សូរិយា ជុន​​ហ្គ្រុនហ្គ្រីងគីត ដែល​ឡើងកាន់តំណែងជានាយករដ្ឋមន្ត្រី​ស្ដីទី​របស់​ថៃ ជានរណា?

បន្ទាប់ពីបញ្ជារបស់តុលាការធម្មនុញ្ញ​ឲ្យ​ព្យួរ​តំណែង​នាយករដ្ឋមន្ត្រី​របស់​លោកស្រី ផែថង​ថាន ស៊ីណាវ៉ាត្រ (Paetongtarn Shinawatra) អ្នក​នយោបាយជើងចាស់ សូរិយា ជុន​​ហ្គ្រុនហ្គ្រីងគីត (Suriya Juangroongruangkit) ត្រូវបានតែងតាំងជានាយករដ្ឋមន្ត្រីស្តីទី ដែលទទួលភារកិច្ចដឹកនាំរដ្ឋាភិបាលក្នុងអំឡុងពេលដ៏រសើបផ្នែកនយោបាយ។

លោក សូរិយា ដែលបច្ចុប្បន្នមានតួនាទីជាឧបនាយករដ្ឋមន្ត្រី និងជារដ្ឋមន្ត្រីក្រសួងដឹកជញ្ជូន ត្រូវបានគេចាត់ទុកថាជាឥស្សរជនប្រកបដោយប្រសិទ្ធភាព និងមានបទពិសោធន៍ក្នុងនយោបាយថៃ។ ការដឹកនាំបណ្ដោះអាសន្នរបស់គាត់ត្រូវបានគេរំពឹងថានឹងផ្តល់នូវស្ថិរភាព ខណៈពេលដែលតុលាការកំពុង​ពិនិត្យមើលការប្រឈមផ្លូវច្បាប់ប្រឆាំងនឹងលោកស្រី ផែនថងថាន ទាក់ទិន​នឹង​ការ​បែក​ធ្លាយ​វីដេអូឃ្លីបនៃការសន្ទនាជាមួយ​សម្តេច​តេជោ​ ហ៊ុន សែន ប្រធានព្រឹទ្ធសភាកម្ពុជា​កាលថ្ងៃទី​១៧ខែ​មិថុនា​។

🧑‍💼 សូរិយា ជុន​​ហ្គ្រុនហ្គ្រីងគីត ជានរណា?

លោក សូរិយា កើតនៅឆ្នាំ​១៩៥៤ បានកាន់តំណែងជាន់ខ្ពស់នៅទូទាំងរដ្ឋបាលប្រទេសថៃអស់រយៈពេលជាង ២ទសវត្សរ៍។ គាត់បានទទួលសញ្ញាប័ត្រវិស្វកម្មពីសាកលវិទ្យាល័យកាលីហ្វ័រញ៉ា Berkeley មុនពេលត្រឡប់ទៅប្រទេសថៃដើម្បីចូលប្រឡូកក្នុងវិស័យនយោបាយ។

អាជីព​នយោបាយ​ដ៏​យូរ​របស់​គាត់​ មាន​ទាំង​រដ្ឋាភិបាលសម័យ​ថាក់ស៊ីន និងក្រុម​ចម្រុះ​គាំទ្រ​ដោយ​​យោធា។ គាត់បានបម្រើជា៖

• រដ្ឋមន្ត្រីក្រសួងឧស្សាហកម្ម ក្រោមការដឹកនាំរបស់នាយករដ្ឋមន្ត្រីថាក់ស៊ីន ស៊ីណាវ៉ាត្រ និងប្រាយុទ្ធ ចាន់អូចា
• រដ្ឋមន្ត្រីក្រសួងដឹកជញ្ជូន នៅក្នុងរដ្ឋបាលជាច្រើន ដែលថ្មីៗនេះស្ថិតក្រោមការដឹកនាំរបស់​លោកស្រី ផែនថងថាន ក្នុងឆ្នាំ​២០២៣
• ឧបនាយករដ្ឋមន្ត្រី តាំងពីឆ្នាំ២០២៤

លោក សូរិយា ដែលជាអ្នកបច្ចេកទេសដ៏មានបទពិសោធន៍ម្នាក់ ត្រូវបានគេស្គាល់ដោយសារការងាររបស់គាត់លើគម្រោងដឹកជញ្ជូន និងការអភិវឌ្ឍ​ឧស្សាហកម្មសំខាន់ៗ រួមទាំងការកែលម្អផ្លូវដែកទូទាំងប្រទេស និងការពង្រីកតំបន់ឧស្សាហកម្ម។

គាត់ក៏មានទំនាក់ទំនងនយោបាយដ៏រឹងមាំផងដែរ ជាពិសេសក្នុងនាមជា​ពូរបស់លោក Thanathorn Juangroongruangkit ដែលជាស្ថាបនិកនៃគណបក្សអនាគតឆ្ពោះទៅមុខ(Future Forward Party) ទោះបីផ្លូវនយោបាយរបស់ពួកគេខុសគ្នាក៏ដោយ។

🧭 ហេតុអ្វីបានត្រូវជ្រើសរើសគាត់​ឲ្យកាន់​តំណែង​នាយករដ្ឋមន្ត្រី​ស្ដីទី?

ខណៈលោកស្រី ផែនថងថាន ត្រូវ​បាន​ព្យួរ​ពី​តំណែង​ដោយ​រង់ចាំ​ការ​ស៊ើបអង្កេត​របស់​តុលាការ​ធម្មនុញ្ញ លោក សូរិយា គឺជា​សមាជិក​គណៈរដ្ឋមន្ត្រី​ដែលមាន​ឋានៈ​ខ្ពស់ និង​មានបទពិសោធន៍​ច្រើនជាងគេ​ដែល​អាច​ចូលកាន់​តំណែង។ ការដឹកនាំរបស់គាត់ត្រូវបានគេមើលឃើញថាជាជម្រើសប្រកបដោយសុវត្ថិភាព និងស្ថិរភាព ដែលអាចជួយទប់ស្កាត់ការប្រែប្រួលនយោបាយបន្ថែមទៀតក្នុងអំឡុងពេលស៊ើបអង្កេត​រយៈពេល​ ១៥​ថ្ងៃ​របស់​តុលាការ​ធម្មនុញ្ញ៕

ដោយ៖ ឈាង