ព័ត៌មានជាតិ

ក្រសួងធនធានទឹក ប្រកាសឱ្យរាជធានីខេត្តចំនួន១៤ ប្រុងប្រយ័ត្នចំពោះជំនន់ទឹកភ្លៀង

បានផុស

៤ years មុន

នៅ

ថ្ងៃចន្ទ ២៥ តុលា ២០២១

ដោយ

ក្រសួងធនធានទឹក និងឧតុនិយមបានព្យាករណ៍នៅថ្ងៃទី ២៥ ខែតុលា ឆ្នាំ ២០២១ នេះថារាជធានីខេត្តចំនួន១៤ អាចនឹងមានជំនន់ទឹកភ្លៀងដោយសារកម្ពុជាមានសម្ពាធទាបសកម្មមួយ បាននិងកំពុងស្ថិតនៅក្នុងសមុទ្រចិនខាងត្បូងដែលវិវត្តន៍ជាបន្តបន្ទាប់ទៅ ជាវិសម្ពាធ ឬ កូនព្យុះ ។

រាជធានីខេត្តចំនួន១៤រួមមានរាជធានីភ្នំពេញ ខេត្តព្រៃវែង ស្វាយរៀង កណ្តាល តាកែវ កំពង់ស្ពឺ កំពង់ឆ្នាំង ពោធិ៍សាត់ ខេត្តមណ្ឌលគិរី ត្បូង ឃុំ ខេត្តកំពង់ចាម ខេត្តកំពត ខេត្តព្រះសីហនុ និងខេត្តកំពង់ធំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្តីជូនដំណឹង ស្តីពី ស្ថានភាពអាកាសធាតុរបស់ក្រសួងធនធានទឹកបានឱ្យដឹងថាបន្ទាប់ពីបានធ្វើការពិនិត្យ និងតាមដានជាប្រចាំលើស្ថានភាពអាកាសធាតុរួចមក បាន បង្ហាញឲ្យឃើញថា ៖ មានសម្ពាធទាបសកម្មមួយ បាននិងកំពុងស្ថិតនៅក្នុងសមុទ្រចិនខាងត្បូង។

តាមការព្យាករ នៅថ្ងៃទី ២៥ ខែតុលា ឆ្នាំ ២០២១ សំពាធទាបសកម្មនេះ នឹងវិវត្តន៍ជាបន្តបន្ទាប់ទៅ ជាវិសម្ពាធ ឬ កូនព្យុះ ដោយធ្វើដំណើរចូលដល់លើភាគខាងត្បូងប្រទេសវៀតណាម នៅថ្ងៃទី២៧ ខែតុលា ឆ្នាំ ២០២១។ បាតុភូតខាងលើនេះ នឹងថមថយឥទ្ធិពលមកជាសម្ពាធទាប នៅពេល ដើរចូលមកដល់លើភាគខាងត្បូងប្រទេសកម្ពុជា ។

យោងតាមការព្យាករលក្ខណៈបែបនេះ នឹងធ្វើឲ្យអាកាសធាតុនៅព្រះរាជាណាចក្រកម្ពុជា ចាប់ពីថ្ងៃទី ២៧ ដល់ថ្ងៃទី ២៨ ខែតុលា ឆ្នាំ ២០២១ មានស្ថានភាព ដូចខាងក្រោម ៖

១- តំបន់វាលទំនាប ៖ ផ្ទៃមេឃមានពពកច្រើនដេរដាស នឹងអាចមានភ្លៀងធ្លាក់រាយប៉ាយ ក្នុងកម្រិតពីបង្ហូរទៅខ្លាំង លាយឡំជាមួយខ្យល់កន្ត្រាក់មានល្បឿនបង្គួរនឹងអាចបង្កជា ជំនន់ទឹកភ្លៀង នៅក្នុងភូមិសាស្ត្ររាជធានីភ្នំពេញ ខេត្តព្រៃវែង ស្វាយរៀង កណ្តាល តាកែវ កំពង់ស្ពឺ កំពង់ឆ្នាំង ពោធិ៍សាត់ និងខេត្តកំពង់ធំ ។

២- តំបន់ខ្ពង់រាប ជួរភ្នំដងរែក និងតំបន់ជួរភ្នំក្រវាញ ៖ ផ្ទៃមេឃមានពពកច្រើនដេរដាស និង អាចមានភ្លៀងធ្លាក់រាយប៉ាយក្នុងកម្រិតពីបង្គួរទៅខ្លាំង លាយឡំជាមួយខ្យល់កន្ត្រាក់ មានល្បឿនខ្លាំង នឹងអាចបង្កជាជំនន់ទឹកភ្លៀងនៅក្នុងភូមិសាស្ត្រខេត្តមណ្ឌលគិរី ត្បូង ឃុំ និងខេត្តកំពង់ចាម ។

៣- តំបន់មាត់សមុទ្រ ៖ ផ្ទៃមេឃមានពពកច្រើនដេរដាស នឹងអាចមានភ្លៀងធ្លាក់រាយប៉ាយ ក្នុងកម្រិតពីមធ្យមទៅច្រើនលាយឡំជាមួយខ្យល់កន្ត្រាក់ នឹងអាចបង្កជាជំនន់ទឹកភ្លៀង នៅក្នុងភូមិសាស្ត្រខេត្តកំពត និងខេត្តព្រះសីហនុ ។ នៅលើផ្ទៃសមុទ្រ នឹងមានភ្លៀង ខ្យល់ និងរលកសមុទ្រខ្ពស់ ។

យោងលើស្ថានភាពអាកាសធាតុ ដូចបានជម្រាបជូនខាងលើ សូមសាធារណជនជ្រាបដា ព័ត៌មាន, នឹងសូមបង្កើនការយកចិត្តទុកដាក់ប្រុងប្រយ័ត្នខ្ពស់ ដើម្បីជៀសវាងនូវគ្រោះថ្នាក់ផ្សេងៗ ដែលអាចកើតមានឡើងជាយថាហេតុ ។

ក្រសួងធនធានទឹក និងឧត្តុនិយម បាននិងកំពុងបន្តតាមដានយ៉ាងយកចិត្តទុកដាក់លើ បាតុភូតធម្មជាតិនេះ ហើយនឹងជម្រាបជូនព័ត៌មានជាបន្តបន្ទាប់ទៀត ក្នុងករណីអាកាសធាតុមានការប្រែប្រួល៕

ដោយ ៖ សំអឿន