ក្រសួងចំនួន៣ ​សហការ​គ្នា​រៀប​ចំ​ព្រឹត្តិការណ៍​ “សប្ដាហ៍​សៀវ​ភៅ”

ព្រឹត្តិការណ៍ “សប្ដាហ៍​សៀវភៅ” តាម​ប្រព័ន្ធ​អ៊ីនធឺណិត  ត្រូវបានក្រសួងវប្បធម៌ និងវិចិត្រសិល្បៈ ក្រសួង​ព័ត៌មាន និងក្រសួងអប់រំ យុវជន និងកីឡា បានសហការគ្នារៀបចំចាប់ពីថ្ងៃទី១២-១៩ ខែធ្នូ ឆ្នាំ២០២០ ក្រោមប្រធានបទ​ “សម័យ​កូវីដ កាន់តែសិ្នទ្ធនឹងសៀវភៅ”។
 
សប្ដាហ៍​សៀវភៅ បាន​រួម​បញ្ចូល​សកម្មភាព​មួយ​ចំនួន ដែលរៀបចំតាម​ប្រព័ន្ធ​អនឡាញ មានដូចជា៖ ការ​ផ្សព្វផ្សាយ​សៀវភៅ និងវីឌីអូរបស់កវី អ្នកបោះពុម្ពផ្សាយ បណ្ណាគារិក អ្នកលក់សៀវភៅ ដៃគូអភិវឌ្ឍន៍​វិស័យ​សៀវភៅ និងអំណានគ្រឹះស្ថានអប់រំ នៅលើគេហទំព័ររបស់ពិព័រណ៍សៀវភៅកម្ពុជា។

​លើសពីនេះទៅទៀត ក៏មានការជួបនិយាយសំណះសំណាល ជាមួយនឹងវាគ្មិន​ ដែលនឹងអញ្ជើញ​ចូលរួម​តាមរយៈកម្ម​វិធី Zoom។ ​បណ្ដុំ​កម្មវិធីដ៏មានតម្លៃ​នេះ គឺរៀបចំឡើង ក្នុងគោលបំណង​ទាក់​ទាញ​អ្នកចូល​ចិត្ត និងស្រឡាញ់ការអានសៀវភៅនៅកម្ពុជា ក៏ដូចជាលើកស្ទួយវិស័យ បោះពុម្ព​នៅ​កម្ពុជា​ ឲ្យកាន់តែរីក​ចម្រើនទៅមុខមួយ​កម្រិត​ទៀត។
 
គួរបញ្ជាក់ថា ពិព័រណ៍សៀវភៅកម្ពុជា គឺជាកម្មវិធីមួយរៀបចំជារៀងរាល់ឆ្នាំ ដែលតែងតែប្រារព្ធធ្វើឡើង នៅ​បណ្ណាល័យជាតិ ក្នុងគោលបំណង ដើម្បីលើកកម្ពស់ ការយល់ដឹង របស់ប្រជាជនទៅលើសៀវភៅជា​ភាសា​ខ្មែរ និងបរទេស លើកកម្ពស់​ឧស្សាហកម្ម បោះពុម្ព​ផ្សាយ​នៅ​កម្ពុជា៕
 
​ អត្ថបទ ៖ កោះកែវ