សម្តេច ទៀ បាញ់​ បញ្ជាឱ្យស្រាវ​ជ្រាវរកអ្នកឆ្លង​កូវីដ‑១៩ហើយ បែរជាមកចាក់វ៉ាក់សាំង ផ្តន្ទាទោសតាមច្បាប់

សម្តេចពិជ័យសេនា ទៀ បាញ់ ឧបនាយករដ្ឋមន្ត្រីរដ្ឋមន្ត្រីក្រសួងការពារជាតិបានបញ្ជាឲ្យក្រុមកំពុងប្រតិបត្តិការដំណើរការចាក់វ៉ាក់សាំងទាំងអស់ ស្រាវជ្រាវករណីបុគ្គលមួយចំនួនមានវិជ្ជមានកូវីដ‑១៩ ហើយបែរជានៅតែបណ្តោយឱ្យមកចាក់វ៉ាក់​​សាំង យកមកផ្តន្ទាទោសទៅតាមច្បាប់ជាកំហិត។ សម្ដេចពិជ័យសេនា សង្កត់ធ្ងន់ក្នុងសារជាសំឡេងរបស់សម្ដេចទៀតថា បើសិនជារកឃើញថា មានករណីមន្ត្រីជំនាញណាទៀត ដែលធ្វេសប្រហែសបណ្តោយឱ្យអ្នកជំងឺកូវីដ មកចាក់វ៉ាក់សាំងទៀតនោះគឺ ត្រូវទទួលខុសចំពោះមុខច្បាប់ ព្រោះនេះ ជា​​ចេតនាហើយបង្កហានិភ័យចម្លងទៅអ្នកដ៏ទៃ។

យោងតាមច្បាប់ទប់ស្កាត់ជំងឺកូវីដ-១៩ និងជំងឺឆ្លងកាចសាហាវនិងប្រកបដោយគ្រោះថ្នាក់ធ្ងន់ធ្ងរផ្សេងទៀត បានកំណត់ថា ចំពោះបុគ្គលណាអ្នកគេច វេះពីការព្យាបាល ឬគេចចេញពីទីកន្លែងព្យាបាលត្រូវផ្តន្ទាទោសត្រូវដាក់ពន្ធនាគារពី១ឆ្នាំ ទៅ៥ឆ្នាំ និងពិន័យជាប្រាក់ពី៥លានរៀល ទៅ២០លានរៀល និងត្រូវដាក់ពន្ធនាគារពី៥ឆ្នាំ ទៅ១០ឆ្នាំកាលបើអំពើខាងលើនេះ បានបណ្តាលឱ្យមានការចម្លងជំងឺកូវីដ-១៩ដល់អ្នកដទៃ៕