ក្រសួងការងារត្រៀមរៀបចំកិច្ចប្រជុំក្នុងក្របខ័ណ្ឌអាស៊ាន និងព្រឹត្តិការណ៍នានាចំនួន៨

ក្រសួងការងារនិងបណ្តុះបណ្តាលវិជ្ជាជីវៈ ដែលនឹងធ្វើជាប្រធាន និងម្ចាស់ផ្ទះនឹងត្រៀមរៀបចំកិច្ចប្រជុំក្នុងក្របខណ្ឌអាស៊ាន និងព្រឹត្តិការណ៍នានានៅឆ្នាំ២០២២នេះចំនួន៨។

ថ្លែងនៅក្នុងកិច្ចប្រជុំរបស់គណៈកម្មការរៀបចំកិច្ចប្រជុំក្នុងក្របខ័ណ្ឌអាស៊ាន និងព្រឹត្តិការណ៍នានាក្នុងឆ្នាំ២០២២ នៅព្រឹកថ្ងៃទី២៧ ខែមេសា ឆ្នាំ២០២២ លោកបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានគណៈកម្មការរៀបចំកិច្ចប្រជុំក្នុងក្របខ័ណ្ឌអាស៊ាន និងព្រឹត្តិការណ៍នានាក្នុងឆ្នាំ២០២២ បានមានប្រសាសន៍ថា វាជាលើកទី៣ហើយដែលកម្ពុជាទទួលកិត្តិយសដ៏ថ្លៃថ្លា និងប្រកបដោយមោទនភាពធ្វើប្រធាននៅក្នុងឆ្នាំ២០២២ នេះ។

ដោយឡែកនៅក្នុងឆ្នាំនេះ ក្រសួងការងារ និងបណ្តុះបណ្តាលវិជ្ជាជីវៈ នឹងត្រូវរៀបចំកិច្ចប្រជុំ និងព្រឹត្តិការណ៍ពាក់ព័ន្ធចំនួន៨ផងដែរ រួមមាន៖ ១. កិច្ចប្រជុំគណៈកម្មការអាស៊ានលើការអនុវត្តសេចក្តីថ្លែងការណ៍អាស៊ានស្តីពីការការពារ និងការលើកកម្ពស់សិទ្ធិពលករទេសន្តរប្រវេសន៍លើកទី១៥ (15th ACMW) ២.កិច្ចប្រជុំគណៈកម្មការក្របខ័ណ្ឌគុណវុឌ្ឍិយោងអាស៊ាន លើកទី១០ (10thAQRFC) ៣. សិក្ខាសាលា និងចងក្រងឯកសារស្តីពី “ឧត្តមានុវត្តន៍ផ្នែកសុវត្ថិភាព និងសុខភាពការងារនៅសហគ្រាសធុនតូច និងមធ្យមកន្លែងធ្វើការក្នុងសេដ្ឋកិច្ចក្រៅប្រព័ន្ធនិងការដ្ឋាន​សំណង់​ខ្នាតតូចនៅក្នុងបណ្តាប្រទេសអាស៊ាន”។ ៤. វេទិកាអាស៊ានស្តីពីទេសន្តរប្រវេសន៍ការងារ លើកទី១៥ (15th AFML) ៥.សិក្ខាសាលាស្តីពី “ការចែករំលែកឧត្តមានុវត្តន៍ក្នុងការអនុវត្តរបបសន្តិសុខសង្គមផ្នែកថែទាំសុខភាព និងផ្នែកប្រាក់សោធនសម្រាប់បុគ្គលស្វ័យនិយោជន៍ (សេដ្ឋកិច្ចក្រៅប្រព័ន្ធ) ៦.សន្និសីទរបស់អង្គការសហព័ន្ធវិស្វកម្មអាស៊ាន លើកទី៤០ (40th CAFEO) ៧. សន្និសីទអធិការកិច្ចការងារអាស៊ានលើកទី១១ (11th ALIC) និងកិច្ចប្រជុំគណៈកម្មការអធិការកិច្ចការងារអាស៊ានលើកទី២ (2ndALICOM) និង៨. កិច្ចសន្ទនាសង្គមត្រីភាគីថ្នាក់តំបន់អាស៊ាន លើកទី១៣ (13thARTSD)។

លោករដ្ឋមន្ត្រីបានមានប្រសាសន៍បន្តថា ក្នុងនាមជាប្រធានអាស៊ានឆ្នាំ២០២២ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានគូសបញ្ជាក់ថាកម្ពុជានឹងដឹកនាំកិច្ចខិតខំប្រឹង​ប្រែងរួមរបស់អាស៊ានដើម្បីឈានទៅសម្រេចបានសមិទ្ធផលសំខាន់ៗ ជាពិសេសជំរុញសន្ទុះនៃដំណើរការកសាងសហគមន៍អាស៊ានប្រកបដោយសមធម៌ភាពធន់ និងបរិយាបន្ន ក្រោមមូលបទ "អាស៊ានរួមគ្នាធ្វើ ដោះស្រាយបញ្ហាប្រឈមទាំងអស់គ្នា" (ASEAN A.C.T.: Addressing Challenges Together)។

ដើម្បីចូលរួមចំណែកគាំទ្រដល់ភាពជាប្រធានអាស៊ានរបស់រាជរដ្ឋាភិបាលកម្ពុជាក្នុងឆ្នាំ២០២២លោករដ្ឋមន្ត្រីបានបន្តទៀតថា សម្រាប់ក្របខ័ណ្ឌវិស័យការងារនិងបណ្តុះបណ្តាលវិជ្ជាជីវៈ ដែលស្ថិតក្រោមសសរស្តម្ភសហគមន៍សង្គម-វប្បធម៌អាស៊ាន ក្រសួងបានដាក់ចេញនូវគំនិតផ្តួចផ្តើមជាអាទិភាពគឺការអនុម័តសេចក្តីថ្លែងការណ៍អាស៊ានស្តីពីចល័តភាពនៃអត្ថប្រយោជន៍របបសន្តិសុខសង្គមសម្រាប់ពលករទេសន្តរប្រវេសន៍អាស៊ាននៅក្នុងកិច្ចប្រជុំកំពូលអាស៊ានលើកទី៤០ និង៤១ នាថ្ងៃទី១០-១៣ខែវិច្ឆិកា ឆ្នាំ២០២២ ខាងមុខនេះ៕

អត្ថបទ៖ សំអឿន