តើពាក្យថា “ឯកអគ្គរាជទូត” ឬ “ឯកអគ្គរដ្ឋទូត” ប្រើក្នុងន័យបែបណា?

មនុស្សមួយចំនួនបានដឹងរួចមកហើយថា ពាក្យ “ឯកអគ្គរាជទូត” ឬ “ឯកអគ្គរដ្ឋទូត” ត្រូវបានប្រើប្រាស់ក្នុងអត្ថន័យបែបណា ឬ ក្នុងលក្ខខណ្ឌយ៉ាងណាខ្លះ? ប៉ុន្តែ មានមនុស្សមួយចំនួនទៀត នៅមិនទាន់យល់ច្បាស់ពីការប្រើប្រាស់ពាក្យទាំងពីរនេះនៅឡើយទេ។

“ឯកអគ្គរាជទូត” ឬ “ឯកអគ្គរដ្ឋទូត” គឺជាមន្ត្រីការទូតដែលតំណាងឲ្យប្រទេសរបស់ខ្លួនប្រចាំនៅបរទេស ដែលស្ថិតក្នុងមុខតំណាងខ្ពស់ជាងគេបំផុត។ ពាក្យទាំងពីរនេះ គឺមានន័យ និងតំណែងដូចគ្នា គ្រាន់តែលក្ខខណ្ឌនៃការប្រើប្រាស់ មិនដូចគ្នាទេ។

ពាក្យថា “ឯកអគ្គរាជទូត” សំដៅលើមន្ត្រីការទូតតំណាងប្រទេសណាដែលមានស្តេចឡើងគ្រងរាជ្យ។ រីឯ ពាក្យ “ឯកអគ្គរដ្ឋទូត” គឺសំដៅដល់មន្ត្រីការទូតតំណាងឲ្យប្រទេសណាមួយដែលគ្មានស្តេចគ្រងរាជ្យ ពោល គឺ ដឹកនាំដោយរបបប្រធានាធិបតី ដូចជា សហរដ្ឋអាមេរិកជាដើម។

ឯកអគ្គរាជទូត ឬ ឯកអគ្គរដ្ឋទូតនេះ មិនមែនមានតែងារមួយមុខឡើយ តួនាទីនេះ ភ្ជាប់មកជាមួយនឹងទំនួលខុសត្រូវជាច្រើនទៀត ដូចជា ការបង្កើតឲ្យមានទំនាក់ទំនងល្អរវាងប្រទេសទាំងពីរ (ប្រទេសដាក់ទូត និងប្រទេសដែលមន្រ្តីទូតកំពុងស្ថិតនៅ) ការរៀបចំគោលនយោបាយការបរទេស សេដ្ឋកិច្ច និងកិច្ចចរចារផ្សេងៗទៀត ដើម្បីឲ្យប្រទេសទាំងពីរកាន់តែមានភាពល្អប្រសើរជាមួយគ្នា។

យ៉ាណាមិញ មុខតំណែង ឯកអគ្គរាជទូត ឬ ឯកអគ្គរដ្ឋទូត មិនមែនជាមុខតំណែងមួយដែលងាយស្រួលឡើយ បុគ្គលដែលមានកាន់តំណែងមួយនេះ ត្រូវតែជាមនុស្សដែលមានការសិក្សាខ្ពស់ ព្រមទាំង មានបទពិសោធ ការរៀបចំផែនការ ជំនាញក្នុងការដោះស្រាយបញ្ហា និងសមត្ថភាពក្នុងការធ្វើទំនាក់ទំនងការទូតច្រើនផងដែរ។ មុខជំនាញសិក្សាដែលអាចទាក់ទងជាមួយនឹងការងារការទូតនេះ គឺជំនាញវិទ្យាសាស្ត្រនយោបាយ ទំនាក់ទំនងអន្តរជាតិ និងប្រវត្តិសាស្ត្រ។ ការចេះភាសាច្រើន លើសពី២ភាសាឡើងទៅ ក៏ជាតម្រូវការដ៏សំខាន់មួយសម្រាប់តួនាទី ឯកអគ្គរាជទូត ឬ ឯកអគ្គរដ្ឋទូតនេះផងដែរ៕

ដោយ៖ អុន ស្រីមាន