អគ្គស្នងការរង ប្រាប់សន្តិសុខឯកជនរួមសហការជាមួយសមត្ថកិច្ច បង្ការទប់ស្កាត់និងបង្ក្រាបបទល្មើស

អគ្គស្នងការរងនគរបាលជាតិ ប្រាប់ភ្នាក់ងារសន្តិសុខឯកជនត្រូវធ្វើជាកម្លាំងជំនួយដល់កម្លាំងសមត្ថកិច្ច តាមរយៈការរាយការណ៍ពីសកម្មភាពសង្ស័យណាមួយជាបទល្មើស ដើម្បីរួមគ្នាបង្ការ ទប់ស្កាត់ និងបង្ក្រាបបទល្មើសបានទាន់ពេលវេលា ពិសេសការអនុវត្តគោលនយោបាយភូមិ ឃុំ សង្កាត់ មានសុវត្តិភាព។

អគ្គស្នងការរងនគរបាលជាតិ លោកឧត្តមសេនីយ៍ឯក អ៊ី សុខឃី បានលើកឡើងថា ក្នុងករណីបានឃើញ ឬសង្ស័យលើសកម្មភាពល្មើសច្បាប់ណាមួយ មិនថា ស្ថិតនៅក្នុងទីតាំងខ្លួនឈរជើង ឬទីណានោះទេ ភ្នាក់សន្ដិសុខឯកជន ត្រូវបង្កើតកិច្ចសហការជាមួយសមត្ថកិច្ច និងអាជ្ញាធរនៅមូលដ្ឋាន ដោយត្រូវរាយការណ៍ភ្លាមទៅកាន់អាជ្ញាធរមានសមត្ថកិច្ច ឬមកនាយកដ្ឋានគ្រប់គ្រងសន្តិសុខឯកជន ដើម្បីរួមគ្នាបង្ការ ទប់ស្កាត់ និងបង្ក្រាបបទល្មើសបានទាន់ពេលវេលា និងរួមគ្នាចូលរួមអនុវត្តគោលនយោបាយរបស់រាជរដ្ឋាភិបាលគោលនយោបាយ ភូមិ ឃុំ សង្កាត់ មានសុវត្តិភាព។

ការលើកឡើងរបស់លោកអគ្គស្នងការរង ក្នុងឱកាសអញ្ជើញបិទវគ្គបំប៉នជំនាញភ្នាក់ងារសន្ដិសុខឯកជន លើកទី៦៨ នៅរសៀលថ្ងៃទី២៤ ខែធ្នូ ឆ្នាំ២០២៤។ លោកឧត្តមសេនីយ៍ឯក អ៊ី សុខឃី បញ្ជាក់ថា វគ្គបំប៉នជំនាញនេះ នឹងធ្វើឱ្យភ្នាក់ងារសន្ដិសុខឯកជនទាំងអស់ មានសមត្ថភាព ចំណេះដឹង វិជ្ជាជីវៈ និងក្រមសីលធម៌ក្នុងការបំពេញការងារប្រចាំថ្ងៃ។

ក្នុងន័យនេះ លោក បានណែនាំដល់នាយកដ្ឋានគ្រប់គ្រងសន្ដិសុខឯកជន នៃអគ្គស្នងការដ្ឋាននគរបាលជាតិ ឱ្យបន្ដយកចិត្តទុកដាក់ និងជំរុញឱ្យមានវគ្គបំប៉នជំនាញពង្រឹងសមត្ថភាពដល់ភ្នាក់ងារសន្តិសុខឯកជនបន្ថែមទៀត។

ឧត្តមសេនីយ៍ឯក អ៉ី សុខឃី ក៏បានណែនាំភ្នាក់ងារសន្តិសុខឯកជនទាំងអស់ ត្រូវយកចំណេះដឹងដែលទទួលបានពីការសិក្សានេះទៅអនុវត្ត និងបន្តពង្រីកចំណេះដឹង ភាពឆ្លាតវៃ ភាពច្នៃប្រឌិត និងមានភាពទទួលខុសត្រូវខ្ពស់ក្នុងការបំពេញតួនាទីរបស់ខ្លួន ត្រូវមានឥរិយាបថសមរម្យក្នុងការចូលរួមធ្វើការងារ ដោយប្រកាន់យកអ្វីជាការត្រឹមត្រូវ ក្រោយទទួលការបណ្តុះបណ្តាល គោរពឱ្យបាននូវលក្ខណៈសម្បត្តិជាភ្នាក់ងារសន្តិសុខឯកជន។

ភ្ជាប់គ្នានេះ ឧត្តមសេនីយ៍ឯក អគ្គស្នងការរងនគរបាលជាតិ ក៏បានប្រាប់នាយកក្រុមហ៊ុនផ្តល់សេវាសន្តិសុខឯកជន និងគ្រឹះស្ថាននានាបន្តចូលរួមគាំទ្រវគ្គបណ្តុះបណ្តាល ដោយបញ្ជូនភ្នាក់ងារសន្តិសុខឯកជនមកចូលរួមវគ្គបំប៉នជំនាញនេះ។

យោងតាមរបាយការណ៍របស់ឧត្តមសេនីយ៍ឯក លឹម សុខារស្មី ប្រធាននាយកដ្ឋានគ្រប់គ្រងសន្ដិសុខឯកជន បច្ចុប្បន្ននេះ ការបើកវគ្គបំប៉នជំនាញភ្នាក់ងារសន្តិសុខឯកជន សរុប៦៨លើក ដែលមានសិក្ខាកាមជាភ្នាក់ងារសន្តិសុខឯកជន ចំនួន ១១ ៤៣២នាក់ (ស្រី ២៤៧នាក់) និងសិក្ខាកាមជានគរបាលជាតិ ចំនួន២៦៨នាក់ (ស្រី ២៧នាក់)។

ឧត្តមសេនីយ៍ឯក លឹម សុខារស្មី បន្តឱ្យដឹងថា ការបើកវគ្គបំប៉នជំនាញនេះ ក្នុងគោលបំណងឆ្លើយតបទៅនឹងតម្រូវការនៃការបង្កើនសមត្ថភាព ដើម្បីក្លាយខ្លួនជាភ្នាក់ងារសន្តិសុខឯកជន ដែលមានជំនាញ និងលក្ខណៈសម្បត្តិគ្រប់គ្រាន់សម្រាប់ការចូលរួមចំណែកក្នុងសកម្មភាពថែរក្សា និងការពារស្ថេរភាព សន្តិសុខ សុវត្ថិភាព សណ្តាប់ធ្នាប់ និងអាយុជីវិតរបស់ប្រជាពលរដ្ឋ ព្រមទាំងលើកកម្ពស់គោលនយោបាយភូមិ-ឃុំ សង្កាត់មានសុវត្ថិភាព ឱ្យបានល្អប្រសើរ៕