លោកស្រី ឱ វណ្ណឌីន ជំរុញការចាក់វ៉ាក់សាំងកូវីដ-១៩ បង្ការជំងឺ និងការស្លាប់ នៅខេត្តស្វាយរៀង

លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស (គ.វ.ក-១៩) និងក្រុមការងារ បានបន្តចុះដល់មូលដ្ឋាន ដើម្បីពិនិត្យការងារចាក់វ៉ាក់សាំងកូវីដ-១៩ នៅក្នុងខេត្តស្វាយរៀង និងបានជួបសំណេះសំណាលជាមួយមន្ត្រីសុខាភិបាលរបស់មន្ទីរសុខាភិបាលខេត្ត និងក្រុមការងារចាក់វ៉ាក់សាំង ព្រមទាំងបុគ្គលិកសុខាភិបាលនៅតាមទីតាំងចាក់វ៉ាក់សាំងកូវីដ-១៩។

នេះបើតាមការផ្ដល់ព័ត៌មាន ពី លោកស្រីវេជ្ជបណ្ឌិត ឱ វណ្ណឌីន មក កម្ពុជាថ្មី នៅមុននេះ។

ឆ្លៀតក្នុងឱកាសបំពេញបេសកកម្មដ៏មមាញឹកនេះ លោកស្រីវេជ្ជបណ្ឌិត ឱ វណ្ណឌីន បានមានប្រសាសន៍៖

– ស្នើរដ្ឋបាលខេត្ត និងមន្ទីរសុខាភិបាលខេត្ត  ធ្វើការជំរុញការងារចាក់វ៉ាក់សាំងដូសទី៣ ឬដូសជំរុញ ជូនប្រជាពលរដ្ឋក្នុងខេត្តស្វាយរៀង ឱ្យមានសន្ទុះកើនលឿនបានទាន់ពេលវេលា ដើម្បីទប់ស្កាត់ភាពធ្ងន់ធ្ងរ និងការស្លាប់បណ្តាលមកពីការឆ្លងរីករាលដាលនៃជំងឺកូវីដ-១៩ ជាពិសេសប្រភេទវីរុសបំប្លែងថ្មី ប្រភេទអូមីក្រុង។

-​ ជួបពិភាក្សា​ និងលេីកជាអនុសាសន៍គន្លឹះ​ សម្រាប់ជំរុញការងារចាក់វ៉ាក់សាំងកូវីដ-១៩​ ជូនអភិបាលខេត្តស្វាយរៀង​ ដេីម្បីសហការជាចាំបាច់​ ធ្វើឱ្យមានកំណើនចាក់វ៉ាក់សាំងកូវីដ-១៩​ ជូនដល់ប្រជាពលរដ្ឋដែលដល់វេនចាក់​ ឱ្យបានលឿននៅតាមភូមិ-ឃុំ​ ឫតាមសាលារៀន​ រោងចក្រ​ សហគ្រាស​ ជាដើមដោយធ្វេីសម្រង់ស្ថិតិអ្នកដែលដល់វេនចាក់ផងដែរ។

-​ ពិនិត្យការងារគ្រប់គ្រងថវិការ ដែល គ.វ.ក-១៩ បានឧបត្ថម្ភជូនមកមន្ទីរសុខាភិបាលខេត្ត ដើម្បីបើកជូនក្រុមការងារចាក់វ៉ាក់សាំងកូវីដ-១៩ ក្នុងខេត្តស្វាយរៀង។

នៅក្នុងដំណើរពិនិត្យ នៅថ្ងៃទី១៧ ខែកុម្ភៈ ឆ្នាំ២០២២នេះ មានការចូលរួមសម្របសម្រួលពីសំណាក់ លោក ម៉ែន វិបុល អភិបាលនៃគណៈអភិបាលខេត្តស្វាយរៀង អភិបាលរងខេត្ត  ប្រធាន លោកអនុប្រធាន មន្ត្រី បុគ្គលិក នៃមន្ទីរសុខាភិបាលខេត្តស្វាយរៀង៕

អត្ថបទ៖ ច័ន្ទ វីរៈ