធី បានវាយប្រហារមិនដកដៃលើកប៉ាល់ពាណិជ្ជកម្មនិងនាវាចម្បាំង នៅសមុទ្រក្រហម។

ក្រុមហ៊ូធី បានបង្កើតឡើងក្នុងទសវត្សរ៍ឆ្នាំ១៩៩០ ហើយត្រូវគេស្គាល់ជាផ្លូវការថា Ansar Allah (អ្នកគាំទ្រព្រះអាឡស់)។ ដើមឡើយ ពួកគេគឺជាចលនាស្តារវប្បធម៌និកាយ Zaydi នៃសាសនាឥស្លាម។ គិតត្រឹមឆ្នាំ២០២២ ប្រជាជនយេម៉ែនប្រហែល៣៥%គឺកាន់និកាយ Zaydi។

ដោយមានការគាំទ្រពីអ៊ីរ៉ង់ ក្រុមហ៊ូធីបានចាប់ផ្តើមយុទ្ធនាការមួយក្នុងឆ្នាំ២០១១ ប្រឆាំងរដ្ឋាភិបាលរបស់ប្រធានាធិបតី Abd-Rabbu Mansour Hadi បញ្ឆេះឲ្យមានសង្រ្គាមស៊ីវិលបង្ហូរឈាម ដែលអូសបន្លាយមកដល់សព្វថ្ងៃនេះ។

ក្រោយមក ហ៊ូធីបានចងសម្ព័ន្ធភាពជាមួយកងកម្លាំងរបស់អតីតប្រធានាធិបតី Ali Abdullah Saleh ដែលគ្រប់គ្រងរដ្ឋធានី សាណា និងខេត្តជាច្រើននៅភាគខាងជើងប្រទេសយេម៉ែន បង្ខំឲ្យប្រធានាធិបតី Hadi ភៀសខ្លួនទៅក្រៅប្រទេស។

ក្រុមហ៊ូធី មានកម្លាំងយោធាយ៉ាងធំសម្បើម ដោយមានយុទ្ធជនប្រមាណ ៣៥០ ០០០នាក់និងឃ្លាំងអាវុធចម្រុះរាប់ចាប់ពីមីស៊ីលបាលិស្ទិកនិងមីស៊ីលគ្រូស ដល់យន្តហោះគ្មានមនុស្សបើក។

ក្នុងចំណោមអាវុធដ៏មានឥទ្ធិពលបំផុតរបស់ក្រុមនេះ គឺមីស៊ីលបាលិស្ទិក Typhoon ដែលស្រដៀងទៅនឹងមីស៊ីល Qadr ផលិតដោយអ៊ីរ៉ង់ មានរយៈចម្ងាយហោះហើរពី ១ ៦០០ ទៅ ១ ៩០០គីឡូម៉ែត្រ៕

អត្ថបទ៖ សុខ សុវណ្ណ

ចុចអាន៖ មេទ័ពអ៊ីរ៉ង់ ចេញមុខគំរាមសងសឹកអាមេរិក ជាមួយកម្លាំងដ៏ខ្លាំងបំផុត