ក្រសួងការបរទេស​ បំភ្លឺព័ត៌មាន​ស្រ្តីជនជាតិថៃថា​ ខ្លួន​ប្រឈម​នឹង​ការជួញ​ដូរសរីរាង្គ​នៅកម្ពុជា​

លោក ជុំ សុន្ទរី អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជា នៅព្រឹកថ្ងៃទី១៣ ខែមីនា ឆ្នាំ២០២២ ចេញសេចក្តីបំភ្លឺមួយ ពាក់ព័ន្ធនឹងព័ត៌មានចុះផ្សាយក្នុងសារព័ត៌មាន Thai Examiner ថ្ងៃទី១២ ខែមីនា ឆ្នាំ២០២២  អំពីករណីមានស្រ្តីជន ជាតិថៃម្នាក់បានអះអាងថា ខ្លួនបានប្រឈមនឹងគ្រោះថា្នក់នៃការជួញដូរសរីរាង្គនៅកម្ពុជា។

បើតាមលោក ជុំ សុន្ទរី អាជ្ញាធរមានសមត្ថកិច្ចខេត្តព្រះសីហនុបានប្រកាសបដិសេធរួចហើយថា នោះគឺជាការលើកឡើងដោយគ្មានមូលដ្ឋានត្រឹមត្រូវពិតប្រាកដ។

ទន្ទឹមនឹងនេះ ស្ថានទូតកម្ពុជាប្រចាំនៅប្រទេសថៃ ក៏បានទាក់ទងជាមួយអាជ្ញាធរមានសមត្ថកិច្ចថៃ ស្វែងរកការបញ្ជាក់លើព័ត៌មាននេះ តែរហូតមកដល់ពេលនេះ ពុំទាន់ទទួលបានការបញ្ជាក់ណាមួយថានេះជាករណីដែលបានកើតមានឡើងនៅកម្ពុជា ដូចព័ត៌មានដែលបានផ្សាយនោះឡើយ។ 

ទោះជាយ៉ាងណា លោក ជុំ សុន្ទរី បញ្ជាក់ថា ស្ថានទូតកំពុងបន្តទាក់ទងជាមួយអាជ្ញាធរ មានសមត្ថកិច្ចថៃ រកព័ត៌មានបន្ថែមទៀត៕

អត្ថបទ៖ កោះកែវ