Connect with us

ព័ត៌មានជាតិ

ស្ថាប័ន​សិទ្ធិមនុស្ស​កម្ពុជា សហការ​ជាមួយ OHCHR បើក​កិច្ច​ពិគ្រោះ​យោបល់​បន្ថែម ដើម្បី​ប្រមូល​ធាតុ​ចូល​ពី​ក្រុម​ជន​មាន​ពិការ​

បានផុស

នៅ

គណៈកម្មាធិការ​សិទ្ធិមនុស្ស​កម្ពុជា (​គ​.​ស​.​ម​.​ក​) នៅ​ថ្ងៃទី​២១ ខែមីនា ឆ្នាំ​២០២២​នេះ បាន​សហការ​ជាមួយ​ការិយាល័យ​ឧ​ត្ត​ម​ស្នងការ​អង្គការសហប្រជាជាតិ​ទទួលបន្ទុក​សិទ្ធិមនុស្ស​នៅ​កម្ពុជា (OHCHR) បើក​កិច្ច​ពិគ្រោះ​យោបល់​លើក​ទី​៦ ដើម្បី​បន្ត​ពិភាក្សា​លើ​សេចក្តីព្រាងច្បាប់ ស្តីពី ការរៀបចំ និង​ការប្រព្រឹត្តទៅ​នៃ​គណៈកម្មាធិការ​ជាតិ​សិទ្ធិមនុស្ស​កម្ពុជា​។

កិច្ច​ពិគ្រោះ​យោបល់​នេះ ធ្វើឡើង​ក្រោម​អធិបតីភាព​លោក កែវ រ៉េមី ប្រធាន​គណៈ​កម្ម​ធិ​ការ​សិទ្ធិមនុស្ស​កម្ពុជា និង​លោកស្រី ក្លូ​ឌៀ ដឺ​ឡា ហ្វុ​ង​តេ (Claudia Dela Fuente) អនុប្រធាន​តំណាង OHCHR នៅ​ទីស្នាក់ការ​គណៈកម្មាធិកា​រ​សិទ្ធិមនុស្ស​កម្ពុជា​។ កិច្ច​ពិគ្រោះ​យោបល់​នេះ​ធ្វើឡើង ដើម្បី​ប្រមូល​ធាតុ​ចូល​ពី​ក្រុម​ជន​មាន​ពិការភាព​នានា​នៅ​កម្ពុជា ដើម្បី​ធានាបាន​នូវ​តម្លាភាព និង​ការចូលរួម​ពី​គ្រប់ភាគី​ពាក់ព័ន្ធ​។​

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

​ថ្លែង​នៅក្នុង​ឱកាស​នោះ លោក កែវ រ៉េមី បាន​លើកឡើងថា សិក្ខាសាលា​នេះ ធ្វើឡើង​ដើម្បី​ទទួល​មតិយោបល់​នានា ដើម្បីឱ្យ​សេ​ក្តី​ព្រាង​ច្បាប់​នេះ កាន់តែ​ល្អប្រសើរ​។ លោក​ថា នៅពេល​កម្ពុជា​បង្កើន​ស្ថាប័ន​សិទ្ធិ​មនុស្សជាតិ​នេះហើយ មិនមែន​ត្រូវ​ជិះសេះ​លែងដៃ​នោះទេ តែមាន​ការវាយតម្លៃ​ពី​អង្គការ​សមាគម នៃ​ស្ថាប័ន​សិទ្ធិមនុស្ស​ជាតិ​នេះ​ទៀត​។

​លោក កែវ រ៉េមី បាន​បញ្ជាក់​ថា ការជួប​ពិគ្រោះ​យោបល់​បែបនេះ នឹងធ្វើ​ឡើង​ទាំង​ថ្នាក់​តំបន់ និង​ស្ថាប័ន​ជាច្រើន​ទៀត នឹងមាន​ការចុះ​ទៅដល់​មូលដ្ឋាន​ជួប​ជាមួយ​ពលរដ្ឋ​តាម​បណ្ដា​ខេត្ត រួមទាំង​គណបក្សនយោបាយ ដែល​មិនមាន​អាសនៈ​នៅក្នុង​រដ្ឋសភា ដើម្បី​ទទួល​នូវ​ទស្សនៈ មតិយោបល់ និង​ធាតុ​ចូល​ផ្សេងៗ ដើម្បីឱ្យ​សេចក្តីព្រាងច្បាប់​នេះ កាន់តែ​ល្អប្រសើរ​ឡើង​។

ជាមួយគ្នានេះ លោកស្រី Claudia Dela Fuente តំណាង OHCHR បាន​លើកឡើងថា ការបង្កើត​គណៈកម្មាធិកា​រ​ជាតិ​សិទ្ធិមនុស្ស​កម្ពុជា មាន​សារៈសំខាន់​ខ្លាំង ក្នុងការ​លើកកម្ពស់​សិ​ទ្ធិ​មនុស្ស និង​ការពារ​សិទ្ធិមនុស្ស​នៅ​កម្ពុជា ហើយ​លោកស្រី​គាំទ្រ និង​បន្ត​សហការ​ជាមួយ គ​.​ស​.​ម​.​ក​. ក្នុង​ការបង្កើត​គណៈកម្មាធិកា​រ​ជាតិ​សិទ្ធិមនុស្ស​កម្ពុជា​។

សូមបញ្ជាក់ថា សេចក្តីព្រាងច្បាប់​នេះ មាន​៨​ជំពូក និង​៣២​មាត្រា បង្កើតឡើង​ក្នុង​គោលដៅ និង​កំណត់​អំពី​ការរៀបចំ និង​ការប្រព្រឹត្តិទៅ​នៃ​គណៈកម្មាធិការ​ជាតិ​សិទ្ធិមនុស្ស​កម្ពុជា ស្របតាម​គោលការណ៍​ទីក្រុង​ប៉ារីស ក្នុង​គោលបំណង ដើម្បី​លើកកម្ពស់ និង​ការពារ​សិទ្ធិមនុស្ស ដោយ​អនុលោម​តាម​បទ​ប្បញ្ញត្តិ ដូច​មានចែង​ក្នុង​រដ្ឋធម្មនុញ្ញ​នៃ​ព្រះរាជាណាចក្រ​កម្ពុជា ធម្មនុញ្ញ​អង្គការ​សហ​ប្រជា​ជាតិ សេចក្តីប្រកាស​ជាស​កល​ស្តីពី​សិទ្ធិមនុស្ស កតិកាសញ្ញា អនុសញ្ញា និង​លិខិតុបករណ៍​អន្តរជាតិ​ទាក់ទង​នឹង​សិទ្ធិមនុស្ស​។

ការបង្កើត​ស្ថាប័ន​សិទ្ធិ​មនុស្សជាតិ (NHRI) នៅក្នុង​ប្រទេស​កម្ពុជា ត្រូវបាន​ពិភាក្សា​អស់​រយៈពេល​ជាច្រើន​ទសវត្សរ៍​មកហើយ ជាមួយគ្នានេះ ប្រទេស​កម្ពុជា ក៏​ទទួល​បានជា​បន្តបន្ទាប់​នូវ​អនុសាសន៍​ពី​ស្ថាប័ន តាម​សន្ធិសញ្ញា និង​ពីរ​ដ្ឋ​ជា​សមាជិក​អង្គការសហប្រជាជាតិ តាមរយៈ​យន្តការ​ពិនិត្យឡើងវិញ​តាម​កាលកំណត់ ជាស​កល​។ នៅ​ខែកញ្ញា ឆ្នាំ​២០០៦ កម្ពុជា​បានបង្ហាញ​នូវ​ជំហរ​យ៉ាង​មុតមាំ​ក្នុងការ​បង្កើត​ស្ថាប័ន​សិទ្ធិ​មនុស្សជាតិ​មួយ​នៅក្នុង​ប្រទេស​កម្ពុជា ដោយបាន​ប្រគល់​តួនាទី​ឱ្យ​ក្រុមការងារ​អង្គការ​មិនមែន រដ្ឋាភិបាល​ទទួលបន្ទុក​រៀបចំ​សេចក្តីព្រាងច្បាប់​ស្តីពី​ការបង្កើត​ស្ថាប័ន​សិទ្ធិមនុស្ស​ជាតិ​នេះ​។

ចាប់ពី​ខែសីហា ឆ្នាំ​២០១៩ គណៈកម្មាធិការ​សិទ្ធិមនុស្ស​កម្ពុជា (​គ​.​ស​.​ម​.​ក​.) នៃ​រាជរដ្ឋាភិបាល បានទទួល​ភារកិច្ច​ធ្វើការ​ដឹកនាំ​ក្នុងការ​រៀបចំតាក់តែង​សេចក្តីព្រាងច្បាប់ ស្តីពី​ការបង្កើត​ស្ថាប័ន​សិទ្ធិ​មនុស្សជាតិ​កម្ពុជា ដោយមាន​កិច្ចសហការ​ជាមួយ​ការិយាល័យ​ឧ​ត្ត​ម​ស្នងការ​សហប្រជាជាតិ ទទួលបន្ទុក​សិទ្ធិមនុស្ស ប្រចាំ​កម្ពុជា (OHCHR) និង​វេទិកា​អាស៊ី​ប៉ាស៊ីហ្វិក (APF) ដែលមាន​មូលដ្ឋាន​ក្នុងប្រទេស​អូស្ត្រាលី​។

ចាប់តាំងពី​ខែកក្កដា ឆ្នាំ​២០២១ គ​.​ស​.​ម​.​ក​. បានចាប់ផ្ដើម​ផ្សព្វផ្សាយ និង​ដំណើរការ​កិច្ច​ពិគ្រោះ​យោបល់​លើ​សេចក្តីព្រាងច្បាប់​នេះ​ជា​សាធារណៈ និង​ជាមួយ​ភាគី​ពាក់ព័ន្ធ ជាអាទិ៍ អង្គការ​មិនមែន​រដ្ឋាភិបាល សង្គម ស៊ីវិល សហជីព គណបក្សនយោបាយ និង​ក្រសួង ស្ថាប័ន​ពាក់ព័ន្ធ ក្នុង​គោលបំណង​ប្រមូល​ទស្សនៈ មតិយោបល់ និង​ធាតុ​ចូល​ផ្សេងៗ​លើ​សេចក្តីព្រាងច្បាប់ ដើម្បី​ធានា​ឱ្យ​ច្បាប់​នេះ ស្របទៅនឹង​គោលការណ៍ ទីក្រុង​ប៉ារីស ដែលជា​បទដ្ឋាន​អ​ប្បរមា​អន្តរជាតិ​សម្រាប់​ជា​មូលដ្ឋាន​នៃ​ការបង្កើត NHRI​។​

​នៅពេល​ស្ថាប័ន​សិទ្ធិ​មនុស្សជាតិ ត្រូវបាន​បង្កើតឡើង ស្ថាប័ន​នេះ នឹងត្រូវ​ឆ្លងកាត់​ដំណើរការ​វាយ តម្លៃ​ទទួលស្គាល់​ដោយ​សម្ព័ន្ធ​សកល នៃ​ស្ថាប័ន​សិទ្ធិ​មនុស្សជាតិ (GANHRI) ដែលជា​អង្គការ​សកល​មួយ នៃ​ក្រុម NHRI ដែលមាន​ការទទួលស្គាល់​ជា​អន្តរជាតិ​។ NHRI នឹងត្រូវ​កំណត់​ចំណាត់ថ្នាក់​ជា​ប្រភេទ “​ក​” ឬ “​ខ​”​។ ឋានៈ​ជា​ប្រភេទ “​ក​” គឺជា NHRI ដែល​ស្រប​ទាំងស្រុង​នឹង​គោលការណ៍​ទីក្រុង​ប៉ារីស​។ ឋានៈ​ជា ប្រភេទ “​ខ​” គឺជា NHRI ដែល​អនុលោម​មិនទាន់បាន​គ្រប់​ជ្រុងជ្រោយ​ទៅនឹង​គោលការណ៍​ទីក្រុង​ប៉ារីស​។ NHRI ដែល​មិន​បំពេញ​តាម​លក្ខខណ្ឌ នៃ​គោលការណ៍​ទីក្រុង​ប៉ារីស នឹងមិន​ត្រូវ​បានទទួល​ស្គាល់​ឡើយ​៕

ដោយ ៖ កោះ​កែវ

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

ព័ត៌មានជាតិ៥ ម៉ោង មុន

ពលរដ្ឋ​មក​ទទួល​វ៉ាក់សាំង​ដូ​ស​ជំរុញ​ក្នុង​ខេត្តកោះកុង មិនទាន់​សម្រេច​ដល់​គោលដៅ​ចង់បាន​

ព័ត៌មានជាតិ៥ ម៉ោង មុន

ត្រីភាគី​ដាក់​តួលេខ​ប្រាក់​ឈ្នួល​ចុងក្រោយ​ជូន​ក្រុមប្រឹក្សា​ជាតិ​ប្រាក់​ឈ្នួល​សម្រេច​នៅ​ថ្ងៃទី​២១​កញ្ញា​ខាងមុខ

វប្បធម៌ ជំនឿ៦ ម៉ោង មុន

ពណ៌ផ្ទះហុងស៊ុយ​ ស្របតាមទិសទាំង ៨ ជួយទាក់ទាញសំណាងទ្វេដង

ព័ត៌មានជាតិ៦ ម៉ោង មុន

សពលោក ប៊ូ ឡាំ អតីត​អ្នកតំណាងរាស្ត្រ​ខេត្ត​រតនគិរី​ បាន​ដឹក​ពី​ប្រទេសវៀតណាមមកដល់កម្ពុជាហើយ ដើម្បី​រៀប​ចំ​ធ្វើ​បុណ្យ​តាម​ប្រពៃណី

ព័ត៌មានជាតិ៧ ម៉ោង មុន

រដ្ឋមន្ត្រី​ក្រសួងសាធារណការ​ ត្រៀម​ប្រើម៉ាស៊ីនទំនើប​ ដែល​អាច​ជំនួសមនុស្ស​ ក្នុងការចូលលូ​ លើកដំបូង​ក្នុង​ប្រទេស​កម្ពុជា

Sokha Hotels

ព័ត៌មានពេញនិយម