ឆ្នាំនេះ ខេត្ត​សៀមរាប ទទួល​បាន​ទិន្នផល និង​តម្លៃស្រូវ ល្អជាងឆ្នាំមុនបន្តិចបន្តួច
Connect with us
Helistar Cambodia - Helicopter Charter Services

ព័ត៌មានជាតិ

ឆ្នាំនេះ ខេត្ត​សៀមរាប ទទួល​បាន​ទិន្នផល និង​តម្លៃស្រូវ ល្អជាងឆ្នាំមុនបន្តិចបន្តួច

Published

on

មន្ទីរកសិកម្មខេត្តសៀមរាប បានចេញរបាយការណ៍នាដើមខែធ្នូនេះថា ឆ្នាំ២០២០នេះ បើទោះ ជាមាន ជំនន់ទឹកភ្លៀង តែស្រូវរដូវវស្សាអាចស្តារវិញបាន និងរក្សាបានទំហំលទ្ធផលលើសផែនការ ( ១០២% ) ហើយកសិកររីករាយដោយទទួលបានទិន្នផល និងតម្លៃស្រូវប្រសើរជាងឆ្នាំមុន បើទោះជាក្នុង​កម្រិត​ តិច​តួច​យ៉ាងណាក៏ដោយ។

របាយការណ៍របស់មន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាប បានបង្ហាញឲ្យដឹងថា​ ការងារបង្ក​បង្កើនផលស្រូវរដូវវស្សា ដែលបានបញ្ចប់ទៅហើយនោះ បើទោះជាជួបបញ្ហាជំនន់ទឹកភ្លៀងយ៉ាងណាក្តី  តែ​មិនធ្ងន់ធ្ងរនោះឡើយ ហើយឆ្នាំនេះ សម្រេចបានលើផ្ទៃដីសរុបជិត ១៩១ពាន់ហិកតា ស្មើនឹងជាង​១០២​%​ នៃផែនការ ( ១៨៦ពាន់ហិកតា )។  

នៅក្នុងរដូវចម្រូតនេះ គិតត្រឹមថ្ងៃទី០១ ខែធ្នូ ឆ្នាំ២០២០ ការប្រមូលផលស្រូវសម្រេចបានសរុប ចំនួន​ជាង​១៤៣ពាន់ហិកតា ក្នុងនោះស្រូវស្រាល បានជាង ៤ម៉ឺន២៣០ហិកតា  ស្មើនឹងជាង៩៦% លើផ្ទៃ​ដីដែល​បាន​អនុវត្ត ដោយទទួលបានទិន្នផលជាមធ្យម២តោន៧០០គីឡូក្រាមក្នុង១ហិចតា  ស្រូវ​កណ្ដាល​ច្រូត​កាត់​បាន​ជាង១០ម៉ឺន១ ៣៥០ហិកតា ស្មើនឹងជាង៩៦%  ទទួលបានទិន្នផល​ជាមធ្យម២តោន​៨០០គីឡូ​ក្រាម ក្នុង១ហិកតា  ស្រូវចម្ការ ​ប្រមូលផលបានប្រមាណជិត​ ១ ៧០០ហិកតា ស្មើនឹង១០០%  ទទួលបាន​ទិន្នផលជាមធ្យម ២តោន៧០០គក្រ ក្នុង១ហិចតា។ តួលេខ​នៃទិន្នផលនេះ កើនឡើង​បន្តិចបន្តួច​ បើ​ធៀប​ទៅនឹងឆ្នាំមុន។  

របាយការណ៍ដដែល ក៏បានឲ្យដឹងដែរ អំពីតម្លៃកសិផល​ ដូចជាប្រភេទស្រូវសែនក្រអូប និងស្រូវផ្ការំដួល កសិករ​លក់ស្រូវសើមក្រោយពីច្រូតកាត់ភ្លាមៗ បានក្នុងតម្លៃ ពី ១ ០០០រៀល ដល់ ១ ១៥០រៀលក្នុង​១​គីឡូ​ក្រាម  ស្រូវ​ចម្រុះ​(សើម) តម្លៃពី៨៥០ ទៅ ៩៥០រៀល ក្នុងគីឡូក្រាម។ តម្លៃនេះ គឺជាតម្លៃមួយ​ដែល​កសិករអាចទទួលយកបាន បើទោះជាស្ថិតក្នុង​កម្រិត​មិនលើសខ្ពស់ជាងឆ្នាំមុនក៏ដោយ។

​ក្នុងរបាយការណ៍បញ្ជាក់ដែរថា  មកដល់ដើមខែធ្នូនេះ ការងារបង្កបង្កើនផលស្រូវរដូវប្រាំង ឆ្នាំ២០២០-២០២១ កសិករកំពុងមានចលនាភ្ជួររាស់បានប្រហែលជិត ១ម៉ឺន២ពាន់ហិកតា ដែលការភ្ជួររាស់ទាំងនោះ ត្រូវបានអនុវត្តដោយដោយគ្រឿងយន្ត  ស្មើនឹងជិត៥០% នៃផែនការ ២២ពាន់ ៥៨៥ហិកតា ក្នុងនោះមាន​ស្រូវប្រដេញទឹក ប្រមាណជាង ៧ ០០០​ហិកតា និងប្រាំងរនាម ជាង៤ ០០០ហិកតា៕ 

អត្ថបទ៖ គឿនវេត

India in Cambodia (Embassy of India, Phnom Penh)
Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម

Helistar Cambodia - Helicopter Charter Services