ស្រវឹងស្រា រអិលជើងធ្លាក់ក្នុងស្រះទឹក អ្នក​ជិត​ខាង​ស្រែកឆោឡោ​ឲ្យគេជួយ

ក្រុងប៉ោយប៉ែត៖ ស្ត្រីម្នាក់បម្រើការងារក្នុងភោជនីយដ្ឋានយីហោឈ្មោះ ស្រះជួបជុំ បានរអិលជើងធ្លាក់ចូលក្នុងស្រះខាងលើហើយមានអការរាក់ស្រវឹងស្រាជោកជាំខ្លួនទៀតផង តែសំណាងល្អបានបុគ្គលិកនិងអ្នកក្បែរកន្លែងកើតហេតុជួយសង្គ្រោះទាន់ពេលវេលា។

ហេតុការណ៍នេះ​កើត​ឡើង​នៅវេលាម៉ោង ៨ និង ១០ នាទីយប់ ក្នុងថ្ងៃទី ៣ ខែកញ្ញា ឆ្នាំ ២០២១ នៅចំណុចស្រះ​ទឹកខាងលើ ស្ថិត​នៅក្នុងភូមិបាលិលេយ្យ ២ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។

សាក្សីបាន​បញ្ជាក់ថា មុនពេលកើតហេតុ ជនរងគ្រោះមានឈ្មោះស្រីម៉ៅ អាយុ២២ ឆ្នាំ មានមុខរបរជាបុគ្គលិកបម្រើការងារក្នុងហាងស្រះជួបជុំ បានផឹកស្រាច្រើនពេក ហើយក៏បានដើរក្បែរស្រះរួចអង្គុយនៅមាត់ស្រះ មិនដឹងជាយ៉ាងណាបានជារអិលជើងធ្លាក់ចូលក្នុងស្រះទឹក ដែលមានជម្រៅ ៧ ម៉ែត្រឯណោះ។ ប៉ុន្តែសំណាង​ល្អមានអ្នកក្បែរជនរងគ្រោះស្រែកហៅគេឯងឲ្យមកជួយស្រង់មកលើគោកវិញ។ ក្រោយពីមានការ​ជួយ​សង្គ្រោះរួចមក ជនរងគ្រោះបានរួចផុតពីការលង់ទឹកស្លាប់៕

អត្ថបទ៖ ពៅរី