អំណោយរបស់លោក ហ៊ុនម៉ានិត ត្រូវបាននាំយក ទៅប្រគេនព្រះសង្ឃ នៅវត្តប្រាសាទនាងខ្មៅ

(តាកែវ)៖ ក្រុមការងារសមាគមសិស្ស និស្សិត បញ្ញវន្តក្មេងវត្ត សាខាខេត្តតាកែវ ដឹកនាំដោយលោក លី សាវេត អភិបាលរងខេត្តតាកែវ និងជាប្រធានសមាគមខេត្តតាកែវ បានយកអំណោយដ៏ថ្លៃថ្លារបស់លោក ហ៊ុន ម៉ានិត និងលោកស្រី ទៅប្រគេនព្រះសង្ឃគង់នៅវត្ត ប្រាសាទនាងខ្មៅ ស្រុកសំរោង ខេត្តតាកែវ ដែលកំពង់ជួបការលំបាកខ្វះខាត់ចង្ហាន់ ខណៈដែលវត្តមួយនេះជាកន្លែងធ្វើចត្តាឡីស័ក និងជាកន្លែងព្យាបាលព្រះសង្ឃ មានវិជ្ជមានជំងឺកូវីដ-១៩ ផងដែរ។

ដោយព្រះសង្ឃគង់ នៅក្នុងវត្តមាន ចំនួន២៥០អង្គ ដែលជាប់ពាក់ព័ន្ធនឹងអ្នកឆ្លងជំងឺកូវីដ ហើយនៅក្នុងចំណោមព្រះសង្ឃ ចំនួន២៥០អង្គ គឺក្រោយពីធ្វើតេស្តរកមេរោគកូវីដរួចមក ក៏ឃើញចំនួនព្រះសង្ឃ ចំនួន៧៣អង្គ វិជ្ជមាន។

អំណោយ ដែលក្រុមការងារ នាំទៅប្រគេនព្រះសង្ឃ នៅវត្តប្រសាទនាងខ្មៅ នាព្រឹកថ្ងៃទី២៧ ខែកក្កដា ឆ្នាំ២០២១នេះ រួមមាន៖

-សាច់ជ្រូកចំនួន ៨០គីឡូ

-ត្រពាំងជូរ ៣០គីឡូ

-ល្ហុង ៤០គីឡូ

-ក្រសាំងបុក១ ក្រឡធំ

-ត្រឡាច ៤០គីឡូ

-ល្ពៅ ៤០គីឡូ

-ស្ពៃក្តោប ៣០គីឡូ

-ត្រប់ ២០គីឡូ

-ននោង ១៥គីឡូ

-ប្រហុក៥គីឡូ

-សណ្តែកគួរ១០គីឡូ

-ត្រពាំងស្រស់ ២០គីឡូ

សូមបញ្ជាក់ថា  ក្រុមការងារ សមាគម សិស្ស និស្សិត បញ្ញវន្តក្មេងវត្តខេត្តតាកែវ និងបន្តយកអំណោយរបស់ សមាគម និងអំណោយដែលសប្បុរសជួយ ទៅប្រគេនព្រះសង្ឃ ដែលគង់នៅវត្តអង្គប្រិយ៍បន្តទៀត នៅថ្ងៃទី៣០ ខែកក្កដា ឆ្នាំ២០២១ ខាងមុខនេះ ស្ថិតនៅស្រុកសំរោង ខេត្តតាកែវ ព្រះសង្ឃមាន ចំនួន១១០អង្គ  ដែលជាប់ពាក់ព័ន្ធជាមួយអ្នកជំងឺកូវីដ-១៩ ផងដែរ។

នៅក្នុងចំណោមព្រះសង្ឃ ចំនួន១១០អង្គ គឺតេស្តឃើញវិជ្ជមានជំងឺកូវីដ ចំនួន៣៥អង្គ។ ដូចនេះបើសប្បុរស​ជនមានបំណងឧបត្ថម្ភៈ សូមទំនាក់ទំនង់ឧបត្ថតាយៈលោក សោម សាវ័ក ប្រធានលេខាសមាគម សិស្ស និស្សិត បញ្ញវន្តក្មេងវត្ត តាមលេខទូរស័ព្ទ: 012 99 12 41 ៕ (ដោយ)៖ វីរៈ